Ɛnee Ɛle Dahuu Adekpakyelɛnli Ɔ?
1. Nwolɛ adenle boni a menli dɔɔnwo ɛnyia a, na duzu a ɔwɔ kɛ bie mɔ noko yɛ a?
1 Menli apenle apenle ɛnyia nwolɛ adenle kɛ ‘bɛbahilehile na bɛabɔ edwɛkpa ne nolo’ kɛ dahuu azonvolɛ wɔ ɛvolɛ dɔɔnwo anu. (Gyi. 5:42) Noko, ɛnee ɔwɔ kɛ bie mɔ gyakyi adekpakyelɛ gyima ne ɔlua ninyɛne bie mɔ ati. Saa ɛnee ɛle dahuu adekpakyelɛnli a, asoo wɔzuzu tɛnlabelɛ mɔɔ ɛwɔ nuhua kɛkala la anwo wɔnwu kɛ ɛbahola wɔazia wɔayɛ adekpakyelɛ gyima ne bieko ɔ?
2. Duzu ati a ɔwɔ kɛ menli mɔɔ yɛle adekpakyelɛ gyima ne bie la sia suzu bɛ tɛnlabelɛ mɔɔ bɛwɔ nu kɛkala la anwo ɛ?
2 Tɛnlabelɛ Ne Kakyi: Ɔbahola yeara ye kɛ tɛnlabelɛ mɔɔ manle ɛgyakyile adekpakyelɛ gyima ne la ɛnle ɛkɛ bieko. Kɛ neazo la, saa ɛnee ɛngola ɛnnyia wɔ dɔnehwele 90 ne wɔ siane biala anu la ati a ɛgyakyile a, asoo ɛbahola wɔayɛ bie wɔ kɛkala mɔɔ bɛde zolɛ bɛra 70 la ɔ? Ɛnva mekɛ dɔɔnwo ɛnyɛ gyima anzɛɛ wɔ abusua nu ɛzonlelilɛ zo ɛde ɔvi mekɛ mɔɔ ɛgyakyile adekpakyelɛ gyima ne la ɔ? Adiema raalɛ ko mɔɔ ye kpɔkɛdelɛ ti ɔgyakyile adekpakyelɛ gyima ne la holale ziale yɛle adekpakyelɛnli bieko wɔ mekɛ mɔɔ ɛnee yeli ɛvolɛ 89 la. Ɛnee yebo ɛvolɛ ko mɔɔ ɔtɛkɔle asopiti ɛlɛ a, na ɔnwunle kɛ ye kpɔkɛdelɛ bamaa yeahola yeayɛ adekpakyelɛ gyima ne bieko.
3. Kɛzi abusua ne anu amra bahola aboa bɛ nuhua ko bɛamaa yeayɛ adekpakyelɛnli ɛ?
3 Bie a ɛnee ɛnle adekpakyelɛnli, noko awie wɔ abusua ne anu mɔɔ ɔgyakyile adekpakyelɛ gyima ne kɛ ɔnea abusua ne anu sonla bie mɔɔ le kɛ, awovolɛ mɔɔ ɛyɛ kpanyinli la. (1 Tem. 5:4, 8) Saa zɔhane a ɔde a, asoo ɛdawɔ anzɛɛ abusua ne anu menli gyɛne bahola aboa ye ɔ? Duzu ati a bɛmbɔ nu bɛnzuzu edwɛkɛ nwo ɛ? (Mrɛ. 15:22) Saa abusua ne anu amra ka bɛ nwo bɔ nu maa bɛ nuhua ko yɛ adekpakyelɛnli a, bɛ nye balie kɛ bɛyɛle ye zɔ la.
4. Saa ɛnrɛhola adekpakyelɛ gyima ne bie yɛ kɛkala a, duzu a ɛbahola wɔayɛ a?
4 Saa wɔ tɛnlabelɛ ne ɛmmaa ɛngola ɛnyɛ adekpakyelɛ gyima ne bieko kɛkala a, mmamaa ɛ sa nu to. Gyihova anye die ɛhulolɛ mɔɔ wɔnyia kɛ ɛbayɛ bie la anwo. (2 Kɔl. 8:12) Fa anwubielɛ mɔɔ ɛnyianle ye wɔ mekɛ mɔɔ ɛnee ɛle adekpakyelɛnli la di gyima wɔ daselɛlilɛ nu. Yɛ ɛhulolɛ mɔɔ wɔnyia kɛ ɛbayɛ adekpakyelɛ gyima ne bie la anwo asɔne, na bɔ mɔdenle yɛ nzenzaleɛ wɔ wɔ tɛnlabelɛ ne anu. (1 Dwɔn 5:14) Wɔannea a, ɔbadwu mekɛ bie la, Gyihova bamaa ‘gyima bedevinli bie mɔɔ anwo hyia la anye arala ɛkɛ’ amaa wɔanyia anyelielɛ wɔ adekpakyelɛ gyima ne anu bieko!—1 Kɔl. 16:9.