Bɛmaa Ɔhyia Bɛ Kɛ Bɛbabɔ Baebolo Ɛzukoalɛ Bo Wɔ Folɛ Mɔɔ Lumua La
Ɔvi May 2011, mɔɔ ba la, bɛmanle nolobɔlɛma anwosesebɛ kɛ bɛbɔ mɔdenle bɛbɔ Baebolo ɛzukoalɛ bo wɔ Folɛ mɔɔ lumua wɔ siane biala anu la. Amaa yeaboa yɛ na yɛahola yɛayɛ zɔ la, bɛziezie edwɛkɛ bie mɔɔ bɛta bɛfa bɛba maanlema Ɛzinzalɛ Arane ne anu mɔɔ ati se, “Baebolo Kpuyia Mɔɔ Bɛbua” la. Yemɔti, ɔwɔ kɛ daselɛlilɛ nyianu ne mɔɔ bɛyɛ ye wɔ Folɛ mɔɔ lumua la twe adwenle sie kɛzi bɛbahola bɛava edwɛkɛ ɛhye bɛabɔ Baebolo ɛzukoalɛ bo la azo na bɛyɛ buluku mɔɔ bɛlɛfa bɛamaa la anwo yɛkile bɛboka nwolɛ.
Mgbanyima ne mɔ bahola amaa daselɛlilɛ ekpunli ne mɔ angomekye ayia ɛleka ngakyile wɔ Folɛ mɔɔ lumua la anu, anzɛɛ bɛbahola bɛaha ekpunli ne mɔ bɛabɔ nu na bɛayia wɔ Belemgbunlililɛ Asalo ɛkɛ. Noko akee, saa asafo dɔɔnwo yia wɔ Belemgbunlililɛ Asalo ɛkɛ a, ɔnle kɛ asafo bie tu kenle titile ɛhye sie kenle fofolɛ kɛ bɛka ekpunli ne mɔ bɛabɔ nu na bɛayɛ daselɛlilɛ nyianu ne bɛabɔ nu.