Fa Magazine Dɛba Di Gyima Kpalɛ
Kɛmɔ yɛfa magazine dɛba yɛsie anzɛɛ yɛto yɛgua ye lɔ a awie biala ɛnnyia zolɛ nvasoɛ la ati, ɔwɔ kɛ yɛbɔ mɔdenle yɛfa yɛmaa. Magazine kokye bahola amaa awie anye alie nɔhalɛ ne anwo na yeamaa yeabɔ ɔ bo yeabɔ Gyihova duma. (Wulo. 10:13, 14) Nzuzulɛ bie mɔ mɔɔ baboa yeamaa yɛava magazine dɛba yɛali gyima kpalɛ la ɛne.
Saa ɛlɛka edwɛkɛ ne wɔ azɛlɛsinli mɔɔ bɛnda bɛnyɛ nuhua gyima la anu a, ɛbahola wɔagyakyi ko wɔamaa menli mɔɔ bɛnle sua nu la wɔ ɛleka mɔɔ awie ɛnrɛva la.
Saa ɛlɛdi daselɛ wɔ bagua nu wɔ kale agyinlaleɛ a, biza menli mɔɔ wɔ ɛkɛ la saa bɛkulo kɛ bɛkenga debie a, fa magazine dɛba dɔɔnwo mɔɔ ɛlɛ la bie kile bɛ na maa bɛye bie.
Saa ɛkɔ asopiti anzɛɛ ɛleka zɛhae bie mɔɔ wɔ asafo ne azɛlɛsinli ne anu la a, fa magazine dɛba ne bie gua ɛleka mɔɔ bɛkendɛ la. Saa ahenle mɔɔ nea ɛkɛ la wɔ ɛkɛ a, ɔle kpalɛ kɛ ɛdumua ɛsɛlɛ adenle ɛfi ye ɛkɛ. Saa ɛnwu kɛ magazine dɔɔnwo wɔ ɛkɛ a, mmafa dɔɔnwo ɛboka nwo.
Saa ɛlɛsiezie ɛ nwo wɔayɛ sia kɔkpɔla a, suzu sonla ko biala mɔɔ wɔyɛ kɛ ɛbakpɔla ye la anwo. Ɔlɛ abusua ɔ? Ɔkulo adendulɛ ɔ? Ɔ nye die tola nwo ɔ? Nea magazine dɛba ne mɔ anu edwɛkɛ mɔɔ ɔ nye balie nwo kɛ ɔbagenga la, ɛsia ɛkɔ ɛkɛ a fa kile ye.
Saa ɛnwu awie mɔɔ ɛnda ɛndo ye wɔ sua nu la a, fa magazine dɛba mɔɔ ɔ sa anga bie la kile ye.