Wɔzukoa Buluku Mɔɔ Tɔ Zo Nwiɔ La Wɔwie Ɔ?

1. Duzu ati a bɛyɛle “Nyamenle Ɛhulolɛ” buluku ne a?

¹ Wɔ “Nyamenle Sunsum Kile Yɛ Adenle” Maangyeba Nyianu mɔɔ bɛyɛle ye 2008 la abo, Gyihova menli mɔɔ wɔ ewiade amuala la anye liele “Bɛzie Bɛ Nwo Wɔ Nyamenle Ɛhulolɛ Ne Anu” buluku ne mɔɔ bɛyele la anwo! Kɛmɔ bɛhanle ye wɔ zɔhane mekɛ ne la, bɛyɛ buluku ɛhye kɛ bɛfa bɛaboa yɛ amaa yɛanwu Gyihova ngyinlazo mɔɔ fane ɛbɛlabɔlɛ nwo la na yɛahulo zɔhane ngyinlazo ne mɔ, tɛ kɛ bɛfa bɛahile yɛ Baebolo nu mɔlebɛbo ngilehilelɛ ne mɔ. Ɔnle buluku mɔɔ yɛfa yɛmaa wɔ daselɛlilɛ nu a. Ɛnee akee kɛzi yɛbava yɛali gyima ɛ?

2. Nwane a ɔwɔ kɛ bɛ nee ye sukoa buluku ɛhye a, na kɛzi bɛfa bɛdi gyima ɛ?

² “Bɛzie Bɛ Nwo Wɔ Nyamenle Ɛhulolɛ Ne Anu” a le buluku mɔɔ tɔ zo nwiɔ mɔɔ ɔwɔ kɛ Baebolo sukoavoma mɔɔ bɛwie Baebolo ne Kilehile buluku ne la sukoa a. Saa sukoavo bie anwie mbuluku nwiɔ ne sukoa kolaa na bɛazɔne ye a, ɔwɔ kɛ bɛtoa debiezukoalɛ ne azo toonwo bɛwie “Nyamenle Ɛhulolɛ” buluku ne sukoa. Ɔwɔ nuhua kɛ bɛzɔne sukoavo ne ɛdeɛ, noko kilehilevolɛ ne bahola abu mekɛ ne, sia kɔkpɔla nee debiezukoalɛ ne anwo mgbonda. Nolobɔlɛnli mɔɔ nee kilehilevolɛ ne bahɔ na ɔkɛnyia debiezukoalɛ ne anu kyɛfoa la noko babu mekɛ ne anwo mgbonda.

3. Duzu ati a ɔwɔ kɛ menli mɔɔ bɛle fofolɛ la wie mbuluku nwiɔ ne sukoa a?

³ Bie mɔ suzu kɛ bɛwie Baebolo ne Kilehile buluku ne yemɔti bɛze nɔhalɛ ne kpalɛ. Ɛnee akee nzɔne ati a akɛlɛ nɔhavo ne kpondɛ kɛ yɛsukoa buluku mɔɔ tɔ zo nwiɔ la ɛ? Ɛhye anwo hyia amaa menli mɔɔ bɔ zo mɔɔ bɛzɔne bɛ la anwo ayɛ se wɔ nɔhalɛ ne anu kolaa na bɛagyakyi bɛ. Ɔwɔ kɛ bɛsosɔ “ndinli kpalɛ wɔ Kelaese anu” na ‘bɛmaa bɛ diedi gyinla kpundii’ amaa bɛahola bɛagyinla sɔnea mɔɔ bɛbayia la anloa. (Kɔl. 2:6, 7; 2 Tem. 3:12; 1 Pita 5:8, 9) Bieko, amaa bɛahola bɛahilehile awie mɔ kpalɛ la, ɔwɔ kɛ ‘bɛnwu nɔhalɛ ne’ kpalɛ. (1 Tem. 2:4) Saa yɛ nee yɛ sukoavo ne mɔ wie mbuluku nwiɔ ne a, ɛnee yɛlɛboa bɛ yɛamaa bɛalua adenle ne “mɔɔ kɔ ngoane mɔɔ ɛnlɛ awieleɛ la anu.” (Mat. 7:14) Ɔlua edwɛkɛ ɛhye mɔ ati awie biala ɛbɔ mɔdenle kɛ ɔ nee ye Baebolo sukoavo mɔɔ bɛbazɔne ye la bawie mbuluku nwiɔ ne.

4. Nzɔne a mgbanyima bahola ayɛ aboa amaa menli mɔɔ bɔ zo mɔɔ bɛzɔne bɛ la azukoa buluku mɔɔ tɔ zo nwiɔ la ɛ?

⁴ Ɔwɔ kɛ mgbanyima noko nea kɛ menli mɔɔ bɔ zo mɔɔ bɛzɔne bɛ la bawie buluku mɔɔ tɔ zo nwiɔ la. (Mrɛ. 27:23) Ɔyɛ a, Asafo Ɛzonlenlɛ Kɔmatii ne kpa nolobɔlɛnli bie kɛ ɔlua “Nyamenle Ɛhulolɛ” buluku ne anu edwɛkɛtile bie mɔ azo ɔboa awie mɔɔ ɛyɛ bɛtɛɛ wɔ daselɛlilɛ nu la. Saa bɛfa gyima ɛhye bie bɛmaa wɔ a, kakye kɛ ɔnle kɛ bɛsukoa bɛkyɛ, noko fa nɔhalɛlilɛ yɛ gyima ɛhye kpalɛ.

5. Duzu a ɔwɔ kɛ menli mɔɔ bɛzɔnenle bɛ ɛhyɛ ekyii na bɛtɛsukoale “Nyamenle Ɛhulolɛ” buluku ne la yɛ a?

⁵ Gyihova nee akɛlɛ nɔhavo ne ze mɔɔ awie ko biala hyia nwolɛ amaa ‘yeasosɔ ndinli’ na ‘yeagyinla kpundi’ wɔ diedi ne anu la. Yemɔti, wɔzukoa buluku mɔɔ tɔ zo nwiɔ la wɔwie ɔ? Saa bɛzɔnenle wɔ bɔbɔ la ɛhyɛ ekyii na bɛ nee wɔ ɛtɛsukoale a, ɛnee yɛ ngyehyɛleɛ ndɛndɛ sukoa! Nea nziezielɛ kɛnlɛma mɔɔ wɔ buluku ɛhye anu mɔɔ bahola aboa yɛ amaa yɛazie yɛ nwo wɔ “Nyamenle ɛhulolɛ ne anu a”!​—Dwuudu 21.