Maa Ɛ Nye Ɛlie Wɔ Ɛvɛlɛ Nwo
1. Duzu a bahola amaa mɔdenle mɔɔ yɛlɛbɔ wɔ daselɛlilɛ nu la aha aze a?
1 Bɛbɔle sonla kɛ ‘ɔlie ɔ nye wɔ ye ɛvɛlɛ nwo.’ (Nolo. 2:24) Noko akee, saa yɛannwu kɛ yɛ daselɛlilɛ ne ɛlɛso ma a, yɛ sa nu bado na yeamaa anyelielɛ nee mɔdenle mɔɔ yɛlɛbɔ la aha aze. Duzu a bahola aboa yɛ na yɛanyia nwolɛ adwenle kpalɛ ɛ?
2. Duzu ati a ɔwɔ kɛ yɛnyia kɛzi bɛtie yɛ wɔ daselɛlilɛ nu la anwo adwenle kpalɛ ɛ?
2 Fa Debie Kpalɛ Sie Ɛ Nye Zo: Kakye kɛ ɔnva nwo kɛ menli ekyi bie a diele Gyisɛse la, ye ɛzonlenlɛ gyima ne lile munli. (Dwɔn 17:4) Wɔ Gyisɛse ɛrɛlɛ ne mɔɔ fane ma ɛgualɛ ne anwo la anu, ɔhanle kɛ menli bie mɔ ɛnrɛdie Belemgbunlililɛ edwɛkɛ ne mɔɔ le kɛ ma la. (Mat. 13:3-8, 18-22) Noko akee, yɛbɔ mɔdenle a yɛkola yɛyɛ dɔɔnwo.
3. Saa bɛndie yɛ edwɛkɛhanlɛ ne kpalɛ bɔbɔ a kɛzi yɛbahola ‘yɛazo ma’ ɛ?
3 Kɛzi Yɛso Ma Dɔɔnwo La: Wɔ Gyisɛse ɛrɛlɛ ne anu, bɛdabɛ mɔɔ bɛtie edwɛkɛ ne la “so ma.” (Mat. 13:23) Saa abɛlɛ baka fifi na ɔso a, ma ne mɔɔ ɔkɛzo la ɛnle abɛlɛ baka ekyi bie, emomu, ɔle ma fofolɛ. Yemɔti ma mɔɔ Keleseɛnema mɔɔ bɔ mɔdenle so la ɛngile ɛdoavolɛma fofolɛ, emomu, ɔkile Belemgbunlililɛ ma ne mɔɔ bɛmaa ɔyɛ dɔɔnwo—Belemgbunlililɛ ne anwo edwɛkɛ mɔɔ yɛka la. Ɛhye fa ‘anyelielɛ’ ba na ɔmaa yɛnyia ahunlundwolɛ, ɔnva nwo kɛ menli tie anzɛɛ bɛndie la. Yɛlɛboa yɛamaa bɛade Gyihova duma nwo. (Aye. 43:10-12; Mat. 6:9) Yɛ nye die adenle mɔɔ yɛnyia kɛ yɛle Nyamenle agɔnwo gyimayɛvoma la anwo. (1 Kɔl. 3:9) Na ‘ɛnloanlɛ ma’ zɛhae maa Gyihova anye die.—Hib. 13:15, 16, NW.
4. Duzu a bahola avi yɛ daselɛlilɛ ne anu ara mɔɔ yɛnze a?
4 Bieko, debie kpalɛ bahola avi yɛ gyima ɛsesebɛ ne anu ara mɔɔ yɛnze a. Ɔbahola yeara ye kɛ menli bie mɔ mɔɔ diele Gyisɛse edwɛkɛ ne la anyɛ ye ɛdoavolɛma hɔkpulale kɛ ɔwiele ye azɛlɛ ye azo gyima ne la. Zɔhane ala a bie a Belemgbunlililɛ ma ne mɔɔ yɛgua la ɛnrɛfifi na ɔnrɛnyi wɔ awie ahonle nu kɔkpula mekɛ bie a, noko bie a ɔbara nɔhalɛ ne anu mɔɔ yɛnze a. Nɔhalɛ nu, yɛ daselɛlilɛ ne boa dɔɔnwo. Ɛhye ati, bɛmaa “yɛhɔ zo yɛzo ma dɔɔnwo” na yɛhile kɛ yɛle Gyisɛse ɛdoavolɛma.—Dwɔn 15:8, NW.