Siezie Ɛ Nwo Kpalɛ Maa Ngakyelɛlilɛ Ne

Nea kɛzi ɔyɛ anyelielɛ na ɔle enililɛ ɔmaa menli mɔɔ doa Kelaese la kɛ bɛkɛziezie bɛ nwo kpalɛ wɔ nɔsolɛ ne mɔɔ yɛfa yɛkakye Gyisɛse Kelaese ewule ne la ɛ! (Luku 22:19) Ninyɛne kpalɛ boni mɔ a ɔwɔ kɛ yɛyɛ yɛfa yɛsiezie yɛ nwo yɛmaa Ngakyelɛlilɛ ne a?

◼ Mekɛ nee Ɛleka: Ɔwɔ kɛ awie biala nwu mekɛ nee ɛleka fɔɔnwo mɔɔ bɛbayɛ Ngakyelɛlilɛ ne la. Saa asafo dɔɔnwo bayia wɔ Belemgbunlililɛ Asalo ko anu a, ɔhyia kɛ bɛdwu ɛkɛ ne ndɛ na bɛfi ɛkɛ wɔ adenle mɔɔ ɔngyegye adwenle la azo, ɔluakɛ mekɛ ekyi bie a wɔ nyianu ne mɔ avinli a. Ɔwɔ kɛ bɛbɔ mɔdenle amaa bɛangyele zo wɔ adenle ne anu, ɛleka mɔɔ bɛdua nee ɛleka mɔɔ bɛfa kale bɛsie la.

◼ Ɛsalɛdolɛ kɛlata: Asoo nolobɔlɛma kɔsɔɔti asa ɛha bɛ ɛsalɛdolɛ kɛlata ɛdeɛ, yɛɛ bɛze mɔɔ wɔ nu la? Asoo bɛyɛ kɛzi bɛbava ɛsalɛdolɛ kɛlata ɛhye bɛamaa la anwo yɛkile? Nwane a bɛbado ɛsalɛ bɛavɛlɛ ye a? Ɔwɔ kɛ bɛbɔ mɔdenle bɛfa ɛsalɛdolɛ kɛlata ne amuala bɛmaa.

◼ Kale: Ɔhyia kɛ anyelielɛma bie mɔ fo kale anzɛɛ nyia moalɛ gyɛne. Ngyehyɛleɛ boni a bɛyɛ kɛ bɛfa bɛali mediema mrenya nee mraalɛ mɔɔ bie a anwodolɛ ti bɛnrɛhola bie ba la ngyianlɛ nwo gyima ɛ?

◼ Ngakyelɛ Aleɛ: Bɛnlea kɛ bɛnrɛva nza ne nee paano ne bɛnrɛva menli ne anyunlu kɔkpula kɛ ewia ne ɛhɔdɔ la. Ɔwɔ kɛ bɛyɛ ngyehyɛleɛ bɛfa paano ne nee nza ne bie bɛkɔmaa menli mɔɔ bɛkpokpa bɛ la anu biala mɔɔ ɔnlɛ anwosesebɛ na ɔnrɛhola ɔ bo ba la. Bɛlumua bɛkpondɛ paano nee nwanye mɔɔ fɛta mɔɔ bɛbava bɛali gyima la.—Bɛnlea February 15, 2003, Watchtower, mukelɛ 14-15, ɛdendɛkpunli 14, 17.

◼ Belemgbunlililɛ Asalo: Ɔwɔ kɛ bɛdumua bɛsiezie Belemgbunlililɛ Asalo ɛkɛ ne bɔkɔɔ bɛmaa ɔyɛ kɛnlɛma. Ɔwɔ kɛ bɛfa pɛlɛte, nwanye kɔpo anzɛɛ tɔmɛlɛ, ɛkponle nee ɛkponle zo ɛdanlɛ mɔɔ fɛta la bɛba asalo ɛkɛ ne na bɛdumua bɛsiezie bɛ kɛnlɛma. Saa bɛnyia ɛleka fofolɛ mɔɔ bɛbayɛ bie a, bɛnlea kɛ bɛbanyia ninyɛne kpalɛ mɔɔ bɛtendɛ nu mɔɔ bamaa menli mɔɔ bara ɔ bo la ade mɔɔ tendɛvolɛ ne baha la. Ɔwɔ kɛ bɛdumua bɛkpa menli mɔɔ balie nyɛvolɛ nee bɛdabɛ mɔɔ bɛbava paano ne nee nwanye ne bɛava menli ne anyunlu la na bɛmaa bɛnwu bɛ gyima, adenle mɔɔ ɔwɔ kɛ bɛdua zo bɛyɛ ye nee kɛzi ɔhyia kɛ bɛ tɛladeɛ nee bɛ nwo ɛziezielɛ fɛta la.

Wɔ Gyisɛse Kelaese ewule ne anwo Ngakyelɛlilɛ mekɛ ɛhye mɔɔ hyia la anu, yɛkulo kɛ yɛ nuhua ko biala yɛɛ kɛ asafo la siezie yɛ nwo kpalɛ. Nɔhalɛ nu, Gyihova bayila menli kɔsɔɔti mɔɔ fi bɛ ahonle nu kile anyezɔlɛ wɔ debie biala mɔɔ Gyihova ɛlua ye kulovolɛ Ralɛ Gyisɛse Kelaese anwo zo ɛva ɛmaa alesama la dɔɔnwo.