Dua Trate Zo Bɔ Edwɛkpa Ne Nolo
1. Kɛzi Nyamenle menli ɛva trate ɛli gyima ɛ?
1 Gyihova menli ɛlua Baebolo trate zo ɛbɔ edwɛkpa ne nolo mekɛ tendenle. Wɔ ɛvolɛ 1880, C. T. Russell nee ɔ gɔnwo mɔ bɔle ɔ bo yɛle Bible Students’ Tracts manle menli mɔɔ kenga Ɛzinzalɛ Arane ne la kɛ bɛva bɛmaa maanlema. Kɛmɔ ɛnee bɛbu trate kɛ nwolɛ hyia la ati, wɔ ɛvolɛ 1884 anu, mekɛ mɔɔ C. T. Russell yɛle mɛla adenle zo gyima mɔɔ bɛnva bɛmkpondɛ nvasoɛ na ye bodane a le kɛ ɔmaa Nyamenle Belemgbunlililɛ ne anwo ninyɛne ahɔ zo nwo ngɛlata la, bɛvale edwɛkɛkpɔkɛ “tract” bɛbokale duma ne anwo bɛyɛle ye Zion’s Watch Tower Tract Society, ɛnɛ bɛfɛlɛ ye Watch Tower and Tract Society of Pennsylvania. Ɔkadwu 1918 ne la, ɛnee Bible Sukoavoma ne ɛva trate mɔɔ bo mgbe 300 la ɛmaa. Trate tɛde debie mɔɔ yɛfa yɛdi daselɛ kpalɛ a.
2. Duzu ati a trate boa kpalɛ ɛ?
2 Deɛmɔti Ɔboa La: Nvoninli ngɛnlɛma wɔ trate ne mɔ azo. Nuhua edwɛkɛ sikalɛ ne maa bɛsukoa debie. Suamenle ne mɔ mɔɔ ɛnlie magazine anzɛɛ mbuluku la anye die nwo. Nolobɔlɛma fofolɛ nee ngakula bɔbɔ kola fa trate maa. Bieko, trate ne mɔ le ngyikyi yɛɛ ɔnyɛ se kɛ yɛbava yɛavinde.
3. Ka anwubielɛ mɔɔ wɔnyia anzɛɛ mɔɔ bɛhɛlɛ mɔɔ kile kɛ nvasoɛ wɔ trate zo la?
3 Menli dɔɔnwo dua trate zo a nwu nɔhalɛ ne a. Kɛ neazo la, raalɛ bie mɔɔ wɔ Haiti la nwunle yɛ trate ne ko wɔ gua zo. Ɔvale ɔgengale na ɔhanle kɛ “Menwu nɔhalɛ ne!” Mekɛ bie anu, ɔhɔle Belemgbunlililɛ Asalo ɛkɛ, bɛ nee ye zukoale Baebolo ne, na bɛzɔnenle ye—ɔholale ɔyɛle ɛhye amuala ɔlua Nyamenle Edwɛkɛ ne anu tumi mɔɔ wɔ trate ne anu la ati.
4. Saa yɛbava trate yɛamaa wɔ siane ne anu a, bodane boni a yɛbava yɛayɛ a?
4 Azua Nu: Kɛmɔ trate boa maa yɛdi daselɛ la ati, ɔvi November mɔɔ kɔ la, ɔyɛ a yemɔ a yɛbava yɛamaa wɔ siane ne anu a. Tɛ yɛ bodane a le kɛ yɛfa trate ne yɛamaa ala, emomu yɛbava trate yɛabɔ adwelielilɛ bo. Saa bɛkile nwolɛ anyelielɛ wɔ ɛkpɔlalɛ mɔɔ lumua la anu anzɛɛ sia kɔkpɔla nu a, yɛbahola yɛava Baebolo ne Kilehile buluku ne anzɛɛ buluku gyɛne yɛahile kɛzi bɛsukoa Baebolo ne la. Kɛzi yɛbava trate yɛamaa wɔ azua nu ɛ? Yɛlɛ trate ngakyile dɔɔnwo yemɔti ɔhyia kɛ yɛbanwu mɔɔ fɛta awie biala la.
