Bɔ Edwɛkɛ Ne Nolo Ndɛndɛ!
1. Pɔɔlo folɛdulɛ boni a ɔhyia kɛ yɛtie wɔ yɛ mekɛ ye anu a?
1 “Bɔ edwɛkɛ ne nolo, na si zolɛ.” (2 Tem. 4:2) Duzu ati a Pɔɔlo folɛdulɛ ne hyia wɔ yɛ mekɛ ye anu ɛ? Kɛzi edwɛkɛ ɛhye kola ka yɛ nee awie mɔ ɛbɛlabɔlɛ ɛ?
2. Kɛmɔti a yɛbɔ mɔdenle yɛkpondɛ menli mɔɔ bɛtɛtele edwɛkpa ne la ɛ?
2 Menli Ngoane Nwo Edwɛkɛ Ɔ: Menli mgbe dɔɔnwo ɛtɛtele edwɛkpa ne mɔɔ bava bɛ ahɔ ngoanelielɛ nu la. (Wulo. 10:13-15; 1 Tem. 4:16) Bɛlɛnyia menli mɔɔ lɛ ahonle kpalɛ la dɔɔnwo wɔ azɛlɛsinli mɔɔ bɛta bɛyɛ nuhua gyima la anu. Saa yɛkɔ kenle gyɛne nu, anzɛɛ mekɛ fofolɛ nu wɔ alehyenlɛ ne anu a, yɛbahola yɛanwu awie mɔɔ yɛ nee ye ɛtɛtendɛle la. Saa yɛbɔ mɔdenle yɛkpondɛ menli wɔ adenle zɛhae azo a, ɔnrɛmaa yɛ adwenle ɛnrɛbua yɛ folɛ yɛɛ yɛnrɛli mogya nwo ɛzonle.—Gyi. 20:26.
3. Kɛ ɔkɛyɛ na yɛava yɛ mekɛ yɛali gyima nrɛlɛbɛ nu wɔ daselɛlilɛ nu ɛ?
3 Ɛvoyia ne mɔɔ lumua la anu Keleseɛnema yiale dwazotia mɔɔ anu yɛ se la ɛdeɛ, noko ‘bɛvale bɛ ngilehilelɛ ne bɛkpondenle Gyɛlusalɛm amuala.’ (Gyi. 5:28) Asoo yɛdayɛ noko yɛbɔ kpɔkɛ kɛ yɛbali ‘daselɛ bɔkɔɔ’ ɔ? (Gyi. 10:42) Saa yɛkɔ daselɛlilɛ a, asoo yɛfa yɛ mekɛ ne yɛdi gyima nrɛlɛbɛ nu? Saa awie mɔ ɛlɛyɛ sia kɔkpɔla na yɛlɛkendɛ bɛ a, asoo yɛbɔ ɔ bo yɛ nee menli mɔɔ ɛlɛpɛ nu la tendɛ?
4. Kɛzi yɛbɔ edwɛkɛ ne nolo ndɛndɛ a ɔboa ɔmaa yɛkɔ zo yɛsinza ɛ?
4 Ɔmaa Yɛ Nye Da Ɛkɛ: Mekɛ mɔɔ ewiade ɛhye awieleɛ ɛlɛbikye la, ɔwɔ kɛ yɛmaa yɛ nye da ɛkɛ na yɛkɔ zo yɛsinza. (1 Tɛs. 5:1-6) Saa yɛka yɛ Belemgbunlililɛ anyelazo ne anwo edwɛkɛ dahuu a, ɔmmaa ewiade ɛhye ɛnli yɛ adwenle. (Luku 21:34-36) Na mekɛ noko mɔɔ ‘yɛlɛkendɛ’ Gyihova kenle ne la, ɔka yɛ ɔmaa yɛyɛ nolobɔlɛ gyima ne mɔɔ die menli ngoane la kpalɛ.—2 Pita 3:11, 12.
5. Kɛzi ɛbulɛ mɔɔ yɛlɛ yɛmaa ngoane la boa maa yɛyɛ daselɛlilɛ gyima ne ɛ?
5 Saa yɛbɔ edwɛkɛ ne nolo ndɛndɛ a, ɔmaa yɛda kɛzi Gyihova bu ngoane la ali: “Ɔngulo kɛ bɛsɛkye awie biala. Ɔkpondɛ kɛ awie biala nu ɔ nwo.” (2 Pita 3:9; Yiz. 33:11) Ɔrɛla ye kɛ yɛbabɔ mɔdenle yɛakpondɛ menli dɔɔnwo wɔ yɛ azɛlɛsinli ne anu, na yɛava yɛaye Gyihova ayɛlɛ!—Edw. 109:30.