Ye Gyihova Ayɛlɛ Alehyenlɛ Biala
1. Duzu a bɛmaa Nyamenle azonvolɛ anwosesebɛ kɛ bɛyɛ a, na kɛmɔti ɛ?
1 Belemgbunli Devidi hanle kɛzi yebɔ kpɔkɛ kɛ ɔbaye Gyihova ayɛlɛ “kenle biala,” bɔbɔ dahuu la anwo edwɛkɛ. (Edw. 145:2, 7, 21) Yɛdayɛ noko yɛlɛ adwenle kpalɛ mɔɔ ɔti ɔwɔ kɛ yɛye Gyihova ayɛlɛ alehyenlɛ biala la.—Edw. 37:10; 145:14, 18; 2 Pita 3:13.
2. Kɛzi mbusua bahola aye Gyihova ayɛlɛ alehyenlɛ biala ɛ?
2 Wɔ Yɛ Sua Nu: Yɛlɛ mbuluku mɔɔ boa yɛ maa yɛsuzu sunsum nu ninyɛne mɔɔ nvasoɛ wɔ zo la anwo wɔ mekɛ mɔɔ yɛlɛsuzu alehyenlɛ ne anu tɛkese, mekɛ mɔɔ yɛlɛyɛ Abusua Ɛzonlenlɛ nee mekɛ mɔɔ yɛlɛsiezie yɛ nwo yɛamaa asafo debiezukoalɛ la. Mbusua dɔɔnwo bɔ mɔdenle yia nu di debie ko wɔ alehyenlɛ biala anu. Ɛhye maa bɛnyia mekɛ bɛto bɛ rɛle aze bɛbɔ adawu na bɛnyia adenle bɛye Gyihova ayɛlɛ. Adawubɔlɛ zɛhae mɔɔ awovolɛ fa kilehile bɛ mra la le debie mɔɔ hyia na ‘bɛatete bɛ mra kɛmɔ Gyihova kpondɛ la.’—Ɛfɛ. 6:4; Mɛla. 6:5-7.
3. Saa yɛwɔ yɛ mediema avinli a, adenle kɛnlɛma boni a yɛlɛ a?
3 Wɔ Mediema Avinli: Saa yɛkɔ daselɛlilɛ anzɛɛ debiezukoalɛ a, yɛnyia adenle kɛnlɛma yɛye Gyihova ayɛlɛ wɔ yɛ mediema diedima avinli. (Mrɛ. 15:30; Fel. 4:8; Hib. 13:15) Kɛmɔ yɛ muala yɛlɛ Gyihova anwo ɛlɔlɛ la ati, ɔnle kɛ ɔyɛ se kɛ yɛkɛhile Gyihova kpalɛyɛlɛ ne anwo anyezɔlɛ wɔ mekɛ mɔɔ yɛlɛbɔ adawu la.—Edw. 106:1.
4. Adenle boni mɔ a ɛbahola wɔalua zo wɔaye Gyihova ayɛlɛ a?
4 Mekɛ Mɔɔ Yɛ Nee Awie Mɔ Ɛlɛtendɛ: Bie a yɛnrɛnyia mekɛ yɛnrɛhɔ daselɛlilɛ alehyenlɛ biala ɛdeɛ, noko yɛbahola yɛanyia mekɛ ekyi yɛaha Gyihova nee ye bodane ne mɔ anwo edwɛkɛ yɛahile yɛ gɔnwo mɔ gyimayɛvoma, yɛ gɔnwo mɔ sukuluma yɛɛ awie mɔ mɔɔ yɛ nee bɛ de la na yɛamaa menli mɔɔ lɛ ahonle kpalɛ la anyia anyelazo. (Edw. 27:14; 1 Pita 3:15) Adiema raalɛ ko mɔɔ vole anwumalɛne nu la lile raalɛ ko mɔɔ ɛnee de ɔ nwo ɛkɛ ne la daselɛ, ye edwɛkɛ ne kyekyele raalɛ ne arɛle yemɔti ɔvale ye address nee ye phone nɔma ɔmanle adiema raalɛ ne amaa bɛahola bɛavɛlɛ bɛ nwo. Mekɛ mɔɔ ngyegyelɛ dɔɔnwo ɛlɛsɛkye ewiade ne anu tɛnlabelɛ la, Gyihova menli kɔ zo ‘fa nrɛlaleɛ kpalɛ bɛlɛ menli mɔɔ bɛkulo kɛ bɛtie la.’ Ɛhye maa menli nyia anyelazo na ɔka bɛ ɔmaa bɛye Gyihova ayɛlɛ.—Aye. 52:7; Wulo. 15:11.
5. Kɛmɔti a yɛkulo kɛ yɛye Gyihova ayɛlɛ ɛ, na duzu a vi ɛhye anu bara a?
5 Nea kɛzi Gyihova anye die kɛ ɔkɛnwu kɛ ye azonvolɛ ɛlɛye ye ayɛlɛ alehyenlɛ biala ɛ! Kɛmɔ Gyihova abɔdeɛ ye ye ayɛlɛ la, yɛdayɛ noko yɛbahola yɛaye ye ayɛlɛ wɔ yɛ sua nu, asafo ne anu yɛɛ mekɛ mɔɔ yɛ nee awie mɔ mɔɔ bɛtɛnyianle bɛtɛyele Gyihova ayɛlɛ ɛlɛtendɛ la.—Edw. 19:1-4.