Ɛbahola Wɔahɔ Daselɛlilɛ Wɔ Molɛ Ɔ?
1. Duzu a yɛbahola yɛazukoa yɛavi Pɔɔlo nee ɔ gɔnwo mɔ mɔɔ wɔ Felepae la nyɛleɛ ne anu a?
1 Ɛnee Dwuuma dɔɔnwo mɔɔ wɔ Felepae la die bɛ menle wɔ Ɛnwomenlelielɛ kenle ne. Pɔɔlo nee ɔ gɔnwo mɔ hɔkpɔsale suakpole ne azo wɔ bɛ edwɛkɛhanlɛ gyima ne anu. Saa bɛdabɛ noko bɛangɔ daselɛlilɛ yɛɛ bɛliele bɛ menle wɔ zɔhane kenle ne a, anrɛɛ awie ɛnrɛdendɛ ɛnrɛtia bɛ. Noko akee, ɛnee bɛze kɛ Dwuuma ne kɔyɛ asɔne wɔ suakpole ne kandiba, ɛhye ati bɛvale nwolɛ adenle ne bɛlile bɛ daselɛ. Nea kɛzi ɔbayɛ kɛ Pɔɔlo nee ɔ gɔnwo mɔ anye liele wɔ mekɛ mɔɔ Ledea diele edwɛkɛ ne na ɔmanle bɛzɔnenle ye nee ye sua nu amra amuala la! (Gyi. 16:13-15) Kɛmɔ menli dɔɔnwo die bɛ menle wɔ Molɛ la ati, duzu ati a ɛnrɛva nwolɛ adenle ne ɛnrɛli bɛ daselɛ ɛ?
2. Ngyegyelɛ boni a Gyihova menli ɛli zolɛ konim mɔɔ maa bɛkola bɛdi daselɛ wɔ Molɛ a?
2 Mɔɔ Maa Molɛ Daselɛlilɛ Yɛ Se La: Wɔ ɛvolɛ 1927 ne anu, bɛhanle bɛhilele Gyihova menli ne kɛ bɛva bɛ mekɛ ne bie bɛhɔ daselɛlilɛ wɔ Molɛ. Yeangyɛ yɛɛ ɛhye manle bɛyiale ɛkpɔlɛ a. Bɛhyele bie mɔ dɔɔnwo wɔ United States kɛ bɛanli Molɛ Ɛnwomenlelielɛ ne azo, bɛlɛgyegye adwenle, yɛɛ bɛnlɛ ninyɛne mɔɔ bɛtɔne bɛ la anwo ngɛlata. Noko Gyihova menli ne ammaa bɛ sa nu ando. Wɔ ɛvolɛ 1930 ne anu, ɛnee “bɛkyɛ bɛ nwo ekpunli ngyikyi bɛbɔ edwɛkpa ne nolo,” ɛhye maa nolobɔlɛma mɔɔ wɔ asafo mɔɔ bikye bɛ la yia nu na bɛyɛ azɛlɛsinli bie anu gyima. Mekɛ bie mɔɔ bɛhyele nolobɔlɛma ne la, ɛnee bɛ nwo zonle dɔɔnwo yemɔti ɔmanle mgbanyima ne mɔ gyakyile bɛ. Asoo ɛ nye die afɔle mɔɔ mediema ɛhye mɔ mɔɔ wɔ United States la bɔle na bɛahola bɛaha edwɛkɛ ne wɔ Molɛ mɔɔ awie ɛngyegye bɛ ko la anwo ɔ?
3. Duzu ati a Molɛ le kenle kpalɛ mɔɔ ɔwɔ kɛ yɛfa yɛkɔ daselɛlilɛ a?
3 Kenle Kpalɛ Mɔɔ Yɛfa Yɛkɔ Daselɛlilɛ La: Menli dɔɔnwo ɛngɔ gyima wɔ Molɛ. Bɛta bɛdie bɛ menle. Menli dɔɔnwo mɔɔ kɔ asɔne la anye die nwolɛ kɛ bɛbabɔ Nyamenle anwo adawu wɔ Molɛ. Saa yɛkɔ debiezukoalɛ wɔ Molɛ a, ɔkile kɛ yɛlumua yɛziezie yɛ nwo kɛ yɛwie a yɛbahɔ daselɛlilɛ, yemɔti, duzu ati a ɛnyɛ ngyehyɛleɛ kɛ ɛbalumua anzɛɛ bɛkpɔne a ɛbahɔ daselɛlilɛ a. Saa ɔbayɛ boɛ a, fa aleɛ ekyi mɔɔ ɛbali la sia ɛ nwo.
4. Saa yɛfa mekɛ ne bie yɛkɔ daselɛlilɛ wɔ Molɛ a, anyelielɛ boni a yɛbanyia a?
4 Saa yɛfa mekɛ ne bie yɛkɔ daselɛlilɛ wɔ Molɛ a, yɛbahola yɛanyia adenle yɛalie yɛ ɛnwomenle kpalɛ. Saa yɛyɛ ɛzonlenlɛ gyima ne bie a, ɔmaa yɛnyia ɛnwomenlelielɛ kpalɛ. (Mrɛ. 19:23) Saa yɛnyia awie mɔɔ le kɛ Ledea la a, ɔbamaa yɛ nye alie!