Maa Ɔyɛ Wɔ Subane Kɛ Ɛbali Mekɛ Zo
1. Neazo boni a Gyihova yɛ wɔ mekɛ zo ɛlilɛ nwo a?
1 Gyihova di mekɛ zo dahuu. Kɛ neazo la, ɔmaa ye azonvolɛ ‘nyia moalɛ wɔ mekɛ mɔɔ bɛkɛhyia la.’ (Hib. 4:16) Eza ɔmaa bɛ sunsum nu “aleɛ wɔ mekɛ ne anloa.” (Mat. 24:45) Ɛhye ati, yɛbahola yɛanyia anwodozo kɛ Gyihova ɛya kenle ne ‘ɛnrɛhyɛ fee.’ (Hab. 2:3) Nea kɛzi Gyihova mekɛ zo ɛlilɛ ne boa yɛ a! (Edw. 70:5) Noko akee, kɛmɔ yɛle menli mɔɔ yɛtɔ sinli na yɛnlɛ alagye la ati, ɔbahola yɛayɛ se yeamaa yɛ kɛ yɛbali mekɛ zo. Duzu ati a ɔwɔ kɛ yɛmaa ɔyɛ yɛ subane kɛ yɛbali mekɛ zo a?
2. Duzu ati a mekɛ zo ɛlilɛ wula Gyihova anyunlunyia a?
2 Awieleɛ mekɛ ɛhye mɔɔ menli dɔɔnwo le angomedi na bɛndwenle awie mɔ anwo la anu, bɛ nuhua dɔɔnwo ɛnli mekɛ zo. (2 Tem. 3:1-3) Yemɔti saa Keleseɛnema di mekɛ zo kɔ gyima, bɛyɛ ngyehyɛleɛ na bɛdi zo na bɛkɔ debiezukoalɛ wɔ mekɛ nloa a, menli nwu ye na ɛhye wula Gyihova anyunlunyia. (1 Pita 2:12) Asoo yɛta yɛbɔ gyima bo ndɛ, noko yɛta yɛka amozi wɔ teokelase gyimalilɛ bo ɔ? Saa yɛkɔ Keleseɛne nyianu wɔ mekɛ nloa na bɛado edwɛne nee asɔneyɛlɛ mɔɔ bɛbava bɛabuke ɔ nye a, ɔkile kɛ yɛlɛ ɛhulolɛ kɛ yɛbazukoa yɛ anwuma Selɛ ne mɔɔ yɛ ye debie biala pɛpɛɛpɛ la.—1 Kɔl. 14:33, 40.
3. Duzu ati a yɛdi mekɛ zo a ɔkile kɛ yɛdwenle awie mɔ anwo a?
3 Saa yɛdi mekɛ zo a eza ɔkile kɛ yɛdwenle awie mɔ anwo. (Fel. 2:3, 4) Kɛ neazo la, saa yɛkɔ Keleseɛne nyianu nee daselɛlilɛ nyianu wɔ mekɛ nloa a, ɔmmaa yɛngyegye yɛ mediema dɔɔnwo. Noko akee, saa yɛta yɛka amozi a, ɔmaa awie mɔ nyia adwenle kɛ yɛbu yɛ mekɛ ɛdeɛ ne kɛ ɔhyia ɔtɛla bɛ ɛdeɛ ne. Yɛdi mekɛ zo a ɔkile kɛ bɛkola bɛnyia yɛ nu anwodozo, yɛbɔ mɔdenle yɛɛ bɛkola bɛdie yɛ bɛdi—subane mɔɔ yɛ gɔnwo mɔ anye die nwolɛ la.
4. Saa yɛta yɛka amozi a, kɛ ɔkɛyɛ na yɛanyia anyuhɔlɛ ɛ?
4 Saa ɛta ɛka amozi a, dwenledwenle deɛmɔti ɔba ye zɔ la anwo. Dua ngyehyɛleɛ kpalɛ zo toto wɔ ninyɛne boɛ mɔɔ baboa wɔ yeamaa wɔayɛ wɔ debie wɔ mekɛ nloa la. (Nolo. 3:1; Fel. 1:10) Kpondɛ moalɛ fi Gyihova ɛkɛ. (1 Dwɔn 5:14) Saa yɛdi mekɛ zo a, ɔle adenle ko mɔɔ yɛdua zo yɛkile anyezɔlɛ yɛmaa mɛla titile nwiɔ ne mɔɔ se, yɛhulo Nyamenle na yɛhulo yɛ gɔnwo mɔ la.—Mat. 22:37-39.