Diedi Kpole Nwo Daselɛ!
1. Ninyɛne mɔɔ gyegye adwenle la boni a Gyisɛse hanle nwolɛ edwɛkɛ dole ɛkɛ a?
1 Ɛzoanvolɛ ne mɔ diele Gyisɛse kpalɛ, mekɛ mɔɔ ɛnee ɔlɛka ye ɛralɛ nee ewiade ne ɛzɛkyelɛ nwo edwɛkɛ la. Ninyɛne mɔɔ gyegye adwenle la bado alesama—konle, ɛhɔne, azɛlɛkpusulɛ, ewule ngakyile. Bieko, Gyisɛse hanle kɛ bɛbakpɔ ye ɛdoavolɛma, bɛbahye bɛ bɛaye bɛ bɛamaa na bɛahu bɛ. Adalɛ ngapezoma bara na bɛbabɛlɛbɛla menli dɔɔnwo. Menli dɔɔnwo ne ala ɛlɔlɛ baha aze.
2. Duzu ati a ɔyɛ nwanwane kɛ bɛlɛbɔ edwɛkpa ne nolo wɔ ewiade amuala ɛ?
2 Wɔ ɛhye mɔ amuala anzi, ɔbazi ɛdoavolɛ ne mɔ anwo wɔ mekɛ mɔɔ Gyisɛse hanle kɛ bɛbabɔ Nyamenle Belemgbunlililɛ ne anwo nolo wɔ aleɛabo amuala la. (Mat. 24:3-14) Ɛnɛ yɛnwu zɔhane ngapezo ne mɔɔ yɛ anyelielɛ mɔɔ ɛra nu kɛnlɛma la. Yɛwɔ mekɛ mɔɔ anu yɛ se la anu ɛdeɛ, noko Gyihova Alasevolɛ bɔ mɔdenle bɔ edwɛkpa ne nolo. Mekɛ mɔɔ ewiade ne anu amra ɛlɔlɛ ɛlɛka aze la, ɛnee yɛ ɛlɔlɛ ne ɛlɛkɔ zo ayɛ kpole. Ɔnva nwo kɛ “aleɛabo amra amuala” kpɔ yɛ la, asɛɛ yɛka edwɛkɛ ne wɔ maanle biala anu.
3. Ninyɛne mɔɔ wula anwosesebɛ la boni a ɛnwu ye wɔ ewiade amuala mgbondabulɛ ne anu a?
3 Nea kɛzi ɔwula anwosesebɛ kɛ yɛkɛnleɛnlea gyima mɔɔ Gyihova Alasevolɛ yɛle wɔ ɛkenle ɛzonlenlɛ ɛvolɛ ne anu kɛmɔ bɛbu nwolɛ mgbonda wɔ mukelɛ 3 kɔdwu 6 la! Ye ɛvolɛ mɔɔ tɔ zo 16, mɔɔ bɛvale dɔnehwele mɔɔ bo mgbe mgbe ko bɛhanle edwɛkɛ ne na bɛyɛle ɛdoavolɛyɛlɛ gyima ne la ɛne. Nea kɛzi ɛhye le diedi kpole nwo daselɛ la! Yɛnyianle anyuhɔlɛ wɔ adekpakyelɛma dodo ɛya ko ngyɛnu 5.8, nolobɔlɛma dodo ɛya ko ngyɛnu 3.1 yɛɛ Baebolo ɛzukoalɛ dodo ɛya ko ngyɛnu 4.4. Menli mɔɔ bɛzɔnenle bɛ la hɔle ɔ nyunlu ɛya ko ngyɛnu 20.1 dɛlale ɛkenle ɛvolɛ ne. Nea kɛzi ɔyɛ anyelielɛ kɛ yɛkɛnwu kɛ asɛɛ menli mgbe nsuu ɛlɛfa nɔhalɛlilɛ azonle Gyihova—wɔ mekɛ ɛhye anu adɛla mekɛ biala wɔ alesama tetedwɛkɛ nu a! Mekɛ mɔɔ ɛlɛneɛnlea mgbondabulɛ ne anu la, duzu a wɔ nu mɔɔ wula wɔ anwosesebɛ titile a?
4. Ngyegyelɛ boni a nrenya ko lile zolɛ konim wɔ mekɛ mɔɔ ɔlɛsiezie ɔ nwo yeamaa ɛzɔnenlɛ la?
4 Ɔwɔ nuhua kɛ mgbondabulɛ ne le mgbole ɛdeɛ, noko ɔnle kɛ yɛ rɛle fi kɛ menli mɔɔ lale bɛ diedi ne ali la gyimayɛlɛ ɔ. Suzu neazo ɛhye anwo nea. Guillermo nyinle wɔ Bolivia. Bɛwole ye 1935, ɔnyianle ɛvolɛ ngɔnla mɔɔ kɔ la ɛnee ɔyɛ gyima wɔ coca ɛya nu. Ɔbɔle ɔ bo wɔ ye ngakula nu ɔlile coca nya kɛ ɔfa yeagyinla gyima ɛsesebɛ mɔɔ ɔyɛ la anloa. Nzinlii ɛnee ɔno nza nee sigalɛte dɔɔnwo. Mekɛ mɔɔ ɔbɔle ɔ bo kɛ ɔsukoa mɔɔ Gyihova kpondɛ kɛ ɔyɛ anwo debie la, Guillermo gyakyile sigalɛte nee nza ne mɔɔ ɔno la. Debie mɔɔ ɛnee yɛ se maa ye la a le coca nya ne mɔɔ yeli dedee yeha ye ɛkɛ la. Ɔhɔle zo ɔyɛle asɔne na ɔholale ɔlile subane ɛhye azo konim. Mekɛ mɔɔ ɔgyakyile ninyɛne mgbane mgbane la, bɛzɔnenle ye. “Kɛkala,” ɔse, “Mete nganeɛ kɛ me nwo te yɛɛ me nye die kpole.”
5. Wɔ ɛhulolɛdeɛ a le duzu?
5 Gyihova anye die menli nwo amgba. Ɔle ye ɛhulolɛdeɛ kɛ awie biala kɛnlu ɔ nwo. (2 Pit. 3:9) Kɛ yɛdayɛ noko yɛkulo la ɛne. Ɔrɛla ye kɛ yɛ ahonle kɛha yɛ kɛmaa yɛkɛhɔ zo yɛkɛboa ahonlekpalɛma yɛkɛmaa bɛkɛnwu Gyihova na bɛkɛhulo ye kɛmɔ yɛlɛyɛ la.