Kenle Ko Nyianu Titile Ngyehyɛleɛ Maa 2010
1. (a) Kenle ko nyianu titile edwɛkɛtile mɔɔ gyi Ngɛlɛlera ne azo la boni mɔ a bɛhilehile nu kenlensa ye a? (b) Asoo edwɛkɛtitile bie mɔ wɔ kenle ko nyianu titile mɔɔ ɛze ɛhɔ la anu mɔɔ boale wɔ wɔ daselɛlilɛ nu ɔ?
1 “Bɛnwu Mɔɔ Le Kpalɛ La A Bɛnwu Ye,” “Bɛgyinla Kpundii Kɛ Menli Mɔɔ Wɔ Afoa Ko,” “Kɔ Zo Di Nɔhalɛ Ne Anwo Daselɛ,” yɛɛ “Yɛmɛ, Yɛle Ndɛtɛlɛ—Gyihova A Le Yɛ Nwovolɛ A.” (Fel. 1:9, 10, 27; Dwɔn 18:37; Aye. 64:8) Ɛhye a le edwɛkɛtile ekyi mɔɔ bɛzuzu nwo wɔ nyianu titile mɔɔ ɛze ɛhɔ la anu a. Ɛ nye la kɛ ɛbahɔ kenle ko nyianu titile wɔ 2010 ɛzonlenlɛ ɛvolɛ ne anu ɔ? Ɔbahilehile edwɛkɛtile ne mɔɔ se: “Mekɛ Ne Ɛwie,” mɔɔ bɛyele bɛvile 1 Kɔlentema 7:29 la anu.
2. Kɛzi yɛbaziezie yɛ nwo yɛamaa nyianu ɛhye ɛ?
2 Saa ɛte kenle mɔɔ bɛbayɛ kenle ko nyianu titile ne la wɔ wɔ asafo ne anu a, bɔ ɔ bo siezie ɛ nwo. Awovolɛ bie mɔ boa bɛ mra maa bɛsiezie bɛ nwo bɛmaa nyianu ne, ɔlua kenle ne nee ninyɛne mɔɔ bɛhyia nwo mɔɔ bɛkɛlɛ ye wɔ abusua ne kalenda zo na akee bɛabɔ ɔ bo bɛadia kenle ne la. Saa bɛlɛyɛ bɛ Abusua Ɛzonlenlɛ nɔsolɛ ne a, bɛbahola bɛazuzu kenle ko nyianu titile mɔɔ bɛyɛ ye dɛba la anu edwɛkɛ mɔɔ bɛhɛlɛle la anwo. Bɛbahola noko bɛazia bɛanlea Benefit From Theocratic Ministry School Education, mukelɛ 13-16 bɛava bɛaziezie bɛ nwo nee bɛ abusua, amaa ‘bɛadie edwɛkɛ ne boɛ.’—Luku 8:18.
3. Kɛ ɔkɛyɛ na yɛanyia nvasoɛ yɛavi edwɛkɛ mɔɔ bɛbaha la azo ɛ?
3 Fa Mɔɔ Ɛkɛzukoa La Di Gyima: Edwɛkɛ mɔɔ yɛta yɛte wɔ mekɛ mɔɔ bɛkɛkpɔne nyianu ne la a le kɛ, “Ɛnee nyianu ne le kɛnlɛma somaa!” Ɛhye le zɔ, ɔluakɛ ɔle ninyɛne dɔɔnwo ne mɔɔ Gyihova fa maa la anu ko. (Mrɛ. 10:22) Amaa edwɛkɛ ne azo ma la, ɔwɔ kɛ ɛdwenledwenle nwolɛ na ɛfa ɛsie. (Luku 8:15) Saa bɛkpɔne nyianu ne na bɛlɛkɔ sua nu a, bɛva mekɛ bɛha nyianu ne anwo edwɛkɛ kɛ abusua la wɔ kale ne anu. Bɛzuzu mɔɔ awie biala ɛva ɛzie ɔ nye zo nee edwɛkɛ mɔɔ baboa bɛ wɔ bɛ daselɛlilɛ nu la anwo. Saa bɛyɛ zɔ a, ɔbaboa yeamaa bɛanyia nvasoɛ bɛavi nyianu ne azo mekɛ tendenle.—Gye. 1:25.
4. Duzu ati a nyianu ɛhye bayɛ titile amaa yɛ a?
4 Dahuu yɛ nye die wɔ mekɛ mɔɔ yɛ sa kɛha ahyɛlɛdeɛ mɔɔ baboa yɛ la. Asoo yɛ nye ɛnla mɔɔ Gyihova ɛziezie ɛmaa yɛ wɔ kenle ko nyianu titile bieko abo la ade ɛsesebɛ ɔ? Yɛbahola yɛalie yɛali kɛ ɔbaboa yɛ wɔ adenle biala azo. Yɛ nye la kɛ yɛbanyia ahyɛlɛdeɛ mɔɔ fɛta, mɔɔ le anwosesebɛmanlɛ nee ndetelɛ mɔɔ bamaa yɛayɛ gyima mɔɔ bɛva bɛwula yɛ sa nu la yɛavi Gyihova, yɛ anwuma Selɛ ne ɛkɛ.—2 Tem. 4:2; Gye. 1:17.