‘Di Daselɛ Bɔkɔɔ’
1. Neazo kɛnlɛma boni a ɛzoanvolɛ Pɔɔlo yɛle wɔ daselɛlilɛ nwo a?
1 “Yɛ wɔ ɛzonlenlɛ gyima ne bɔkɔɔ.” (2 Tem. 4:5, Byington) Ɔda ali kɛ ɛnee ɛzoanvolɛ Pɔɔlo kola tu Temɔte folɛ ɛhye maa ɔyɛ boɛ. Nɔhalɛ nu, wɔ ɛvolɛ 47 nee 56 Y.M. avinli ɛkɛ ne, Pɔɔlo dule edwɛkpatɛlɛvolɛ adenle nsa wiele. Gyima ne ka ye fane dɔɔnwo kɛ Pɔɔlo lile “daselɛ bɔkɔɔ.” (Gyi. 23:11; 28:23) Kɛ ɔkɛyɛ na yɛayɛ bie ɛnɛ ɛ?
2. Saa yɛlɛka edwɛkɛ ne wɔ azua nu a, kɛzi yɛbahola yɛali daselɛ bɔkɔɔ ɛ?
2 Azua Nu: Amaa yɛado suamenle ne mɔ mɔɔ bɛtɛtele edwɛkpa ne la, bie a ɔhyia kɛ yɛkɔ bɛ ɛkɛ mekɛ gyɛne nu wɔ alehyenlɛ ne anu. Bie a ɔdwu nɔsolɛ nu anzɛɛ dapɛne awieleɛ a suamenle ne wɔ sua nu. Ɔwɔ kɛ yɛbɔ mɔdenle yɛ nee awie biala mɔɔ wɔ aako ne anu la tendɛ, na yɛkɔ menli mɔɔ bɛnle sua nu la ɛkɛ fane dɔɔnwo. Na saa ɛbɔ mɔdenle biala na wɔando awie ɛ? Bie a ɛkɛlɛ kɛlata anzɛɛ ɛfɛlɛ bɛ wɔ moba zo a ɔbaboa kpalɛ.
3. Adenle boni a yɛnyia yɛdi daselɛ wɔ bagua nu nee mekɛ mɔɔ yɛnle daselɛlilɛ nu la ɛ?
3 Bagua Nu Nee Mekɛ Mɔɔ Yɛnle Daselɛlilɛ Nu La: Ɛnɛ, Gyihova azonvolɛ ɛlɛmaa menli kɔsɔɔti mɔɔ tie bɛ la anwu “nrɛlɛbɛ.” Ɔdwu mekɛ ne bie a, ɛhye si wɔ “guabile ne mɔ azo” anzɛɛ “gua ne mɔ anu.” (Mrɛ. 1:20, 21) Saa yɛlɛyɛ yɛ alehyenlɛ biala gyima a, asoo yɛbɔ mɔdenle yɛdi daselɛ ɔ? Asoo yɛkola yɛka kɛ yɛfa yɛ ‘mekɛ muala yɛka edwɛkpa ne’ ɔ? (Gyi. 18:5) Saa ɔle zɔ a, ɛnee yɛlɛdi yɛ ɛzonle mɔɔ yɛlɛ kɛ ‘yɛdi daselɛ bɔkɔɔ’ la anwo gyima.—Gyi. 10:42; 17:17; 20:20, 21, 24.
4. Kɛzi asɔneyɛlɛ nee edwɛkɛ mɔɔ bɛdwenledwenle nwolɛ la boa maa yɛdi daselɛ bɔkɔɔ ɛ?
4 Noko, ɔdwu mekɛ ne bie a, sinlidɔlɛ anzɛɛ nyianezelɛ bahola amaa yeayɛ se kɛ yɛbali daselɛ. Nɔhalɛ nu, Gyihova te yɛ sinlidɔlɛ bo. (Edw. 103:14) Noko akee, saa edwɛkɛ zɛhae bie to yɛ a, yɛbahola yɛazɛlɛ ye kɛ ɔmaa yɛnyia akɛnrasesebɛ yɛva yɛdendɛ. (Gyi. 4:29, 31) Bieko, saa yɛlɛyɛ bɛtianwo debiezukoalɛ na yɛlɛdwenledwenle Nyamenle Edwɛkɛ ne anwo a, yɛbahola yɛava yɛ adwenle yɛazie bolɛ mɔɔ edwɛkpa ne sonle la azo na yɛahile nwolɛ anyezɔlɛ kpole. (Fel. 3:8) Ɛhye bamaa yɛabɔ mɔdenle yɛabɔ ye nolo!
5. Kɛ ɔkɛyɛ na yɛanyia Dwowɛle ngapezo ne anu kyɛfoa ɛ?
5 Dwowɛle ngapezo ne hanle kɛ kolaa na Gyihova kenle kpole ne mɔɔ yɛ ɛzulolɛ la ara la, Nyamenle menli ‘balua adenle biala anu’ aha edwɛkɛ ne mɔɔ bɛnrɛmaa debie biala ɛnrɛzi bɛ adenle a. (Dww. 2:2, 7-9) Ɔrɛla ye kɛ yɛbabɔ mɔdenle kpalɛ wɔ daselɛlilɛ gyima ɛhye mɔɔ bɛnrɛyɛ ye bieko la anu!