Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu​—Yɛbua Menli Mɔɔ Pɛ Edwɛkɛ Zo La

Deɛmɔti Ɔhyia La: Fa ye kɛ ɛze kɛ esiane bie ɛbikye. Saa menli annriandi angɔ ɛleka mɔɔ banebɔlɛ wɔ la a bɛbawu. Wɔhɔ awie bie mɔɔ de kpalɛ ne azo la sua nu kɛ ɛkabɔ ye kɔkɔ, noko ɔpɛ ɛ nloa azo, na ɔka kɛ ɔnlɛ alagye. Nɔhalɛ nu, ɛnrɛyɛ ye ndɛndɛ ɛnrɛgyakyi ye ɛboalɛ! Menli dɔɔnwo mɔɔ wɔ yɛ azɛlɛsinli ne anu la ɛndie yɛ, bɛnze kɛ yɛ edwɛkɛ ne balie bɛ ngoane. Bie a mekɛ mɔɔ yɛbahɔ bɛ ɛkɛ la, ɛnee bɛlɛyɛ debie. (Mat. 24:37-39) Anzɛɛ bie a adalɛ edwɛkɛ mɔɔ bɛde la ɛzɛkye bɛ adwenle. (Mat. 11:18, 19) Bie a bɛbanyia adwenle kɛ yɛle kɛ asɔne ngakyile mɔɔ bɛzo ma ɛtane la. (2 Pita 2:1, 2) Saa mɔlebɛbo ne suamenle ne anye anlie nwolɛ a, ɔnle kɛ yɛ sa nu to ndɛndɛ.