Kpuyia Ɛleka
◼ Ninyɛne boni a yɛbahola yɛayɛ yɛava yɛaboa adekpakyelɛma ɛ?
Wɔ 2009 ɛzonlenlɛ ɛvolɛ ne anu, mediema mrenya nee mraalɛ kɛyɛ 800,000 zonlenle kɛ dahuu nee adekpakyelɛma titile wɔ ewiade amuala. Dahuu azonvolɛ ɛhye mɔ fa bɛ mekɛ, bɛ anwosesebɛ yɛɛ bɛ nwonane afoa nu ninyɛne bɔ afɔle amaa bɛadɛlɛ Belemgbunlililɛ edwɛkpa ne anu. (Mrɛ. 3:9) Nea kɛzi bɛ mɔdenle ne sɔ Gyihova anye a! Ndenle boni azo a yɛbahola yɛala Gyihova adwenle ne bie ali na yɛamaa bɛ nye alie amaa bɛahɔ zo bɛayɛ bɛ adekpakyelɛ gyima ne ɛ?
Asoo ɛka adekpakyelɛ gyima ne anwo edwɛkɛ kpalɛ? Kenlenzu a ɛhanvole adekpakyelɛma wɔ bɛ anwofamaa ne anwo a? Nɔhalɛ nu, edwɛkɛ kpalɛ mɔɔ yɛbaha yɛahile bɛ la bɛamaa bɛ anwosesebɛ yeamaa bɛahɔ zo bɛazonle kɛ adekpakyelɛma. (Mrɛ. 25:11) Asoo yɛbahola yɛayɛ yɛ ngyehyɛleɛ kpalɛ wɔ dapɛne ne anu amaa yɛ nee bɛ ahɔ daselɛlilɛ ɔ? Adekpakyelɛma anye die nwolɛ titile kɛ bɛkɛnyia awie mɔɔ nee bɛ kɛyɛ gyima wɔ mekɛ mɔɔ nolobɔlɛma ekyi bie a wɔ daselɛlilɛ nu la. (1 Kɔl. 13:5; Fel. 2:4) Yɛbahola noko yɛahile kɛ yɛ nye die mɔdenle mɔɔ bɛlɛbɔ la anwo, ɔlua ɛyɛvolɛyɛlɛ subane mɔɔ yɛbala ye ali na ɔdwu mekɛ ne bie a yɛado ɛsalɛ yɛavɛlɛ adekpakyelɛma yɛamaa bɛarali debie wɔ yɛ sua nu la azo. (1 Pita 4:8, 9) Yɛbahola yɛavi yɛ ɛhulolɛ nu yɛaboa bɛ yɛamaa bɛadua kakɛ mɔɔ bɛkɛbɔ wɔ daselɛlilɛ nu la, anzɛɛ yɛaboa bɛ wɔ ndenle ngakyile mɔɔ yɛbahola la azo.—Fa to 1 Tɛsalonaekama 5:13 anwo.
Ngɛlɛlera ne maa yɛnyia anwodozo kɛ Gyihova bamaa bɛdabɛ mɔɔ bɛfa Belemgbunlililɛ ne bɛdumua la asa aha mɔɔ bɛhyia la. (Edw. 37:25; Mat. 6:33) Yɛ Keleseɛne mediemayɛlɛ ne mɔɔ ɛlɔlɛ wɔ nu la a le adenle ko mɔɔ Gyihova dua zo yɛ ɛhye a. (1 Dwɔn 3:16-18) Nɔhalɛ nu, adekpakyelɛma anye ɛnla kɛ awie mɔ badua bɛ kakɛ mɔɔ bɛbɔ la amaa bɛ. Yɛɛ bɛnrɛha bɛnrɛhile awie mɔ ndɛndɛ ne ala kɛ bɛhyia moalɛ. Noko akee, saa yɛgua yɛ nye aze yɛnea ninyɛne boɛ a, yɛbahola yɛaboa adekpakyelɛma ɛhye mɔ mɔɔ di nɔhalɛ mɔɔ ‘bɛnlɛ bie’ la wɔ ndenle kpalɛ zo.— 2 Kɔl. 8:14, 15.
Mekɛ mɔɔ Fobi, mɔɔ le edwɛkpakavolɛ mɔɔ bɔ mɔdenle wɔ ɛvoyia ne mɔɔ lumua la Sɛnkilia Asafo ne anu hɔle Wulomu la, Pɔɔlo manle mediema mɔɔ wɔ Wulomu la anwosesebɛ kɛ: “Bɛlie ye wɔ Awulae duma nu, kɛ bɛkɛlie Nyamenle menli ne mɔ bie ala la, na bɛmaa ye moalɛ biala mɔɔ ɔkɛhyia nwolɛ la.” (Wulo. 16:1, 2) Yɛlɛ nwolɛ adenle yɛda ɛlɔlɛ ko ne ala ali yɛkile menli mɔɔ wɔ yɛ asafo ne anu mɔɔ bɛlɛbɔ edwɛkpa ne nolo mekɛ biala kɛ dahuu nee adekpakyelɛma titile la.—Gyi. 5:42.