Nzoleɛ Ɛbolo Mɔɔ Ɔwɔ Kɛ Bɛbu A
1. Gyima mɔɔ hyia la boni a ɛlɛkɔ zo kpalɛ a?
1 Mekɛ mɔɔ Gyisɛse lile Samɛlea raalɛ ne daselɛ wiele la, ɔhanle ɔhilele ye ɛdoavolɛ ne mɔ kɛ: “Bɛdo bɛ nye bɛnlea ɛya nu lɔ boɛ; nzoleɛ ɛbolo, na yedwu mɔɔ ɔwɔ kɛ bɛbu a.” (Dwɔn 4:35, 36) Ɛnee bɛlɛbɔ sunsum nu bɛyɔba ɛbulɛ bo, na ɛnee Gyisɛse kola nwu kɛzi gyima ne bahɔ zo wɔ ewiade amuala la. Kɛkala mɔɔ Gyisɛse wɔ anwuma la, ɔ nye tɛdie bɛyɔba ɛbulɛ gyima ne anwo. (Mat. 28:19, 20) Mekɛ mɔɔ gyima ɛhye ɛlɛkɔ ye awieleɛ la, duzu ninyɛne a kile kɛ ɔlɛkɔ zo kpalɛ a?
2. Anyuhɔlɛ boni a kile kɛ ewiade amuala bɛyɔba ɛbulɛ gyima ne ɛlɛkɔ zo kpalɛ a?
2 Ewiade Amuala Bɛyɔba Ɛbulɛ: Wɔ 2009 ɛzonlenlɛ ɛvolɛ ne anu, nolobɔlɛma mɔɔ wɔ ewiade amuala la dodo hɔdwule ɛya ko ngyɛnu 3.2. Bɛnyianle anyuhɔlɛ ɛya ko ngyɛnu 14 wɔ maanle ngakyile mɔɔ bɛva bɛ sa bɛdo gyima ne azo la anu. Sua nu Baebolo ɛzukoalɛ mɔɔ bɛbule nwolɛ mgbonda siane biala la ɛnee bo 7,619,000—menli dodo ɛhye ɛnee tɛla nolobɔlɛma mɔɔ bule mgbonda la, yɛɛ ɔtɛla Baebolo ɛzukoalɛ mɔɔ bɛyɛle ye 2008 anu la ɛdeɛ ne azo kɛyɛ mgbe foa ko. Kɛmɔ gyima ne ɛlɛnyia anyuhɔlɛ wɔ ɛleka dɔɔnwo la ati, maanle dɔɔnwo anu amra ɛlɛsɛlɛ kɛ bɛhyia edwɛkpatɛlɛvolɛma mɔɔ bɛtete bɛ wɔ Gilead la dɔɔnwo. Azɛlɛsinli mɔɔ bɛka aneɛ gyɛne wɔ nu la ɛlɛnyia anyuhɔlɛ dɔɔnwo wɔ maanle ngakyile zo. Ɔda ali kɛ Gyihova ɛlɛmaa yeayɛ zɔ ndɛndɛ wɔ mekɛ mɔɔ bɛyɔba ɛbulɛ ne ɛlɛkɔ ye awieleɛ la. (Aye. 60:22) Asoo ɛlɛ wɔ “ɛya” ne anwo subane kpalɛ ɔ?
3. Duzu a bie mɔ bɛahola aha avane bɛ ɛkɛ ne bɛyɔba ɛbulɛ ne anwo a?
3 Wɔ Ɛkɛ Ne Bɛyɔba: Bie baha kɛ, “me azɛlɛsinli ne ɛnzo ma kpalɛ.” Ɔle nɔhalɛ kɛ azɛlɛsinli ne bie mɔ ɛnzo ma kɛ bie mɔ anzɛɛ kɛ ɛnee ɔde wɔ mɔlebɛbo ne la. Bie a Alasevolɛ bie mɔ bɛaha kɛ menli mɔɔ badie edwɛkɛ ne wɔ bɛ azɛlɛsinli ne anu la ɛde ye dɛbadɛba na mɔɔ yeha la a le kɛ bɛbakpondɛ menli ekyi mɔɔ ɛha na bɛtɛtele edwɛkɛ ne la. Asoo ɔle zɔ?
4. Subane kpalɛ boni a ɔwɔ kɛ yɛnyia ye wɔ yɛ ɛzonlenlɛ gyima ne anwo a, na duzu ati ɔ?
4 Ɔvi bɛyɔba gyima mɔlebɛbo kɔdwu ye awieleɛ, bɛnye bɛ sa bɛnvi nwolɛ. Yɛ Gyisɛse edwɛkɛ ɛhye mɔɔ hyia la nzonlɛ: “Nyamenle bɛyɔba ne ɛbolo kpole, na menli mɔɔ bu la le ekyi. Zɔhane ati bɛzɛlɛ egyinli menle ne kɛ ɔkɛva gyimayɛvoma dɔɔnwo ɔkɛmaa bɛkɛhɔbu bɛyɔba ne.” (Mat. 9:37, 38) Gyihova, bɛyɔba Menle ne a kile ɛleka nee mekɛ mɔɔ nzoleɛ bara a. (Dwɔn 6:44; 1 Kɔl. 3:6-8) Yɛ gyima a le boni? Baebolo ne ye ɔ nloa kɛ: “Dua wɔ ma ne nwonlomɔ, na eza dua bie nɔsolɛ nu,” mmaye ɛ sa ɛfi nwolɛ. (Nolo. 11:4-6) Ɛhye ati, saa bɛyɔba ne ɛbulɛ ɛlɛkɔ ye awieleɛ a ɔnle kɛ yɛye yɛ sa yɛfi nwolɛ!
