Fa Ngapezoma Ne Yɛ Neazo—Maeka
1. Kpuyia boni a bie a Maeka dwenlenle nwolɛ a, duzu ati a ye edwɛkɛhanlɛ ne anyɛ mgbane a?
1 ‘Kenlenzu a ewiade ɛtane ɛhye bara ye awieleɛ bɔkɔɔ a?’ Bie a ngapezonli Maeka dwenlenle kpuyia ko ne ala anwo wɔ mekɛ mɔɔ ɔka Gyihova ndɛnebualɛ ne yeatia Dwuda nee Yizilayɛ arelemgbunlililɛ ne mɔ la. Noko, ye edwɛkɛhanlɛ ne anyɛ mgbane. Wɔ Maeka mekɛ zo, Gyihova edwɛkɛ mɔɔ tia Samɛlea la rale nu wɔ ɛvolɛ 740 K.Y.M. (Maeka 1:6, 7) Nzinlii, bɛzɛkyele Gyɛlusalɛm wɔ ɛvolɛ 607 K.Y.M. (Maeka 3:12) Kɛ ɔkɛyɛ na yɛazukoa Maeka wɔ mekɛ mɔɔ yɛlɛkendɛ Gyihova ndɛnebualɛ ne wɔ yɛ mekɛ ye anu la ɛ?
2. Adenle boni azo a yɛsi abotane yɛkendɛ Gyihova kenle ne a, na kɛmɔti a yɛyɛ zɔ ɛ?
2 Si Abotane: Maeka hɛlɛle kɛ: “Na mame, mebanlea mɔɔ [Gyihova] kɛyɛ la, mebahendɛ me ngoanelielɛ Nyamenle ne.” (Maeka 7:7) Nɔhalɛ nu, Maeka andɛnla ɛkɛ ne angendɛ kɛ awieleɛ ne ɛrɛla. Ɔyɛle ye gyima kɛ Gyihova ngapezonli la. Mekɛ mɔɔ yɛlɛkendɛ Gyihova kenle ne la, ‘ɔwɔ kɛ yɛyɛ menli mɔɔ yɛ ɛbɛla nwo te saanwu na yɛtu yɛ nwo yɛmaa Nyamenle’ la. (2 Pita 3:11, 12) Gyihova abotane ne maa menli nyia adenle nu bɛ nwo. (2 Pita 3:9) Ɛhye ati, yɛtie Nyamenle folɛdulɛ ne mɔɔ se yɛzukoa ngapezoma ne na yɛzi abotane la.—Gye. 5:10.
3. Duzu ati a ɔwɔ kɛ yɛsɛlɛ Gyihova sunsum nwuanzanwuanza ne moalɛ ɛ?
3 Kpondɛ Anwosesebɛ Fi Gyihova Ɛkɛ: Ɛnee Maeka gyima ne yɛ se ɛdeɛ, noko ɔkpondɛle anwosesebɛ ɔvile Gyihova ɛkɛ na ɔyɛle ye gyima ne. (Maeka 3:8) Ɔnyɛ nwanwane kɛ Gyihova Edwɛkɛ ne tu yɛ folɛ kɛ yɛkpondɛ anwosesebɛ yɛvi Nyamenle ɛkɛ ne la. Ɔfi atiakunlukɛnlɛma nu ɔmaa menli mɔɔ ɛvɛ la anwosesebɛ amaa bɛahola bɛayɛ bɛ teokelase gyima ne. (Edw. 84:5, 7; Aye. 40:28-31) Wɔnwu ɛhye bie wɔ wɔ ɛzonlenlɛ nwuanzanwuanza ne anu ɔ? Asoo dahuu ɛsɛlɛ Gyihova kɛ ɔva ye sunsum nwuanzanwuanza tumi kpole ne ɔboa wɔ?—Luku 11:13.
4. Kɛzi Maeka ɛbɛlabɔlɛ ne le neazo kɛnlɛma maa yɛ ɛnɛ ɛ?
4 Maeka manle Nyamenle ɛhulolɛdeɛyɛlɛ hyianle ye kpole wɔ ye ɛbɛlabɔlɛ nu. Ɔzile kpɔkɛ kɛ ɔbahɔ zo yeali nɔhalɛ ɔnva nwo kɛ ɛnee ɔde menli mɔɔ bɛ ɛbɛla ɛzɛkye avinli la. Zɔhane ala a, bɛsɔ yɛ nɔhalɛlilɛ bɛnea alehyenlɛ biala a. Ɛhye ati, bɛmaa yɛbɔ kpɔkɛ kpundii kɛ “yɛbazonle [Gyihova] yɛ Nyamenle ne na yɛali ye mɛla zo dahuu.”—Maeka 4:5.