“Yɛ Ɛhye Mɔ Amuala wɔ Edwɛkpa ne Ati”

1. Duzu a Belemgbunlililɛ nolobɔlɛnli kulo kɛ ɔyɛ ɔmaa awie mɔ a, na kɛmɔti ɛ?

¹ Ɛzoanvolɛ Pɔɔlo dele nganeɛ kɛ ɛzonlelilɛ la ɔ nwo zo kɛ ɔbɔ edwɛkpa ne nolo ɔkile awie mɔ. (1 Kɔl. 9:16, 19, 23) Zɔhane ala a menli dahuu boɛyɛlɛ nwo mɔɔ yɛdwenle la ka yɛ maa yɛbɔ mɔdenle biala yɛbɔ edwɛkpa ne nolo yɛkile bɛ a.

2. Saa yɛlɛdi daselɛ a, nzenzaleɛ boni a yɛkulo kɛ yɛyɛ a, na duzu ati ɔ?

² Di Daselɛ wɔ Mekɛ nee Ɛleka Mɔɔ Menli Wɔ La: Fɛlɛkyevolɛ kpalɛ to koba anzɛɛ gua avonle wɔ mekɛ nee ɛleka mɔɔ ɔbahye fɛlɛ la, na tɛ mekɛ nee ɛleka mɔɔ ɔkulo la. Ɔhyia kɛ yɛdayɛ noko mɔɔ yɛlɛkpondɛ menli kɛmɔ “bɛkye fɛlɛ la” yɛ nzenzaleɛ amaa yɛahola yɛanyia menli wɔ yɛ azɛlɛsinli ne anu na ɔlua zo yɛanyia ahunlundwolɛ kpole kɛ yɛlɛboɔboa “fɛlɛ ngakyile dɔɔnwo” anloa la. (Mat. 4:19; 13:47) Asoo yɛbahola yɛahɔ menli azua nu wɔ alewɔzo anzɛɛ yɛali daselɛ wɔ gua zo wɔ nwonlomɔ ne ala ɔ? Pɔɔlo vale yɛle ye bodane kɛ ‘ɔdi edwɛkpa ne anwo daselɛ yeawie,’ na ɔvale nwolɛ adenle biala mɔɔ ɔnyianle la ɔyɛle zɔ.—Gyi. 17:17; 20:20,24.

3, 4. Saa yɛlɛdi daselɛ a, nzenzaleɛ boni a yɛbahola yɛayɛ a, na duzu a bavi nu ara a?

³ Maa Wɔ Edwɛkɛ ne Ɛvane Bɛ Ngyianlɛ Nwo: Fɛlɛkyevoma ta kakyi ndenle mɔɔ bɛdua zo bɛkye fɛlɛ la amaa bɛahola bɛahye fɛlɛ ngakyile bie. Kɛzi yɛbahola yɛabɔ Edwɛkpa ne nolo wɔ adenle mɔɔ menli nye die nwo wɔ yɛ azɛlɛsinli ne anu la azo ɛ? Ɔwɔ kɛ yɛbiza edwɛkɛ mɔɔ menli nye die nwo la na yɛtie mɔɔ bɛbaha ye wɔ nwolɛ la boɛ. (Gye. 1:19) Yɛbahola yɛabiza edwɛkɛ mɔɔ maa bɛnwu awie adwenle la amaa yɛahola yɛ nee bɛ adendɛ. (Mrɛ. 20:5) Wɔ adenle ɛhye azo, yɛbahola yɛahakyi adenle mɔɔ yedua zo yɛbɔ edwɛkpa ne nolo la amaa yeaha menli ne ahonle kpalɛ. Pɔɔlo nee ‘menli muala yɛle ko.’ (1 Kɔl. 9:22) Yɛmaa edwɛkɛ mɔɔ yɛlɛka la fane suamenle ne anwo a yɛɛ ɔbaha ye ahonle a.

⁴ Nea kɛzi ɔyɛ anyelielɛ kɛ yɛbaha “nrɛlaleɛ kɛnlɛma kpalɛ” ɛhye yɛahile menli a! (Aye. 52:7) Ɔrɛla ye kɛ yɛbayɛ “ɛhye mɔ amuala wɔ edwɛkpa ne ati” amaa yɛahola yɛali menli dɔɔnwo daselɛ.—1 Kɔl. 9:23.