Debiezukoalɛ Ɛhɔlɛ Boa Ngakula
1 Bɛlɛra bie mɔɔ ɔlɛkɔ ɛvolɛ abulanwiɔ la hanle kɛ: “Ɔyɛ a medwenle kɛ ngakula a yia mekɛ mɔɔ anu yɛ se kpalɛ la wɔ ɛbɛlabɔlɛ nu a. Yɛ nee menli mɔɔ bɔ adwɔmane, bɛno nyiletane na bɛbo nza la a de a.” Asoo kɛ ɛte nganeɛ la ɛne? Saa zɔhane a ɛte nganeɛ a, ɛsuzu kɛ duzu a baboa wɔ yeamaa wɔaho wɔatia ninyɛndane ɛhye mɔ a? Ɛhyia diedi kpole mɔɔ bamaa wɔanwu kɛ Gyihova ndenle tenrɛ la, ɔluakɛ saa wɔanyia ye a ‘ɛnrɛhola ɛnrɛzɔ Nyamenle anye.’ (Hib. 11:6) Asafo debiezukoalɛ mɔɔ ɛbahɔ la baboa wɔ yeamaa Keleseɛne anwodozo mɔɔ ɛlɛ nee ɛ bo mɔɔ wɔsika kɛ ɛbahyi ɛtane la anu amia.
2 Debiezukoalɛ Ne Mɔ Baboa Wɔ Kpalɛ: Duzu a maa aleɛ mɔɔ yɛ nee yɛ gɔnwo mɔ bɔ nu di la yɛ anyelielɛ a? Asoo tɛ aleɛ kpalɛ ne mɔɔ yɛ nee bɛ bɔ nu di wɔ ɛleka kpalɛ la ɔ? Yɛ ayia ne mɔ noko maa yɛ nye die zɔhane ala wɔ sunsum nu.
3 Ninyɛne mɔɔ bɛsuzu nwo wɔ ayia ne mɔ abo la maa yɛ anwosesebɛ, ɔvi edwɛkɛ mɔɔ fane kɛzi yɛbali yɛ ngyegyelɛ nwo gyima kɔdwu Baebolo ngapezo ne mɔ mɔɔ yɛ anyelielɛ la azo. Bɛfa adehilelɛ mɔɔ fɛta mɔɔ bahilehile wɔ kɛzi ɛbabɔ wɔ ɛbɛla na wɔagyinla ngyegyelɛ mɔɔ ɛbayia anloa la bɛmaa. Agɔnwolɛma mɔɔ ɛbanyia bɛ wɔ debiezukoalɛ ne abo la le kpalɛ tɛla agɔnwolɛma gyɛne biala, eza yɛ sunsum nu tɛnlabelɛ ne yɛ anyelielɛ na banebɔlɛ wɔ nu. (Edw. 133:1) Ɔnyɛ nwanwane kɛ kakula ko hanle kɛ: “Mekɔ sukulu dahuu, na ɔmaa mefɛ. Noko ayia ne mɔ le kɛ ɛsɛlɛ zo ɛleka mɔɔ azule nee mbaka wɔ mɔɔ ɔmaa menyia anwosesebɛ mekɔ sukulu wɔ ye alehyenlɛ nu la.” Ko noko hanle kɛ: “Menwu kɛ saa me nee menli gyɛne mɔɔ bɛkulo Gyihova la tu a, ɔmaa mebikye ye.”
4 Saa ɛfa ɛ nwo ɛwula Teokelase Ɛzonlenlɛ Sukulu ne anu a, ɛbazukoa kɛzi bɛboɔboa Baebolo nu edwɛkɛ nloa, wɔahyehyɛ wɔamaa yeayɛ ɛdendɛlɛ, na akee wɔamaa ye wɔ adawubɔlɛ adenle zo wɔahile tievolɛma mɔɔ bɛwɔ Belemgbunlililɛ Asalo ɛkɛ ne la. Nea nvasoɛ mɔɔ ɛbanyia kɛ bɛtete wɔ kɛ ɛva Nyamenle Edwɛkɛ ne ɛhilehile kpalɛ a! Nienwu bieko a ngakula bahola anyia ndetelɛ kpalɛ ɛhye a?
5 Kɛ Ɔkɛyɛ Na Ayia Ne Mɔ Aboa Wɔ Kpalɛ La: Amaa ayia ne mɔ aboa wɔ kpalɛ la, ninyɛne nsa a hyia kpalɛ a. Bɛmɛ a le anwoziezielɛ, ɛ nwo mɔɔ ɛfa wɔawula nu nee gyima mɔɔ ɛbava wɔayɛ la.
