Ɛ Nye Le Kpalɛ Ɔ?
1. Duzu a kile kɛ awie ‘anye le kpalɛ’ ɛ?
1 Debie mɔɔ yɛkɛva yɛ nye yɛkɛzie zo la ka yɛ nyɛleɛ. Nea kɛzi Gyisɛse edwɛkɛ ne mɔɔ ɔhanle kɛ: “Saa ɛ nye le kpalɛ a, wɔ sonlabaka ne anu le wienyi” fɛta la! (Mat. 6:22) Saa yɛ nye le “kpalɛ” wɔ sunsum nu a, ɔkile kɛ ɔgyi bodane ko—mɔɔ le Nyamenle ɛhulolɛdeɛ mɔɔ yɛyɛ la azo. Yɛfa Belemgbunlililɛ ne yɛdumua na yɛmmaa nwonane afoa nu ninyɛne nee gyima mɔɔ nwolɛ ɛngyia la ɛnzi ɛzonlenlɛ gyima ne adenle.
2. Duzu a bahola azɛkye yɛ adwenle a, na duzu a baboa yɛ a?
2 Ɔhyia Kɛ Yɛneɛnlea Yɛ Nwo Nu: Ninyɛne mɔɔ bɛbɔ ye nolo kɛ yɛhyia nwo anzɛɛ mɔɔ awie mɔ lɛ la bahola azɛkye yɛ adwenle. Kolaa na yɛayɛ anzɛɛ yɛadɔ debie mɔɔ hyia yɛ mekɛ, ezukoa anzɛɛ anwosesebɛ dɔɔnwo la, ɔkɛyɛ kpalɛ kɛ ‘yɛsese ye bolɛ’ na yɛbiza yɛ nwo kɛ, ‘Asoo ɛhye bamaa meanyia anyuhɔlɛ wɔ Gyihova ɛzonlenlɛ nu anzɛɛ ɔbazi ye adenle?’ (Luku 14:28; Fel. 1:9-11) Eza ɔvi mekɛ mɔɔ kɔ mekɛ la, nrɛlɛbɛ wɔ nu kɛ yɛsuzu kɛzi yɛbahola yɛade ninyɛne dɔɔnwo azo wɔ yɛ ɛbɛlabɔlɛ nu amaa yɛahola yɛayɛ dɔɔnwo wɔ ɛzonlenlɛ gyima ne anu la anwo.—2 Kɔl. 13:5; Ɛfɛ. 5:10.
3. Duzu a yɛsukoa yɛfi adiema raalɛ ko mɔɔ yɛle nzenzaleɛ wɔ ye ɛbɛlabɔlɛ nu la ɛkɛ a?
3 Mekɛ mɔɔ adiema raalɛ ko bɔle dahuu adekpakyelɛ gyima ne abo la, ɔyɛle ye adwenle kɛ ɔbahɔ zo yɛayɛ ye gyima ne mɔɔ die ye mekɛ la ɔnva nwo kɛ mekɛ ezinra nu gyima bamaa yeanyia ezukoa dɔɔnwo yeava yeadɔ ninyɛne mɔɔ hyia ye la. Awieleɛ bɔkɔɔ ne ɔhanle kɛ: “Awie biala ɛnrɛhola ɛnrɛzonle menlenlɛ nwiɔ. Ɔwɔ kɛ megyakyi ninyɛne mɔɔ mekulo la na medi mɔɔ hyia la anwo gyima. Menwu kɛ nwonane afoa nu ninyɛne ɛngyɛ na yeayɛ dɛba yɛɛ saa meka kɛ medi ɔ nzi a ɔbamaa meavɛ.” Ye gyinlabelɛ ne manle ɔholale ɔyɛle nzenzaleɛ wɔ ye ɛbɛlabɔlɛ nu, na ɔhakyile gyima mɔɔ ɔyɛ la amaa yeanyia adenle yeadoa ye adekpakyelɛ gyima ne azo.
4. Kɛmɔti a ɔhyia kɛ yɛmaa yɛ nye yɛ kpalɛ ɛnɛ ɛ?
4 Yɛ mekɛ ɛhye mɔɔ hyia ndɛndɛ la maa ɔyɛ mɔɔ hyia kpalɛ kɛ yɛmaa yɛ nye yɛ kpalɛ. Alehyenlɛ biala mɔɔ kɛpɛ nu la maa yɛbikye ewiade ɛtane ɛhye awieleɛ nee mekɛ mɔɔ Nyamenle ewiade fofolɛ ne kɛbɔ ɔ bo la tɛla mekɛ biala. (1 Kɔl. 7:29, 31) Saa yɛfa yɛ adwenle yɛsie daselɛlilɛ gyima ne azo a, yɛbahola yɛalie yɛ nwo nee bɛdabɛ mɔɔ bɛtie yɛ la ngoane.—1 Tem. 4:16.