Ngakyelɛlilɛ Ne Bali Menli Daselɛ Kpole
1. Saa yɛye ɛdendɛlɛ ne yɛsie ahane a, duzu bieko a bali menli mɔɔ bara Ngakyelɛlilɛ ne bie la daselɛ a? Kilehile nu.
1 Kenlenzu? Nɔsolɛ ne mɔɔ bɛbayɛ Ngakyelɛlilɛ ne la. Yemɔti, yɛbabɔ mɔdenle yɛado ɛsalɛ yɛavɛlɛ menli dɔɔnwo yɛamaa bara bie. Tɛ mɔɔ nyɛvolɛ ne mɔ bɛade la angome a bamaa bɛ nye alie a. Mekɛ mɔɔ raalɛ bie hɔle Ngakyelɛlilɛ ne bie abo la, ɔhanle ninyɛne titile mɔɔ ɔnwunle ye la anwo edwɛkɛ—agɔnwolɛvalɛ mɔɔ bɛda ye ali yɛɛ sua kɛnlɛma mɔɔ menli mɔɔ ɛdu bɛ nwo ɛmaa ɛziezie nuhua ɛmaa yeyɛ kɛnlɛma la lile ye daselɛ kpole. Ɛhye ati, tɛ tendɛvolɛ ne angomekye, emomu yɛ muala yɛbɔ nu yɛdi daselɛ wɔ gyimalilɛ titile mɔɔ wɔ ɛvolɛ ɛhye anu la anwo.—Ɛfɛ. 4:16.
2. Kɛzi yɛ nuhua ko biala bahola ali nyɛvolɛ daselɛ ɛ?
2 Fa Anyelielɛ Yɛ Nyɛvolɛ Akoaba: Saa yɛsele, yɛte yɛ nyunlu yɛsoma nyɛvolɛ na yɛyɛ bɛ akoaba a, ɔbali bɛ daselɛ kpole. (Dwɔn 13:35) Saa wɔangola ɛ nee awie biala andendɛ bɔbɔ a, ɛbahola wɔazoma bɛ na wɔabɔ wɔ duma wɔahile menli mɔɔ bɛde ɛ nwo ɛkɛ ne la. (Hib. 13:1, 2) Bɔ mɔdenle bikye nyɛvolɛ mɔɔ bɛnze awie wɔ ɛkɛ la. Bie a ɛsalɛdolɛ ne anu a bɛhanle bɛhilele bɛ kɛ bɛrɛla bie a. Ɛbahola wɔabiza bɛ kɛ, “Kenle mɔɔ lumua mɔɔ wɔra ɛke la ɛ?” Maa bɛdɛnla ɛ nwo ɛkɛ na maa bɛde kɛ ɛbabua kpuyia biala mɔɔ bɛkɛbiza la. Saa ɔwɔ kɛ bɛ asafo ne fi ɛkɛ ne ndɛndɛ na asafo fofolɛ ahola ayɛ bɛ ɛdeɛ a, ɛbahola wɔaha kɛ: “Mekulo kɛ menwu kɛzi ɛnwunle gyimalilɛ ne la. Mebahola meanwu wɔ wɔ ni?”
3. Kɛzi ɔwɔ kɛ yɛyɛ menli mɔɔ bɛyɛ bɛtɛɛ la akoaba ɛ?
3 Yɛ Menli Mɔɔ Bɛyɛ Bɛtɛɛ La Akoaba: Kpolerazulɛ biala ɛnle nwolɛ kɛ menli mɔɔ bɛyɛ bɛtɛɛ nee menli mɔɔ Ngakyelɛlilɛ ne ala a bɛkɔ ye ɛvolɛ biala la bara bie. Yɛ bɛ akoaba na maa bɛnwu kɛ ɛ nye ɛlie kpalɛ kpalɛ kɛ bɛra bie la. (Wulo. 15:7) Bɛwie gyimalilɛ ne a ɔnrɛhyɛ mgbanyima bahola ahɔ bɛ sua nu na bɛaboa bɛ kɛ bɛzia bɛrɛla debiezukoalɛ bieko. Yɛ asɔneyɛlɛ a le kɛ Ngakyelɛlilɛ ne baha menli dɔɔnwo mɔɔ bara bie la yeamaa bɛaye Nyamenle ayɛlɛ, tɛ edwɛkɛ mɔɔ bɛbade la angome, emomu, ‘kɛmɔ bɛnwu yɛ nyɛleɛ kpalɛ ne la ati ɔ.’—1 Pita 2:12.