6 Siezie Ɛ Nwo: Yɛ mekɛ ngyehyɛleɛ na siezie ɛ nwo maa debiezukoalɛ ne dahuu. Mmamaa sukulu gyima, gyima gyɛne mɔɔ ɛyɛ anzɛɛ nwɔhoalilɛ mɔɔ ɛlɛkɔ zo la sɛkye mekɛ mɔɔ ɛhyia amaa wɔahola wɔaziezie ɛ nwo wɔamaa mɔɔ bɛbazukoa wɔ debiezukoalɛ biala abo la. Saa ɛkola ɛyɛ ye dahuu a ɔbaboa. Mɔɔ lumua la, di dapɛne biala Baebolo ɛgengalɛ ngyehyɛleɛ ne mɔɔ wɔ Teokelase Ɛzonlenlɛ Sukulu ne anu la anzi. Mekɛ ekyii bie ala a ɛbahyia nwo kenle ko biala wɔava wɔagenga adile mɔɔ ɔwɔ kɛ ɛkenga la na wɔadwenledwenle nwolɛ a. Kpa mekɛ fa siezie ɛ nwo maa Asafo Baebolo Ɛzukoalɛ nee Ɛzinzalɛ Arane Ɛzukoalɛ ne. Yeanyɛ boɛ fee la, bie a ɔka kenle ko anzɛɛ nwiɔ na debiezukoalɛ mekɛ adwu a yɛɛ bie mɔ sukoa bɛ ɛdeɛ ne a. Bɔ mɔdenle kɛ dapɛne biala ɛbayɛ foa mɔɔ wɔ Ɛzonlenlɛ Nyianu ngyehyɛleɛ ne anu la zɔhane ala.
7 Fa Ɛ Nwo Wula Nu: Baebolo ne ka kɛ mɔɔ Gyisɛse nyianle ɛvolɛ 12 la, bɛnwunle ye wɔ ɛzonlenlɛ sua ne anu kɛ ɔlɛtie, ɔlɛbiza kpuyia na yeamaa mualɛ. (Luku 2:46, 47) Wɔ adenle fofolɛ zo, ɔvale ɔ nwo ɔwulale debiezukoalɛ ne anu kpalɛ. Saa ɛbɔ mɔdenle ɛfa ɛ nwo ɛwula debiezukoalɛ ne anu a ɛbanyia zolɛ nvasoɛ kpalɛ.—Mrɛ. 15:23
8 Ɔwɔ kɛ ɛtie mɔɔ bɛlɛkilehile wɔ debiezukoalɛ ne abo la kpalɛ. Ɔyɛ a ɛlɛtie ɛdendɛlɛ a ɔyɛ se ɔtɛla kɛ ɛlɛmaa bie la. Duzu ati ɔ? Saa awie fofolɛ ɛlɛtendɛ a, bie a wɔ adwenle bahola akpɔsa. Kɛzi ɛbali ɛhye azo ɛ? Kɛlɛ edwɛkɛ titile mɔɔ ɛbahulo kɛ ɛbanlea nuhua amozii la. Kɛlɛtokɛ ɛyɛlɛ bamaa wɔ adwenle ahɔ gyimalilɛ ne azo. Eza buke ngɛlɛlera ne mɔ na di ɔ nzi wɔ mekɛ mɔɔ tendɛvolɛ ne ɛlɛkenga la.
9 Bieko, fa yɛ wɔ bodane kɛ ɛbamaa mualɛ wɔ kpuyia nee mualɛ debiezukoalɛ ko biala abo. Saa ɛdwenle mɔɔ ɛbaha la anwo kpalɛ a, ɔbaboa wɔ kpole. Mrɛlɛbulɛ 15:28 ka kɛ: “Tenlenenli dwenle na yeabua edwɛkɛ.”
10 Fa Mɔɔ Ɛsukoa La Yɛ Gyima: Mɔɔ li awieleɛ la a le kɛ ɛbamaa mɔɔ wɔzukoa la ‘ayɛ gyima’ wɔ wɔ nu. (1 Tɛs. 2:13) Mekɛ mɔɔ ɛlɛfa ninyɛne mgbalɛ mɔɔ ɛbazukoa wɔ debiezukoalɛ biala abo wɔayɛ gyima la, ɛbabikye Gyihova Nyamenle kpalɛ. Ɛbanwu ye kpalɛ, na ɛbanyia anyelielɛ nee ahunlundwolɛ wɔ mekɛ mɔɔ ‘ɛlua nɔhalɛ adenle ne anu’ na ɛlɛfa wɔayɛ wɔ ɛdeɛ la.—3 Dwɔn 4.
11 Ngakula, saa bɛsiezie bɛ nwo dahuu bɛmaa debiezukoalɛ biala a, bɛva bɛ nwo bɛwula nu, na bɛva mɔɔ bɛsukoa la bɛyɛ gyima, bɛ nye balie debiezukoalɛ ne mɔ anwo kpalɛ. Eza bɛbanyia nvasoɛ biala mɔɔ ɔwɔ kɛ bɛnyia bɛfi nu la. Saa bɛsika bɛ bo kɛ bɛbali nɔhalɛ bɛamaa bɛ anwuma Selɛ, Gyihova a, bɛ diedi nu bamia.—Edw 145:18.