Kpuyia Ɛleka

◼ Saa yɛkulo kɛ yɛfa yɛ agyapadeɛ ne bie anzɛɛ ɔ muala yɛmaa Gyihova ahyehyɛdeɛ ne wɔ yɛ ewule nzi a, duzu a ɔwɔ kɛ yɛsuzu nwo a?

Saa menli wu a, bɛnlɛ tumi wɔ bɛ agyapadeɛ zo bieko. (Nolo. 9:5, 6) Yemɔti, bie mɔ dumua yɛ wele mɔɔ maa bɛnwu kɛzi bɛbahyɛ bɛ agyapadeɛ ne la. (2 Arl. 20:1) Mɛla adenle zo kɛlata ɛhye eza maa bɛnwu awie mɔɔ ɔbanlea yeamaa bɛahyɛ agyapadeɛ ne la. Maanle dɔɔnwo anu, saa bɛanyɛ nwolɛ kɛlata a maanle ne anu mgbanyima bahile kɛzi ɔwɔ kɛ bɛkyɛ ahenle mɔɔ ɛwu la agyapadeɛ ne la. Ɛhye ati, saa yɛkulo kɛ yɛ agyapadeɛ ne bie anzɛɛ ɔ muala kɔ Gyihova ahyehyɛdeɛ ne ɛkɛ a, ɔhyia kɛ yɛyɛ nwolɛ mɛla adenle zo kɛlata na yɛbɔ mɔdenle yɛkpa awie mɔɔ ɔbanlea yeamaa bɛahyɛ la.

Ɛzonlelilɛ kpole la awie mɔɔ bɛbakpa ye kɛ ɔnlea ɔmaa bɛhyɛ agyapadeɛ ne la anwo zo. Saa agyapadeɛ ne zonle a, nwolɛ ngɛlata mɔɔ ɔyɛ na yeanlea yeamaa bɛahyɛ la balie mekɛ. Bieko, maanle mgbanyima lɛ adehilelɛ mɔɔ bɛta bɛnea zo bɛyɛ ninyɛne ɛhye mɔ mɔɔ ɔwɔ kɛ bɛdi zo a. Tɛ awie biala mɔɔ wɔ asafo ne anu la a bahola anlea yeamaa bɛahyɛ agyapadeɛ bie kpalɛ a. Ɔwɔ kɛ yɛkpa awie mɔɔ yɛze kɛ ɔbɔ mɔdenle, yɛdie ye yɛdi na ɔlɛ ɛhulolɛ kɛ ɔbayɛ ye kɛmɔ yɛhile la.—Nea edwɛkɛ ne mɔɔ se, “The Wisdom and Benefits of Estate Planning,” mɔɔ wɔ December 8, 1998 Awake! ne anu la.

Saa Bɛka Kɛ Ɛnlea Ɛmaa Bɛhyɛ Agyapadeɛ Bie A: Saa awie ka kɛ ɛnlea ɛmaa bɛhyɛ ye agyapadeɛ wɔ ye ewule nzi a, dumua sese ye bolɛ na dua asɔneyɛlɛ zo suzu nwolɛ nea kɛ ɛbahola wɔali ɛzonlelilɛ ɛhye anwo gyima a. (Luku 14:28-32) Saa ahenle wu a, ɔwɔ kɛ ɛbɔ menli mɔɔ bɛ aluma wɔ kɛlata ne anu la amaneɛ. Akee mekɛ mɔɔ wɔnyia tumi mɔɔ maa ɛkola ɛyɛ zɔ la, ɔle wɔ gyima kɛ ɛnea ɛmaa bɛdua mɛla ne azo bɛkyɛ agyapadeɛ ne kɛmɔ bɛhile wɔ wele ne azo la. Ɔwɔ kɛ ahenle mɔɔ bɛkpa ye kɛ ɔnlea ɔmaa bɛhyɛ agyapadeɛ ne la nwu ye kɛ saa agyapadeɛ ne le kpole anzɛɛ ekyi bɔbɔ a, ɔnrɛbu ɔ nye ɔnrɛgua mɔɔ bɛhɛlɛ la azo. Debie biala mɔɔ bɛbava bɛahyɛ Watch Tower Bible and Tract Society of Ghana la le agyapadeɛ mɔɔ bɛva bɛmaa Gyihova ahyehyɛdeɛ ne a.—Luku 16:10; 21:1-4.