Boa Suamenle Ne Maa Ɔzuzu Edwɛkɛ Nwo
1. Adenle ne boni a le kpalɛ wɔ daselɛlilɛ nu a?
1 Adenle ne boni a boa kpalɛ a—edwɛkɛ mɔɔ yɛka ye kyengye kɛ bɛdie anzɛɛ suamenle ne mɔɔ yɛboa ye yɛmaa ɔsuzu edwɛkɛ nwo na ɔte ɔ bo la? Ɛzoanvolɛ Pɔɔlo boale menli manle bɛzuzule edwɛkɛ nwo wɔ mekɛ mɔɔ ɔ nee Dwuuma dendɛle wɔ Tɛsalonaeka la, na ɔlua zo “bɛ nuhua bie mɔ liele lile.” (Gyi. 17:2-4) Duzu a awie mɔ mɔɔ yɛ nee bɛ suzu edwɛkɛ nwo la kile a?
2. Saa yɛlɛbɔ edwɛkpa ne nolo yɛahile menli a, kɛzi yɛbahola yɛazukoa Pɔɔlo neazo ne ɛ?
2 Suzu Bɛ Nganeɛdelɛ Nee Mɔɔ Bɛze La Anwo: Yɛbahola yɛaboa menli mɔɔ wɔ azɛlɛsinli ne anu la yɛamaa bɛazuzu edwɛkɛ nwo a ɔwɔ kɛ yɛte bɛ nganeɛdelɛ bo. Pɔɔlo vale ninyɛne mɔɔ Gilikima mɔɔ wɔ Alɛyɔpagɛse ze la a bɔle ye edwɛkɛ ne abo a. (Gyi. 17:22-31) Yemɔti, saa ɛlɛsiezie edwɛkɛ mɔɔ ɛbaha la a, suzu ninyɛne mɔɔ azɛlɛsinli ne anu amra die di la anwo. (1 Kɔl. 9:19-22) Saa suamenle ne anlie ando nu a, bɔ mɔdenle kpondɛ edwɛkɛ mɔɔ ɔ nye die nwo la na bɛli nwolɛ adwelie.
3. Kɛ ɔkɛyɛ na yɛava kpuyia yɛali gyima kpalɛ yɛaboa awie mɔ yɛamaa bɛazuzu edwɛkɛ nwo ɛ?
3 Fa Kpuyia Di Gyima Kpalɛ: Saa yɛannwu ɛleka mɔɔ awie gyi a, yɛnrɛhola yɛnrɛhile ye ɛleka mɔɔ ɔlɛkɔ la adenle. Zɔhane ala a, yɛannwu suamenle ne adwenle a, yɛnrɛhola yɛnrɛboa ye yɛnrɛmaa ɔnrɛde edwɛkɛ bie abo a. Saa Gyisɛse nee awie ɛlɛsuzu edwɛkɛ nwo a, ɔta ɔbiza kpuyia amaa yɛanwu ahenle adwenle. Kɛ neazo la, mekɛ mɔɔ awie bizale Gyisɛse kɛ, “Duzu a menyɛ na meanyia ngoane mɔɔ ɛnlɛ awieleɛ a?” la, Gyisɛse bizale ye adwenle mɔɔ ɔlɛ wɔ nwolɛ la kolaa na yeabua. (Luku 10:25-28) Mekɛ fofolɛ anu, Pita ambua edwɛkɛ bie kpalɛ, Gyisɛse vale kpuyia lile gyima kpalɛ denrɛle ye adwenle. (Mat. 17:24-26) Yemɔti, saa suamenle ne biza kpuyia bie anzɛɛ ka edwɛkɛ mɔɔ ɔnle kpalɛ la a, yɛbahola yɛalua kpuyia zo yɛaboa ye yɛamaa yeazuzu edwɛkɛ nwo.
4. Duzu ati a ɔwɔ kɛ yɛbɔ mɔdenle yɛboa suamenle ne yɛmaa ɔsuzu edwɛkɛ nwo a?
4 Saa yɛboa suamenle ne yɛmaa ɔsuzu edwɛkɛ nwo a, yɛfa yɛsukoa Gyisɛse, Kilehilevolɛ Kpole ne yɛɛ ɛvoya ne mɔɔ lumua la anu edwɛkpakavolɛma mɔɔ bɔ mɔdenle la. Ɔmaa yɛdi suamenle ne eni na yɛbu ye. (1 Pita 3:15) Ɔlua ɛhye ati, bie a ɔbaha kɛ yɛzia yɛrɛla ye ɛkɛ.