5. Duzu ati a ɔwɔ kɛ yɛkɔ zo yɛfa mɔdenlebɔlɛ yɛka edwɛkɛ ne wɔ azɛlɛsinli mɔɔ ɛnzo ma la anu a?
5 Bɛhɔ Zo Bɛbu Bɛyɔba Ne: Saa yɛta yɛyɛ yɛ azɛlɛsinli ne anu gyima na ɔnzo ma kpalɛ a, adwenle kpalɛ bie ati ɔwɔ kɛ yɛfa mɔdenlebɔlɛ yɛyɛ gyima ne ndɛndɛ. (2 Tem. 4:2) Ninyɛne ɛzulolɛ mɔɔ ɛlɛsisi ewiade ye anu la maa menli kakyi bɛ subane na bɛdwenle bɛ kenlebie anwo dɔɔnwo. Mekɛ mɔɔ ngakula ɛlɛyɛ mgbanyinli la, bɛnwu kɛ ɔhyia kɛ bɛnyia anzondwolɛ nee anwobanebɔlɛ. Saa yɛangyakyi na yɛkɔ zo a, ɔbamaa awie mɔ anye alie nwo. Ɛhɛe, menli mɔɔ ɛndie edwɛkɛ ne ɛnɛ la badie ye kenlebie. Ɔwɔ kɛ yɛbɔ menli bɔbɔ mɔɔ bɛ bodane a le kɛ bɛnrɛdie edwɛkɛ ne la kɔkɔ.—Yiz. 2:4, 5; 3:19.
6. Saa yɛ azɛlɛsinli ne anu gyimayɛlɛ yɛ se a, duzu a baboa yɛ na yɛahɔ zo yɛava mɔdenlebɔlɛ yɛayɛ yɛ gyima ne a?
6 Saa yɛ azɛlɛsinli ne anu gyimayɛlɛ yɛ se a, duzu a baboa yɛ yeamaa yɛahɔ zo yɛava mɔdenlebɔlɛ yɛayɛ gyima ne a? Yɛbahola yɛali daselɛ wɔ ɛleka mɔɔ bɛdi gua anzɛɛ telefuu zo yɛaboka azua nu daselɛlilɛ ne anwo. Anzɛɛ yɛbahola yɛahakyi edwɛkɛ mɔɔ yɛka yɛkile menli la anu amaa yɛanyia edwɛkɛ fofolɛ yɛaha yɛahile bɛ. Yɛbahola yɛayɛ nzenzaleɛ wɔ yɛ ngyehyɛleɛ ne anu na yɛahɔ daselɛlilɛ nɔsolɛ nu anzɛɛ mekɛ gyɛne mɔɔ bie a menli wɔ sua nu la. Bie a yɛbahola yɛazukoa aneɛ fofolɛ amaa yɛahola yɛaha edwɛkɛ ne yɛahile menli dɔɔnwo. Yɛbahola yɛalua dahuu adekpakyelɛ gyima ne azo yɛadɛlɛ yɛ ɛzonlenlɛ gyima ne anu. Anzɛɛ yɛbahola yɛadu yɛahɔ ɛleka mɔɔ menli mɔɔ ɛlɛbu bɛyɔba ne anzo la. Saa yɛlɛ bɛyɔba ne anwo subane kpalɛ a, yɛbabɔ mɔdenle biala mɔɔ yɛbahola la yɛava yɛ nwo yɛawula gyima ɛhye mɔɔ nwolɛ hyia la anu.
7. Yɛbayɛ menli nloa ɛboɔboalɛ gyima ne yɛahɔdwu kenlenzu?
7 Mekɛ mɔɔ ɛyazovoma fa boɔboa bɛ bɛyɔba nloa la le ekyi, yemɔti bɛnyɛ mgbovonle anzɛɛ bɛndo bɛ adwenle nu kɔkpula kɛ gyima ne kɛwie la. Ɔhyia kɛ yɛyɛ sunsum nu bɛyɔba ne noko zɔhane ala. Yɛbayɛ menli nloa ɛboɔboalɛ gyima ne yɛahɔdwu kenlenzu? Yɛbayɛ yɛahɔdwu “awieleɛ ne.” (Mat. 24:14; 28:20) Kɛmɔ Gyihova Sonvolɛ mɔɔ lumua yɛle la, yɛkulo kɛ yɛwie gyima mɔɔ bɛva bɛwula yɛ sa nu la. (Dwɔn 4:34; 17:4) Ɛhye ati, bɛmaa yɛhɔ zo yɛva mɔdenlebɔlɛ, anyelielɛ nee subane kpalɛ yɛyɛ yɛ gyima ne yɛhɔdwu awieleɛ. (Mat. 24:13) Bɛyɔba ɛbulɛ ne ɛtɛwiele!
[Edwɛkɛ mɔɔ bɛkpa wɔ mukelɛ 2]
Ɔvi bɛyɔba gyima mɔlebɛbo kɔdwu ye awieleɛ, bɛnye bɛ sa bɛnvi nwolɛ