Gyima Mɔɔ Hyia Kpalɛ
1. Saa yɛnyia ɛzonlenlɛ gyima ne anwo anyezɔlɛ kpole a, afɔle boni a ɔbaha yɛ yeamaa yɛabɔ a?
1 Kɛmɔti a dahuu bɛmaa yɛ anwosesebɛ kɛ yɛva yɛ mekɛ, yɛ anwosesebɛ nee debie biala mɔɔ yɛlɛ la yɛyɛ ɛzonlenlɛ gyima ne ɛ? Ɔboalekɛ ɔsonle bolɛ ɔtɛla gyima biala! Yɛsuzu nvasoɛ kpole mɔɔ wɔ zolɛ la anwo a, ɔbamaa yɛanyia ɛhulolɛ kpole na yɛava yɛ nwo yɛawula gyima ɛhye mɔɔ bɛnrɛyɛ ye bieko ɛlɛ la anu.—Gyi. 20:24.
2. Kɛzi yɛ daselɛlilɛ ne te Gyihova duma kpole ne anwo ɛ?
2 Ɔte Gyihova Duma Nwo: Daselɛlilɛ gyima ne si zolɛ kɛ, Gyihova Belemgbunlililɛ ne mɔɔ Kelaese Gyisɛse banlea zo la barali sonla arane kɔsɔɔti agyakɛ nu, na yeamaa alesama anyia bɛ ngyegyelɛ kɔsɔɔti sɔbelɛ. (Mat. 6:9, 10) Ɔkpogya Gyihova zo kɛ ɔ ngomekye ala a ɔkola ɔdie yɛ ɔfi anwodolɛ nee ewule nu a. (Aye. 25:8; 33:24) Kɛmɔ ye duma la yɛ nwo zo la ati, menli mɔɔ kɛnwu yɛ subane kpalɛ nee yɛ mɔdenlebɔlɛ ne la wula ye anyunlunyia. (1 Pita 2:12) Nea kɛzi ɔyɛ ahunlundwolɛ ɔmaa yɛ kɛ yɛkɛmaa bɛkɛnwu Tumivolɛ Awulae Gyihova duma wɔ azɛlɛ ye azo amuala la ɛ!—Edw. 83:18.
3. Nyilalɛ boni a menli mɔɔ tie Belemgbunlililɛ nrɛlaleɛ ne la nyia ɛ?
3 Ɔdie Ngoane: Gyihova “[kpondɛ] kɛ awie biala nu ɔ nwo na ɔtwe ɔ nwo ɔfi ye ɛtane ne mɔ anwo.” (2 Pita 3:9) Noko saa awie angilehile bɛ a, kɛ ɔkɛyɛ na menli anwu subane mɔɔ Gyihova bu ye kɛ ɔle kpalɛ anzɛɛ ɔnle kpalɛ la ɛ? (Dwn. 4:11; Wulo. 10:13-15) Saa menli tie edwɛkpa ne na bɛgyakyi subane ɛtane mɔɔ wɔ bɛ nwo la a, ɔkakyi bɛ ɛbɛlabɔlɛ. (Mae. 4:1-4) Bieko, bɛnyia dahuu ngoane nwo anyelazo mɔɔ yɛ anyelielɛ la. Yɛ daselɛlilɛ nee yɛ ngilehilelɛ gyima ne mɔɔ yɛyɛ ye kpalɛ la die yɛ nee menli mɔɔ tie yɛ la ngoane. (1 Tem. 4:16) Nea nwolɛ adenle kpole mɔɔ yɛnyia kɛ yɛkɛyɛ gyima mɔɔ hyia kpalɛ la ɛ!
4. Duzu ati a ɔwɔ kɛ yɛyɛ dɔɔnwo wɔ Belemgbunlililɛ nolobɔlɛ nee ɛdoavolɛyɛlɛ gyima ne anu ɛ?
4 Ɔnrɛhyɛ amaneɛnwunlɛ kpole ne bava ewiade ɛtane ɛhye ara awieleɛ arɛlevilɛ nu. Menli mɔɔ sonle Gyihova la banyia ngoane. Ɛhye ati, nolobɔlɛ nee ɛdoavolɛyɛlɛ gyima ne a le gyima mɔɔ hyia ndɛndɛ, nwolɛ hyia, na nvasoɛ wɔ zo mɔɔ bɛlɛyɛ ye ɛnɛ a. Bɛmaa nwolɛ ɛhyia yɛ titile wɔ yɛ ɛbɛlabɔlɛ nu!—Mat. 6:33.