Nyamenle Edwɛkɛ Mɔɔ Gyɛlɛmaya Ɛha Ɛhile Yɛ
1. Buluku boni a bɛyele ye wɔ 2012 maangyeba nyianu ne abo a, na kɛzi yɛbava yɛali gyima ɛ?
1 Nea kɛzi yɛ nye liele wɔ mekɛ mɔɔ bɛyele zɔhane buluku fofolɛ ne wɔ 2010 Maangyeba Nyianu ne mɔɔ se, “Kɔ Zo Bikye Gyihova!” abo la! Buluku ɛhye ka ɛzukoalɛdeɛ mɔɔ baboa yɛ wɔ yɛ ɛbɛlabɔlɛ nu mɔɔ wɔ Gyɛlɛmaya nee Awolɛyelɛ mbuluku ne mɔ anu la anwo edwɛkɛ. (Wulo. 15:4) Bɛyɛ kɛ yɛbava yɛayɛ Asafo Baebolo Ɛzukoalɛ, na yɛbabɔ ɔ bo yɛazukoa wɔ November 5, 2012 dapɛne ne anu.
2. Duzu ati a yɛsukoa Gyɛlɛmaya nee Awolɛyelɛ mbuluku ne a, ɔbaboa yɛ ɛ?
2 Nvasoɛ Wɔ Zo Ɛnɛ: Gyɛlɛmaya mɔɔ hɛlɛle Baebolo ne anu buluku ɛhye mɔɔ vi sunsum nu la hanle ngapezo edwɛkɛ wɔ mekɛ mɔɔ ɛnee basabasayɛlɛ ɛlɛkɔ zo wɔ Dwuda la. Mɔlebɛbo ne, ɛnee ɔte nganeɛ kɛ ɔnrɛhola ye gyima ne yɛ. (Gyɛ. 1:6) Eza ɔ gɔnwo mɔ yɛɛ bie a ɔ nwo amra mɔɔ bɛvi ye sua zo Anato la kpɔle ye. (Gyɛ. 11:21, 22) Ndelebɛbo wɔ nu kɛ Gyɛlɛmaya abɛ nu bule wɔ mekɛ bie anu la. (Gyɛ. 20:14) Mekɛ mɔɔ ‘yɛlɛkɔ maanle ti nee maanle bo, yɛamaa menli arayɛ ɛdoavolɛma’ la, yɛta yɛyia ngyegyelɛ mɔɔ maa yɛte nganeɛ kɛ Gyɛlɛmaya la. (Mat. 28:19) Yɛsuzu edwɛkɛ mɔɔ ɔhanle la anwo a, ɔbaboa yɛ yeamaa yɛava akɛnrasesebɛ nee mɔdenlebɔlɛ yɛayɛ yɛ ɛzonlenlɛ gyima ne.
3. Kɛzi yɛbava Gyɛlɛmaya buluku ne anu ninyɛne bie mɔ yɛali gyima ɛ?
3 Kɛzi Bɛyɛ Ye La: Bɛhyea ngɛlɛlera titile mɔɔ ɔwɔ kɛ bɛkenga la. Kpuyia ko anzɛɛ nwiɔ mɔɔ hyia mɔɔ bɛyɛ ye bile la twe adwenle sie ɛzukoalɛdeɛ ne azo wɔ dapɛne awieleɛ biala debiezukoalɛ ne anu. Ɔwɔ kɛ bɛbiza tievolɛma kpuyia ɛhye mɔ bɛfa bɛti nu. Nvoninli ngɛnlɛma mɔɔ mediema anye balie kɛ bɛbaha nwolɛ edwɛkɛ la wɔ buluku ne anu.
4. Kɛ ɔkɛyɛ na Gyɛlɛmaya buluku ne mɔɔ yɛbazukoa la aboa yɛ kpalɛ ɛ?
4 Amaa yeaboa wɔ kpalɛ la, dumua siezie ɛ nwo. Nea kɛ ɛbanwu edwɛkɛ mɔɔ ɛbava wɔabɔ wɔ ɛbɛla nee mɔɔ ɛbava wɔahɔ daselɛlilɛ la wɔ nu. Fa ɛ nwo wula mualɛ ɛmanlɛ ne anu. Gyihova yilale Gyɛlɛmaya manle ɔyɛle ye gyima ne na ɔnyianle anyelielɛ nee ahunlundwolɛ. (Gyɛ. 15:16) Ɔrɛla ye kɛ buluku fofolɛ ɛhye mɔɔ yɛbazukoa la baboa yeamaa yɛayɛ yɛ ɛzonlenlɛ gyima ne zɔ.