Duzu A Ka Yɛ Maa Yɛka Edwɛkɛ Ne A?
1. Koyɛlɛ boni a wɔ ɛlɔlɛ nee yɛ ɛzonlenlɛ gyima ne avinli a?
1 Nyamenle Belemgbunlililɛ ne anwo edwɛkpa ne mɔɔ yɛbɔ ye nolo la le gyima mɔɔ tɛla biala mɔɔ yɛbahola yɛayɛ ye ɛnɛ a. Nɔhalɛ nu, ɛhye a le gyima ko mɔɔ maa yɛyɛ tieyɛ yɛmaa mɛla titile nwiɔ ne mɔɔ se, yɛhulo Gyihova na yɛhulo yɛ gɔnwo mɔ la. (Mak. 12:29-31) Ɛlɔlɛ a le debie titile mɔɔ ka yɛ maa yɛyɛ azonvolɛ mɔɔ bɔ mɔdenle kpalɛ a.—1 Dwɔn 5:3.
2. Kɛzi yɛ edwɛkɛhanlɛ ne kile Gyihova anwo ɛlɔlɛ ɛ?
2 Gyihova Anwo Ɛlɔlɛ: Gyihova mɔɔ le yɛ Gɔnwo kpalɛ la anwo ɛlɔlɛ ka yɛ maa yɛdi ɔ nwo daselɛ. Seetan ɛsokpa ye wɔ kɛyɛ ɛvolɛ 6,000 mɔɔ ɛze ɛhɔ la anu. (2 Kɔl. 4:3, 4) Ɛhye ati, menli die di kɛ Nyamenle maa ɛtanevolɛma nwu amaneɛ wɔ hɛɛle senle nu, na bɛkile kɛ ɔle Nsa-Ko mɔɔ le feabo, yɛɛ ɔndwenle alesama anwo. Menli dɔɔnwo ɛha bɔbɔ kɛ ɔnle ɛkɛ. Nea kɛzi yɛkulo kɛ yɛmaa menli nwu yɛ anwuma Selɛ ne anwo nɔhalɛ ne la! Mɔdenle mɔɔ yɛbɔ yɛdi Nyamenle anwo daselɛ la maa ɔ nye die kpole na ɔmaa Seetan arɛle bɔ.—Mrɛ. 27:11; Hib. 13:15, 16.
3. Kɛzi yɛ ɛzonlenlɛ gyima ne maa yɛkile menli nwo ɛlɔlɛ ɛ?
3 Menli Nwo Ɛlɔlɛ: Mekɛ biala mɔɔ yɛbali awie daselɛ la, yɛkile kɛ yɛkulo ye. Ɔhyia ndɛndɛ kɛ menli te edwɛkpa ne wɔ anwongyelelɛ mekɛ ɛhye anu. Menli dɔɔnwo le kɛ Dwona mekɛ zo Nenɛvɛma mɔɔ ɛnee “bɛnze bɛ bɛne a bɛnze bɛ fema” la. (Dwn. 4:11) Yɛ ɛzonlenlɛ gyima ne kilehile menli kɛzi bɛnyia asetɛnla kpalɛ na bɛ nye die la. (Aye. 48:17-19) Ɔmaa bɛnyia anyelazo. (Wulo. 15:4) Saa bɛtie na bɛfa mɔɔ bɛsukoa la bɛbɔ bɛ ɛbɛla a, bɛbanyia “ngoane.”—Wulo. 10:13, 14.
4. Duzu a Gyihova arɛle ɛnrɛvi ye ɛlɛ a?
4 Tɛ mekɛ bie mɔɔ bɛhile la anu ala a ngakula kpalɛ kile bɛ awovolɛ anwo ɛlɔlɛ a. Bɛbɔ mɔdenle bɛkulo menli mekɛ kɔsɔɔti. Zɔhane ala a, Nyamenle nee menli nwo ɛlɔlɛ kpalɛ ka yɛ maa yɛ nye da kɛ yɛbava mekɛ biala mɔɔ yɛkɛnyia la yɛali daselɛ na tɛ mekɛ mɔɔ yɛyɛ ngyehyɛleɛ kɛ yɛkɔ daselɛlilɛ la. Yɛka edwɛkɛ ne dahuu. (Gyi. 5:42) Gyihova arɛle ɛnrɛvi ɛlɔlɛ zɛhae ɛlɛ.—Hib. 6:10.