Ɛkpɔsɛba Nwiɔ Mɔɔ Ɛnzonle Bolɛ

Adenle kpalɛ ko mɔɔ yɛdua zo yɛboa Belemgbunlililɛ ne la a le kɛ yɛbaye ezukoa yɛaboa ewiade amuala edwɛkɛhanlɛ gyima ne. Na saa yɛnlɛ ezukoa dɔɔnwo noko ɛ?

Mekɛ bie, Gyisɛse nwunle kɛ kunlavolɛ raalɛ ehyianli bie vale ezukoa ɛkpɔsɛba nwiɔ mɔɔ ɛnzonle bolɛ la guale ɛzonlenlɛ sua ne gya ne anu. Gyihova anwo ɛlɔlɛ mɔɔ ɔlɛ la hanle ye manle ‘ɔvale mɔɔ ɔlɛ la kɔsɔɔti ɔraguale nu.’ (Mak. 12:41-44) Gyisɛse yɛle ye nzonlɛ, na ɔhanle kɛ ye ndoboa ne sonle bolɛ kpole wɔ Nyamenle anye zo. Zɔhane ala a, ɛvoya ne mɔɔ lumua la anu Keleseɛnema ambu ye kɛ Keleseɛnema mɔ lɛ ezukoa la a ɔwɔ kɛ ye ezukoa boa ɛzonlenlɛ gyima ne a. Ɛzoanvolɛ Pɔɔlo hanle Masidoneama neazo ne anwo edwɛkɛ kɛ ‘ɛnee bɛnlɛ bie ɛdeɛ, noko bɛkpale yɛ kyɛlɛ kɛ yɛmaa bɛboa.’—2 Kɔl. 8:1-4.

Ɛhye ati, saa yɛkola yɛfa ‘ɛkpɔsɛba nwiɔ mɔɔ ɛnzonle bolɛ’ ala yɛye ndoboa a, ɔwɔ kɛ yɛkakye kɛ bɛfa ezukoa ngyikyi bɛbɔ nu a ɔyɛ ezukoa kpole. Saa yɛfi ahonle nu yɛye ezukoa a, ɔbazɔ yɛ anwuma Selɛ ne mɔɔ le atiakunlukɛnlɛma la anye, ɔluakɛ “Nyamenle kulo sonla mɔɔ te ɔ nyunlu kyɛ debie la.”—2 Kɔl. 9:7.