Gyima Mɔɔ Yɛ Anyelielɛ Kpalɛ
1. Sunsum nu ayileyɛlɛ gyima boni a ɛlɛkɔ zo ɛnɛ a?
1 Menli mɔɔ nwunle menli mɔɔ ɛnde kpɔkɛ mɔɔ bɛyɛle bɛ ayile wɔ ɛvoya ne mɔɔ lumua anu la anye liele kpalɛ. (Luku 5:24-26) Ɛnɛ, yɛ nye die sunsum nu ayileyɛlɛ gyima ne anwo. (Yek. 22:1, 2, 17) Nea anyelielɛ mɔɔ ɔyɛ kɛ yɛkɛde menli mɔɔ Gyihova Edwɛkɛ ne nee ye sunsum nwuanzanwuanza ne ɛhakyi bɛ ɛbɛlabɔlɛ la anwubielɛ ne mɔ a! Noko akee, mɔɔ yɛ anyelielɛ kpalɛ la a le kɛ yɛkɛlua Baebolo ɛzukoalɛ mɔɔ nyia anyuhɔlɛ la azo yɛkɛyɛ gyima ɛhye bie la.
2. Saa yɛlɛkilehile awie nɔhalɛ ne a anyelielɛ boni a yɛbahola yɛanyia a?
2 Nyamenle duma a le duzu? Duzu ati a ɔmaa amaneɛnwunlɛ nwo adenle ɛ? Duzu a Nyamenle Belemgbunlililɛ ne bayɛ amaa alesama a? Yɛ nye die kɛ yɛkɛye kpuyia ɛhye mɔ anloa, noko eza yɛ nye die wɔ mekɛ mɔɔ yɛkɛnwu kɛ sukoavo ne anye ɛlie nɔhalɛ ne mɔɔ ɔlɛsukoa anwo la. (Mrɛ. 15:23; Luku 24:32) Mekɛ mɔɔ sukoavo ne ɛlɛnyia anyuhɔlɛ la, ɔbahola yeabɔ ɔ bo yeava Gyihova duma yeavɛlɛ ye, yeayɛ nzenzaleɛ wɔ ye tɛladeɛ nee ye anwoziezielɛ nu, yeagyakyi ninyɛne mgbane mgbane ɛyɛlɛ na yeabɔ ɔ bo kɛ ɔdi awie mɔ daselɛ. Saa ɔnyia anyuhɔlɛ na ɔyila ɔ nwo zo na bɛsɔne ye a, ɔbayɛ yɛ diema nee yɛ gɔnwo gyimayɛvolɛ. Saa awie yɛ ninyɛne ɛhye mɔ biala mɔɔ hyia mɔdenlebɔlɛ la a ɔwɔ kɛ ɔmaa yɛ nye die.—1 Tɛs. 2:19, 20.
3. Ninyɛne boni mɔ a yɛbahola yɛayɛ yɛava yɛabɔ Baebolo ɛzukoalɛ bo a?
3 Ɛbahola Wɔayɛ Bie Ɔ? Saa ɛkulo kɛ ɛyɛ gyima ɛhye mɔɔ yɛ anyelielɛ kpalɛ la bie a, sɛlɛ Gyihova kɛ ɔmaa ɛnyia adenle ɛyɛ Baebolo ɛzukoalɛ, na akee di wɔ asɔneyɛlɛ ne anwo gyima. (1 Dwɔn 5:14) Di daselɛ wɔ ɛleka nee mekɛ mɔɔ ɛkɛnyia menli la. Mekɛ biala mɔɔ fɛta la anu, buke Baebolo ɛzukoalɛ nwo adenle. (Nolo. 11:6) Saa ɛnyia awie mɔɔ anye die edwɛkɛ ne anwo na ɛdua nɔhalɛ ma ne a, sia kɔ na gugua zolɛ nzule.—1 Kɔl. 3:6-9.
4. Kɛmɔti a ɔwɔ kɛ yɛmaa ɔkyia yɛ ndɛndɛ kɛ yɛbayɛ Baebolo ɛzukoalɛ ɛ?
4 Menli dɔɔnwo tɛbɔ ɛkɛ mɔɔ tenleneyɛlɛ nwo ɛhɔne nee nzuhɔne ɛlɛku bɛ a. Nwane mɔ a nee bɛ bayɛ Baebolo ɛzukoalɛ na ɔlua zo bɛali bɛ sunsum nu ngyianlɛ nwo gyima a? (Mat. 5:3, 6) Bɛmaa yɛvi yɛ ɛhulolɛ nu yɛdu yɛ nwo yɛmaa kɛ yɛboa yɛamaa bɛawie daselɛlilɛ nee ɛdoavolɛyɛlɛ gyima ne kolaa na bɛyɔba ne ara ye awieleɛ.—Aye. 6:8.