Fa Ngapezoma Ne Yɛ Neazo—Dwona
1. Subane ngɛnlɛma boni a ɛnee Dwona lɛ a?
1 Saa ɛdwenle ngapezonli Dwona anwo a duzu a ɛkakye a? Bie mɔ bu ye kɛ ɔle foanvoanle anzɛɛ ɔ ti yɛ se. Noko akee, ɔda ali kɛ ɔnyianle mɛlɛbɛnwoaze, akɛnrɛsesebɛ nee anwofamaa sunsum. Kɛ ɔkɛyɛ na yɛava Dwona subane ngɛnlɛma ne ‘yɛayɛ ndonwo’ ɛ?—Gye. 5:10.
2. Kɛ ɔkɛyɛ na yɛazukoa Dwona mɛlɛbɛnwoaze ne ɛ?
2 Mɛlɛbɛnwoaze: Mɔlebɛbo ne, Dwona nriandile vile azɛlɛsinli mɔɔ bɛvale bɛmanle ye la anwo. Ɛhye ɛnyɛ nwanwane ɔluakɛ ɛnee Aseleama ɛlie duma kɛ bɛle amumuyɛ, na ɛnee bɛfɛlɛ Nenɛvɛ kɛ “ahɔdiawu ɛyi ye tɔ.” (Nah. 3:1-3) Noko akee Gyihova hwile Dwona anyunlu la, ɔbɛlɛle ɔ nwo aze na ɔyɛle gyima ne. (Mrɛ. 24:32; Dwn. 3:1-3) Mɔlebɛbo ne ɔnriandile ɛdeɛ, noko ɔyɛle Gyihova ɛhulolɛdeɛ. (Mat. 21:28-31) Asoo yɛdayɛ noko yɛva yɛzie yɛ nye zo kɛ yɛbabɔ edwɛkpa ne nolo, saa bɔbɔ bɛtwi yɛ nyunlu anzɛɛ azɛlɛsinli ne anu gyima yɛ se maa yɛ a?
3. Wɔ ɛzonlenlɛ gyima ne foa boni a hyia akɛnrasesebɛ nee anwofamaa ɛ?
3 Akɛnrasesebɛ Nee Anwofamaa: Mekɛ mɔɔ Dwona nwunle kɛ kpɔkɛ ɛtane mɔɔ yezi ɛmaa esiane ɛdo melikavolɛma ne la, ɔnyianle ɛhulolɛ kɛ ɔbava ye ngoane yeabɔ afɔle. (Dwn. 1:3, 4, 12) Nzinlii mɔɔ ɔlɛyɛ ye gyima ne wɔ Nenɛvɛ la, ɔhɔle suakpole ne azo, na ɔkpondɛle ɛleka kɛnlɛma ɔgyinlanle kɛ ɔbɔ Gyihova ndɛnebualɛ ne nolo. Zɔhane nyɛleɛ ne mɔ kile kɛ ɔnle foanvoanle, emomu, ɔle Nyamenle ngapezonli mɔɔ lɛ akɛnrasesebɛ a! (Dwn. 3:3, 4) Na yɛdayɛ noko ɛ? Ɔwɔ kɛ yɛnyia akɛnrasesebɛ yɛfi Nyamenle ɛkɛ na yɛahola yɛagyinla dwazotia nloa yɛali daselɛ mɔɔ yɛnzulo a. (Gyi. 4:29, 31) Ɔwɔ kɛ yɛnyia anwofamaa na yɛahola yɛava yɛ mekɛ nee yɛ anwonyia yɛaboa ɛzonlenlɛ gyima ne.—Gyi. 20:24.
4. Kɛmɔti a ɔwɔ kɛ yɛsuzu neazo kɛnlɛma mɔɔ Gyihova ngapezoma ne ɛyɛ la anwo a?
4 Mekɛ biala mɔɔ ɛbagenga Gyihova ngapezonli bie anwo edwɛkɛ la, saa ɛyɛ ɛ nwo nvoninli kɛ ɛwɔ ɛkɛ ne bie a ɔbaboa wɔ. Biza ɛ nwo kɛ: ‘Kɛzi anrɛɛ mebayɛ ɛ? Kɛ ɔkɛyɛ na meazukoa subane ngɛnlɛma ɛhye mɔ ɛ?’ (Hib. 6:11, 12) Edwɛkɛ mɔɔ bara Yɛ Belemgbunlililɛ Gyima ne anu kenlebie la bazuzu ninyɛne kpalɛ mɔɔ yɛbahola yɛazukoa yɛavi Gyihova ngapezoma gyɛne mɔɔ di nɔhalɛ ɛkɛ la anwo.