5. Kɛzi yɛbava trate yɛamaa wɔ azua nu ɛ?
5 Ɔwɔ kɛ edwɛkɛ mɔɔ yɛbaha la nee trate mɔɔ yɛlɛfa yɛamaa la fɛta azɛlɛsinli ne mɔɔ yɛlɛyɛ nu gyima la. Yɛbahola yɛava trate yɛamaa suamenle ne yɛava yɛabɔ adwelielilɛ bo. Bie a zolɛ nvoninli kɛnlɛma ne bamaa ɔ nye alie nwolɛ. Anzɛɛ yɛbahola yɛava trate ngakyile yeahile suamenle ne na yeamaa yeaye mɔɔ ɔ nye die nwo la. Ɔle kpalɛ kɛ saa ɔkɛyɛ boɛ a yɛfa trate mɔɔ yɛlɛ bie wɔ yɛ aneɛ ne anu la yɛmaa. Saa edwɛkɛtile mɔɔ wɔ trate ne azo la le kpuyia a, yɛbahola yɛabiza ye kɛ ɔhile ye adwenle wɔ nwolɛ. Anzɛɛ yɛbahola yɛabiza ye kpuyia mɔɔ ɔ nye balie nwolɛ la yɛava yɛabɔ adwelielilɛ bo. Akee yɛbahola yɛ nee suamenle ne agenga edwɛkɛ mɔɔ wɔ trate ne anu la bie, yɛagyinla ɛleka mɔɔ kpuyia wɔ la na yɛamaa suamenle ne ahile ye adwenle. Yɛbahola yɛagenga nuhua ngɛlɛlera titile ne mɔ wɔ Baebolo ne anu. Saa yɛzuzu edwɛkɛ ne bie anwo yɛwie a, yɛbahola yɛapɛ zolɛ na yɛayɛ ngyehyɛleɛ kɛ yɛbazia yɛahɔ ɛkɛ. Saa asafo ne ta gyakyi mbuluku maa menli mɔɔ bɛnle sua nu la a, yɛbahola yɛagyakyi trate yɛado ɛleka mɔɔ awie ɛnrɛnwu ye la yeamaa suamenle mɔɔ ɔnle sua nu la.
6. Kɛzi yɛbava trate yɛamaa wɔ gua zo daselɛlilɛ nu ɛ?
6 Gua Zo Daselɛlilɛ: Wɔva trate wɔli daselɛ wɔ gua zo ɛlɛ ɔ? Menli mɔɔ yɛyia bɛ la bie mɔ kpondɛ ye ndɛndɛ na bɛngulo kɛ bɛgyinla bɛ nee yɛ di adwelie. Bie a ɔbayɛ se kɛ yɛbanwu debie mɔɔ bɛ nye die nwo la. Kɛ anrɛɛ ɛbava magazine fofolɛ wɔamaa bɛ mɔɔ ɛnze kɛ bɛkɛgenga la, duzu ati a ɛnva trate ɛmmaa bɛ ɛ? Kɛmɔ zolɛ ne le kɛnlɛma na edwɛkɛ sikalɛ a wɔ zo la ati, ɔbaha menli mɔɔ kulo kɛ nwu debie la yeamaa bɛava mekɛ ekyi mɔɔ bɛkɛnyia la bɛagenga. Nɔhalɛ nu, saa bɛmkpondɛ ye ndɛ a, yɛbahola yɛ nee bɛ azuzu trate ne anu edwɛkɛ ne bie anwo.
7. Ka anwubielɛ mɔɔ kile kɛzi bɛfa trate bɛmaa wɔ mekɛ mɔɔ yɛnle daselɛlilɛ nu la.
7 Mekɛ Mɔɔ Yɛnle Daselɛlilɛ Nu La: Ɔnyɛ se kɛ yɛbava trate yɛali daselɛ wɔ mekɛ mɔɔ yɛnle daselɛlilɛ nu la. Adiema nrenya ko fa ekyi wula ye kodoku nu wɔ mekɛ biala mɔɔ ɔlɛfinde la. Saa ɔ nee awie mɔɔ nea sotɔɔ zo la yia a, ɔka kɛ ɔmaa ye debie na ɔfa trate ɔmaa ye. Mekɛ mɔɔ agyalɛma bie hɔle New York City suakpole ne azo kɛ bɛkanlea ɛkɛ la, bɛnwunle kɛ bɛbayia menli mɔɔ vi maanle ngakyile nu la. Yemɔti bɛvale Nations buluku ne nee trate mɔɔ wɔ aneɛ ngakyile nu la bɛhɔle. Akee saa bɛte kɛ awie mɔɔ ɛlɛtɔne debie wɔ adenle ne anloa anzɛɛ awie mɔɔ de bɛ nwo ɛkɛ wɔ nwɔhoalilɛleka anzɛɛ ɛleka mɔɔ bɛtɔne aleɛ la ɛlɛka aneɛ gyɛne a, ɛnee bɛva ye sua zo aneɛ ne anu trate bɛmaa ye.
8. Adenle boni azo a trate le kɛ ma ɛ?
8 “Dua Wɔ Ma Ne”: Bɛkola bɛfa trate bɛto ma nwo. Ɛyazonlɛnli fa atiakunlukɛnlɛma gua ye ma ɔluakɛ ɔnze nuhua ne mɔɔ bafifi la. Nolobɔvo ne 11:6 ka kɛ: “Dua wɔ ma ne nwonlomɔ, na eza dua bie nɔsolɛ nu. Ɔluakɛ ɛnze mɔɔ kɛyɛ kpalɛ a, saa bɛ mu nwiɔ bɛkɛyɛ kpalɛ anzɛɛ ko kɛyɛ kpalɛ kɛdɛla ko a, ɛnze.” Ɛhye ati, bɛmaa ‘yɛhɔ zo yɛmaa nrɛlɛbɛ ɛdende’ ɔlua deɛ ɛhye mɔɔ boa maa yɛdi daselɛ la azo.—Mrɛ. 15:7.
[Edwɛkɛ mɔɔ bɛkpa wɔ mukelɛ 3]
Kɛmɔ trate boa maa yɛdi daselɛ la ati, ɔvi November mɔɔ kɔ la, ɔyɛ a yemɔ a yɛbava yɛamaa wɔ siane ne anu a