Kpuyia Ɛleka

◼ Baebolo ngyinlazo boni mɔ a ɔwɔ kɛ yɛfa yɛdi gyima wɔ moba nwo wɔ debiezukoalɛ bo nee daselɛlilɛ nu a?

‘Debie Biala Lɛ Ye Mekɛ.’ (Nolo. 3:1): Moba kola maa menli kɛlɛ edwɛkɛ nwa bɛ nwo anzɛɛ bɛtendɛ mekɛ biala mɔɔ bɛkulo la. Noko akee, mekɛ bie mɔ anu, Keleseɛnema ɛngulo kɛ bɛ moba ne bagyegye bɛ. Kɛ neazo la, yɛ nyianu ne mɔ le mekɛ mɔɔ yɛfa yɛsonle Gyihova, yɛdie sunsum nu adehilelɛ, na yɛmaa yɛ nwo anwosesebɛ la. (Mɛla 31:12; Edw. 22:22; Wulo. 1:11, 12) Yɛbahola yɛanlua yɛ moba ne wɔ mekɛ mɔɔ yɛkɛdwu ɛkɛ ne la na yɛkpɔne a yɛazɔ na yɛanlea edwɛkɛ mɔɔ wɔ zolɛ la ɔ? Saa edwɛkɛ bie mɔɔ yɛ nye la ye ade la ati yɛnrɛnlua ye a, ɔwɔ kɛ yɛfa yɛto ɛleka mɔɔ ɔnrɛgyegye awie mɔ la.

‘Yɛ Ɛhye Mɔ Amuala Wɔ Edwɛkpa Ne Ati.’ (1 Kɔl. 9:23): Ɔdwu mekɛ ne bie a, yɛkola yɛfa moba yɛdi gyima kpalɛ wɔ daselɛlilɛ nu. Kɛ neazo la, adiema nrenya ne mɔɔ banlea daselɛlilɛ zo la bahola ava akpondɛ menli mɔɔ ɛlɛyɛ gyima wɔ azɛlɛsinli ne foa la. Ɔyɛ a nolobɔlɛma fa bɛ moba ne fɛlɛ anyelielɛma anzɛɛ Baebolo sukoavo bie kolaa na bayɛ sia kɔkpɔla, titile saa ahenle de moa a. Saa yɛlɛ moba a, ɔwɔ kɛ yɛnea boɛ kɛ ɔnrɛyɛ dede wɔ mekɛ mɔɔ yɛ nee suamenle bie ɛlɛtendɛ la. (2 Kɔl. 6:3) Saa yɛlɛkendɛ nolobɔlɛma gyɛne a, kɛ anrɛɛ yɛbavɛlɛ anzɛɛ yɛbahɛlɛ edwɛkɛ yeamaa yɛ gɔnwo bie la, asoo ɔnrɛyɛ kpalɛ kɛ yɛbamaa yɛ adwenle ahɔ ɛzonlenlɛ gyima ne nee bɛdabɛ mɔɔ yɛ nee bɛ ɛlɛyɛ gyima ne la anwo zo?

Dwenle Awie Mɔ Anwo. (1 Kɔl. 10:24; Fel. 2:4): Yɛngulo kɛ yɛto yɛ adwenle nu wɔ mekɛ mɔɔ yɛbava yɛahɔ daselɛlilɛ nyianu ne la anwo na yɛnyia adwenle kɛ dahuu yɛbavɛlɛ awie wɔ moba zo anzɛɛ yɛbahɛlɛ awie yɛabiza ɛleka mɔɔ ekpunli ne bali daselɛ la. Fane dɔɔnwo ne ala, saa yɛka amozii a bɛsia bɛkyɛ ekpunli ne fofolɛ. Ɔle nɔhalɛ kɛ, ɔdwu mekɛ ne bie a ninyɛne bie mɔ mɔɔ yɛngola nwolɛ ɛhwee yɛ la kola maa yɛka amozii. Noko akee, saa yɛmaa ɔyɛ yɛ subane kɛ yɛbadwu ɛkɛ ne ndɛ a, ɔbahile kɛ yɛdwenle Gyihova ngyehyɛleɛ, adiema nrenya ne mɔɔ ɛlɛnea zo, yɛɛ yɛ gɔnwo mɔ nolobɔlɛma anwo.