Kɛlata Mɔɔ Vi Neazo Eku Ne Ɛkɛ
Yɛ Mediema Gyihova Alasevolɛ:
Yɛde anyelielɛ mekɛ nu! Fɛlɛko ɛyi yɛ tɛkɛɛ! Nɔhalɛ nu, yɛ nye die kɛ yɛ nee bɛ ‘ɛbɔ nu ɛlɛsonle’ na yɛali Gyihova yɛ anwuma Selɛ ne anwo daselɛ kpole a.—Zɛf. 3:9; Dwɔn 14:12.
Anyelielɛ mɔɔ yɛlɛfa yɛazonle Gyihova la ɛngile kɛ yɛnyia ngyegyelɛ. Wɔ ɛzonlenlɛ ɛvolɛ ne mɔɔ ɛpɛ nu la anu, azɛlɛkpusulɛ, azuyilɛ, ahumuakyima, nee esiane ngakyile ɛmaa bɛ nuhua bie mɔ ɛnwu amaneɛ dɔɔnwo. (Mat. 24:7) Anwodolɛ nee mgbanyinliyɛlɛ noko maa bɛ nuhua dɔɔnwo fɛ alehyenlɛ biala. Yɛ muala yɛyia ngyegyelɛ mɔɔ ɛlɛyɛ kpole mɔɔ le kɛ “awolɛ nyane ɛdelɛ bo ɛbɔlɛ” la. (Mat. 24:8) Wɔ maanle dɔɔnwo mɔɔ Armenia, Eritrea,yɛɛ South Korea boka nwo la anu, bɛva yɛ mediema dɔɔnwo bɛgua efiade ɔlua bɛ diedi ti.—Mat. 24:9.
Duzu a ɛmaa yɛva adwenle kpalɛ yɛgyinla ngyegyelɛ ɛhye mɔ amuala anu a? Yɛ ɛvolɛ 2010 edwɛkɛ ne hakyele yɛ debie ko mɔɔ anwo hyia kpalɛ la: ‘Ɛlɔlɛ abotane bo ɛndu ɛlɛ. Ɛlɔlɛ ɛmbɔ aze ɛlɛ.’ (1 Kɔl. 13:7, 8) Ɛhɛe, ɛlɔlɛ mɔɔ yɛlɛ yɛmaa yɛ mediema nee Gyihova la boa yɛ maa yɛgyinla kpundii.
Edwɛkɛhanlɛ gyima ne mɔɔ yɛyɛ ye dahuu la si menli mɔɔ ka kɛ bɛle Keleseɛnema la anu dɔɔnwo anwo. Ɔwɔ nuhua kɛ bɛnlie yɛ diedi nee yɛ ngilehilelɛ ne bɛndo nu ɛdeɛ, noko bɛ nuhua bie mɔ ka kɛ, “Bɛdabɛ a bɛlɛyɛ gyima mɔɔ ɔwɔ kɛ yɛyɛ la a!” Duzu a boa Gyihova Alasevolɛ maa bɛka edwɛkɛ ne dahuu a? Ɛlɔlɛ ɔ. Yɛle kɛ yɛ anwuma Selɛ ne la, yɛngulo kɛ bɛsɛkye awie biala. (2 Pita 3:9) Nolobɔlɛma 7,508,050 mɔɔ le dodo mɔɔ tɛla biala mɔɔ yɛnyianle ye ɛkenle ɛvolɛ ne la di daselɛ kɛ yɛkulo kɛ awie biala nu ɔ nwo. Ɛzonlenlɛ boni bieko a wɔ ɛkɛ ne mɔɔ nuhua azonvolɛ dɔɔnwo fi ɛlɔlɛ nu tu bɛ nwo maa ka edwɛkɛ ne a?
Ayezaya ngapezo ne mɔɔ ɛlɛkɔ zo ara nu la maa yɛ anwosesebɛ: “Ɔbara kɛ mekɛ ne mɔɔ li awieleɛ la, boka ne mɔɔ [Gyihova] Ɛzonlenlɛ Sua ne gyi zolɛ la bayɛ boka mɔɔ wale tɛla boka biala; bɛbamaa ye zo wɔ awoka kɔsɔɔti avinli, na maanle maanle kɔsɔɔti banriandi ahɔ zo.” (Aye. 2:2-4) Menli 294,368 ne mɔɔ bɛzɔnenle bɛ ɛkenle ɛvolɛ ne la boka menli dɔɔnwo ne mɔɔ ɛlɛnriandi ara Gyihova sua nu la anwo. Yɛyɛ mediema ɛhye mɔɔ sonle bolɛ maa yɛ la kɔsɔɔti akoaba kɛ bɛraboka yɛ abusua ne anwo a. Ɔrɛla ye kɛ ɛlɔlɛ mɔɔ yɛlɛ kɛ Keleseɛnema la baha yɛ amaa yɛaboa bɛ yeamaa bɛahoati yɛ kpɔvolɛ Seetan Abɔnsam ngane ne mɔ.—1 Pita 5:8, 9.
Menli 18,706,895 mɔɔ bɛ dodo tɛla biala mɔɔ rale Ngakyelɛlilɛ ne mɔɔ yɛyɛle ye Dwɛkɛ, March 30, 2010 la kile kɛ menli dɔɔnwo wɔ ɛkɛ ne mɔɔ bɛbahola bɛaraboka yɛ yɛazonle Gyihova a. Nea kɛzi yɛ nye die kɛ Gyihova ɛtɛsɛkyele ɛtane ewiade ɛhye a! Ɛlɔlɛ mɔɔ yɛlɛ la boa yɛ maa yɛgyinla kpundii.—2 Tɛs. 3:5.
“Kɔ Zo Bikye Gyihova!” Maangyeba Nyianu ne mɔɔ bɛyɛle nuhua dɔɔnwo ne ala wɔ 2010 anu wɔ ewiade amuala la ɛmaa yɛmia agɔnwolɛvalɛ mɔɔ yɛ nee yɛ anwuma Selɛ, Gyihova lɛ la anu kpalɛ. Edwɛndolɛnli ne edwɛkɛ ne le nɔhalɛ bɔkɔɔ kɛ: “Nyilalɛ ɛha menli mɔɔ [Gyihova] le bɛ Nyamenle la!” (Edw. 144:15) Ɔnva nwo mɔɔ bazi kenlebie la, yɛlɛ anwodozo kɛ saa Gyihova wɔ yɛ afoa a, yɛnrɛzulo debie biala. (Edw. 23:4) Ɔnrɛhyɛ Gyihova balua ɔ Ra ne anwo zo yeazɛkye “Abɔnsam gyima biala mɔɔ yeli la.” (1 Dwɔn 3:8) Nɔhalɛ nu, yɛ kunlu a anrɛɛ mekɛ zɔhane ɛra! Noko yɛlɛ gyima dɔɔnwo yɛyɛ wɔ mekɛ ɛhye anu.—1 Kɔl. 15:58.
Yɛmaa bɛade kɛ ‘dahuu yɛkakye bɛ’ wɔ yɛ asɔneyɛlɛ nu. (Wulo. 1:9) Bɛhɔ zo “bɛzie bɛ nwo wɔ Nyamenle ɛhulolɛ ne anu bɛhendɛ ngoane ne mɔɔ ɛnlɛ awieleɛ, mɔɔ anwunvɔnezelɛ nu ala Awulae Gyisɛse Kelaese bava amaa bɛ la.”—Dwu. 21.
Yɛkulo bɛ muala!
Bɛ mediema,
Gyihova Alasevolɛ Neazo Eku