“Bɛhulo Bɛ Gɔnwo Mɔ Diedima”
Bɛvale sunsum ne bɛhɛlɛle edwɛkɛtile ɛhye wɔ ɛvolɛ asɛɛ apenle nwiɔ mɔɔ ɛze ɛhɔ la anu. (1 Pita 2:17) Noko ɔwɔ kɛ yɛfa yɛdi gyima ɛnɛ yɛtɛla mekɛ biala! Kɛ ɔkɛyɛ na yɛahulo debie mɔɔ le kpole kɛ ewiade amuala mediemayɛlɛ ne la ɛ? Wɔ ewiade ɛhye mɔɔ ɛlɔlɛ ɛnle nu la anu, kɛ ɔkɛyɛ na yɛanlea kɛ yɛ ɛlɔlɛ ne ɛnrɛha aze ɛ? (Mat. 24:12) Nea kɛ ɛbahola wɔabua kpuyia ne mɔ wɔ mekɛ mɔɔ ɛlɛnea video ne mɔɔ se, Our Whole Association of Brothers la.
(1) Mekɛ boni a bɛliele yɛ bɛdole nu kɛ yɛboka yɛ Keleseɛne mediemayɛlɛ ne anwo a? (2) Ninyɛne nsa boni mɔ a yɛ nee ewiade amuala mediemayɛlɛ ne bɔ nu yɛ a? (3) Kɛzi yɛ mediema ɛlɛbɔ mɔdenle aha edwɛkɛ ne wɔ (a) Alaska fienemgbole ne anu, (b) Europe habɔ mgbole ne mɔ anu, yɛɛ (d) Peru kpɔkɛmile ne anu ɛ? (4) Duzu a maa daselɛlilɛ gyima ne yɛ ngakyile ɛ? (5) Maa neazo mɔɔ kile kɛzi Gyihova Alasevolɛ boa na bɛkyekye bɛ nwo rɛle wɔ mekɛ mɔɔ (a) azɛlɛkpusulɛ kɛzi, (b) ahumuakyima kɛzi, yɛɛ (d) konle kɛzi la ɛ? (6) Adenle boni a yɛ muala yɛbahola yɛalua zo yɛala yɛ Keleseɛne mediemayɛlɛ nzonlɛyɛlɛ kpole ne ali ɛ? (Dwɔn 13:35) (7) Nvasoɛ boni a wɔ zo kɛ yɛbabɔ nu yɛazi yɛ Belemgbunlililɛ Asalo ne mɔ a? (8) Kɛzi yɛ mediema mɔɔ wɔ Europe Aduduleɛ nee Russia la holale gyinlanle wɔ sunsum nu wɔ mekɛ mɔɔ bɛvale bɛ sa bɛdole gyima ne azo la ɛ? (9) Mɔdenle kpole boni a Alasevolɛ dɔɔnwo bɔ na bɛahɔ nyianu ngakyile ɛ, na duzu ati ɔ? (10) Kɛzi video ɛhye ɛmaa kpɔkɛ mɔɔ wɔzi la anu ɛyɛ se kɛ (a) ɛ nee ɛ mediema babɔ nu azonle Gyihova wɔ Keleseɛne nyianu bo, (b) ɛbaboa awie mɔ mɔɔ kɛhyia la, na (d) wɔava nɔhalɛlilɛ wɔaha edwɛkɛ ne wɔ mekɛ biala nee adenle biala mɔɔ ɛkɛhola la azo ɛ? (11) Adenle boni azo yɛɛ mekɛ boni a yɛbahola yɛava video ɛhye yɛali gyima wɔ daselɛlilɛ nu a?
Deɛmɔti yɛboka Keleseɛne mediemayɛlɛ ne anwo la a le kɛ yɛlɛ ɛlɔlɛ yɛmaa Gyihova. Yemɔti yɛ nye die kɛ yɛbazukoa ɔ nwo debie na yɛava yɛahilehile awie mɔ noko. Eza yɛkulo menli mɔɔ Gyihova kulo bɛ la. Saa yɛboa bɛ wɔ mekɛ mɔɔ bɛhyia la anu a, yɛ nye ɛnla kɛ Nyamenle bala yɛ ase. Emomu, yɛda Nyamenle ase ɔluakɛ yɛbu yɛ Keleseɛne mediemayɛlɛ ne kɛ ahyɛlɛdeɛ mɔɔ sonle bolɛ mɔɔ vi ye ɛkɛ a. Mekɛ mɔɔ ewiade ɛhye mɔɔ ɛlɔlɛ ɛnle nu ɛlɛba awieleɛ la, ɔrɛla ye kɛ yɛbahɔ zo yɛanyia ɛlɔlɛ yɛamaa mediema kɔsɔɔti!