Ɛlɛfa Reasoning Buluku ne Wɔali Gyima Ɔ?
1. Kɛzi ɛdoavolɛ Pɔɔlo nee Gyisɛse hilehilele awie mɔ ɛ?
1 Ɛzoanvolɛ Pɔɔlo bɔle mɔdenle nee menli ‘zuzule Nyamenle Edwɛkɛ ne anwo’ (Gyi. 17:2, 3; 18:19) Ɔlua ɛhye ɛyɛlɛ zo ɔzukoale Gyisɛse mɔɔ vale Ngɛlɛlera ne nee fatonwo lile gyima fane dɔɔnwo manle ye tievolɛma dele mɔɔ Nyamenle ɛhulolɛdeɛ kile la abo la. (Mat. 12:1-12) Bɛziezie Reasoning From the Scriptures buluku ne kɛ bɛfa bɛaboa yɛ bɛamaa yɛayɛ zɔ.
2. Kɛzi yɛbahola yɛava Reasoning buluku ne yɛaziezie mukenye mɔɔ yɛ anyelielɛ la ɛ?
2 Siezie Mukenye Mɔɔ Yɛ Anyelielɛ: Mukenye mɔɔ yɛ anyelielɛ la dɔɔnwo wɔ Reasoning From the Scriptures ne mukelɛ 9-15. Saa ɛsukoa mukenye ngakyile ɛhye mɔ na ɛfa ɛyɛ gyima titile wɔ azɛlɛsinli mɔɔ ɛyɛ nuhua gyima fane dɔɔnwo la anu a, ɔbaboa wɔ yeamaa wɔayɛ nzenzaleɛ wɔ edwɛkɛ mɔɔ ɛfa ɛbɔ daselɛlilɛ bo la anu. Yɛbahola yɛagenga mukenye ne yɛavi buluku ne anu wɔ mekɛ mɔɔ yɛlɛdi daselɛ wɔ telefuu zo anzɛɛ yɛalua debie mɔɔ bɛtendɛ nuhua la azo yɛ nee awie mɔɔ wɔ azua mɔɔ bɛsinza la anu adendɛ.
3. Duzu edwɛkɛ a wɔ Reasoning buluku ne mukelɛ 16-24 mɔɔ baboa yɛ wɔ daselɛlilɛ nu a?
3 Di Menli Mɔɔ Pɛ Edwɛkɛ zo la Anwo zo Konim: Fa wɔ adwenle bu edwɛkɛ mɔɔ menli baha wɔ azɛlɛsinli ne anu la na fa mitini ekyi suzu mualɛ mɔɔ wɔ mukelɛ 16-21 mɔɔ ɛbahola wɔava wɔali gyima la anwo kolaa na wɔahɔ daselɛlilɛ. Buddhama, Hinduma, Dwuuma anzɛɛ Ngɛnlamoma wɔ azɛlɛsinli ne anu ɔ? Saa ɔle zɔ a ɛnee edwɛkɛ ne mɔɔ wɔ mukelɛ 21-24 la baboa wɔ.
4. Saa bɛbiza kpuyia anzɛɛ edwɛkɛ mɔɔ fa kpolerazulɛ ba la a, kɛzi yɛbahola yɛava Reasoning buluku ne yɛali nwolɛ gyima ɛ?
4 Kpuyia Ɛbualɛ: Reasoning buluku ne eza boa yɛ wɔ mekɛ mɔɔ bɛkɛbiza kpuyia anzɛɛ edwɛkɛ mɔɔ fa kpolera ba la. Ɛbahola wɔaha wɔahile ahenle kɛ ɛkulo kɛ ɛkile ye debie mɔɔ yɛ anyelielɛ wɔ edwɛkɛ ne anwo na wɔaye wɔ Reasoning buluku ne. Kɛmɔ bɛziezie edwɛkɛ ne pɛpɛɛpɛ la ati, buke edwɛkɛtile mɔɔ ɛsuzu kɛ ɔbahola yeaboa ye la. Akee nea kpuyia ne mɔɔ bɛyɛ ye mgbole la anu ndɛndɛ. Saa wɔanwu mɔɔ ɛlɛkpondɛ la a, buke ɔ nzi ɛkɛ ne edwɛkɛ ne mɔɔ bɛziezie la. Saa ɛnwu edwɛkɛ mɔɔ fɛta la a kenga fi buluku ne anu. Ɛlɛsuzu ngɛlɛlera titile bie anwo a, ɛbanwu nwolɛ edwɛkɛ mɔɔ hyia la wɔ mukelɛ 445 ɛleka mɔɔ se “Scriptures Often Misapplied” la abo.
5. Ninyɛne boni mɔ a nwolɛ moalɛ wɔ Reasoning buluku ne anu a?
5 Ninyɛne Gyɛne: Bie mɔ fa Reasoning buluku ko kɔ gyima anzɛɛ sukulu amaa yeaboa bɛ na bɛabua kpuyia mɔɔ le kɛ ‘Duzu ati a bɛnli ɛvoyia ɛ?’ la. Ngakula ɛnwu kɛ edwɛkɛ mɔɔ wɔ edwɛkɛtile ne mɔɔ se “Creation” nee “Evolution” abo la boa bɛ maa bɛsiezie bɛ sukulu gyimalilɛ. Ɛlɛkɔ wɔahɔkpɔla awie mɔɔ ɛnde kpɔkɛ anzɛɛ awie mɔɔ ye dɔvolɛ bie ɛwu la ɔ? Edwɛkɛ mɔɔ wɔ “Encouragement” abo la bahola aboa wɔ yeamaa wɔavi Ngɛlɛlera ne anu wɔakyekye ɔ rɛle. Edwɛkɛ noko mɔɔ nvasoɛ wɔ zo la wɔ Reasoning buluku ne anu maa menli mɔɔ ɛlɛsiezie ɛdendɛlɛ anzɛɛ bɛlɛyɛ daselɛlilɛ nyianu la.
6. Saa yɛlɛka edwɛkɛ ne a, yɛ bodane a le duzu?
6 Saa yɛlɛka edwɛkɛ ne a, tɛ yɛ bodane a le kɛ yɛdi kpolerazulɛ zo konim yɛɛ tɛ kɛ yɛka edwɛkɛ ala. Yɛkulo kɛ yɛsuzu Ngɛlɛlera ne anwo kpalɛ. Saa yɛfa Reasoning buluku ne yɛdi gyima kpalɛ a, yɛmaa ɔda ali kɛ yɛlɛnea yɛ ngilehilelɛ ne boɛ.—1 Tem. 4:16.