Ɛbahola Wɔayɛ Dɔɔnwo Wɔ Ɛzonlenlɛ Gyima Ne Anu Ɔ?

1. Duzu a anwo hyia ndɛndɛ wɔ ɛzonlenlɛ gyima ne anu a, na kɛmɔti ɛ?

¹ Mekɛ mɔɔ Gyisɛse nwunle kɛ menli dɔɔnwo ɛlɛtie Belemgbunlililɛ ne anwo edwɛkpa ne la, ɔhanle ɔhilele ye ɛdoavolɛma ne kɛ “bɛzɛlɛ egyinli menle ne kɛ ɔkɛva gyimayɛvoma dɔɔnwo ɔkɛmaa bɛkɛhɔbu bɛyɔba ne.” (Mat. 9:37, 38) Kɛmɔ yɛwɔ bɛyɔba ne ɛbulɛ mekɛ mɔɔ li awieleɛ la anu la ati, gyima ne anwo hyia ndɛndɛ tɛla mekɛ biala. Ɛhye kile kɛ, ɔwɔ kɛ yɛfa asɔneyɛlɛ yɛsuzu kɛzi yɛbahola yɛayɛ dɔɔnwo wɔ ɛzonlenlɛ gyima ne anu la anwo.—Dwɔn 14:13, 14.

2. Kɛzi bie mɔ ɛlie ɛsalɛ mɔɔ bɛdo kɛ bɛkpondɛ gyimayɛvoma dɔɔnwo wɔ daselɛlilɛ nu la azo ɛ?

² Kɛzi Bɛyɛ Dɔɔnwo La: Ɔlua Gyihova adehilelɛ nee ye moalɛ zo, menli dɔɔnwo ɛnwu kɛ bɛbahola bɛayɛ adekpakyelɛ gyima ne bie. (Edw. 26:2, 3; Fel. 4:6) Bie mɔ bɔle mɔdenle kpalɛ zonlenle kɛ adekpakyelɛ boavolɛma wɔ siane ko anzɛɛ dɔɔnwo anu wɔ ɛvolɛ ne anu. Ɛhye manle bɛholale bɛyɛle dɔɔnwo wɔ daselɛlilɛ nu. Anyelielɛ mɔɔ bɛnyianle bɛvile mɔɔ bɛyɛle la anu la ɛmaa bɛ nuhua dɔɔnwo ɛzuzu kɛ ɔwɔ kɛ bɛyɛ dahuu adekpakyelɛma.—Gyi. 20:35.

3. Saa wɔyɛ adekpakyelɛ gyima ɛlɛ a, duzu a ɛbahola wɔazuzu nwo kɛkala a?

³ Ɛbahola Wɔayɛ Adekpakyelɛ Gyima Ne Bieko Ɔ?: Saa ɛnee ɛle adekpakyelɛnli a, ɔda ali wienyi kɛ ɛkakye kɛzi ɛnee ɛ nye die wɔ zɔhane mekɛ ne anu la. Asoo wɔva asɔneyɛlɛ wɔzuzu kɛzi ɛbahola wɔayɛ adekpakyelɛ gyima ne bieko la anwo? Bie a ninyɛne mɔɔ manle ɛgyakyile adekpakyelɛ gyima ne la ɛngyegye wɔ bieko. Ɛbahola wɔanyia adenle wɔayɛ zɔhane gyima titile ne bieko.—1 Dwɔn 5:14, 15.

4. Nwolɛ adenle kɛnlɛma boni a ɛbuke ɛmaa yɛ kɔsɔɔti a?

⁴ Bɛyɔba gyima ne ɛlɛkɔ zolɛ, na ɔnrɛhyɛ na yeara awieleɛ. (Dwɔn 4:35, 36) Ɔrɛla ye kɛ yɛ kɔsɔɔti yɛbanleɛnlea gyinlabelɛ mɔɔ yɛwɔ nu kɛkala la anu, na yɛanwu ye kɛ saa yɛbahola yɛatoto yɛ ninyɛne boɛ amaa yɛayɛ dɔɔnwo wɔ daselɛlilɛ nu a. Saa yɛnwu noko kɛ yɛnrɛhola dɔɔnwo yɛ a, asoo yɛbahola yɛalua adenle bie azo yɛayɛ menli mɔɔ bɔ mɔdenle kpalɛ la ɔ? (Mak. 12:41-44) Nea nwolɛ adenle kɛnlɛma mɔɔ wɔ ɛkɛ ne maa menli kɔsɔɔti mɔɔ Gyihova bahola ava bɛ ali gyima yeamaa bɛayɛ gyima titile ɛhye a!—Edw. 110:3.