Asoo Ɛze?

Kɛ ɔyɛle mɔɔ ɛdoavolɛ Sitivin holale ziele ɔ nwo dii wɔ ɛkpɔlɛ mekɛ nu ɛ?

EKPUNLI bie mɔɔ ati yɛ se la kpɔle Sitivin. Ndɛnebuavolɛma 71 a ɛnee wɔ Sanhedelin ne mɔɔ le kɔɔto kpole wɔ Yizilayɛ la anu a. Menli ɛhye mɔ boka mrenyia mɔɔ lɛ tumi kpole wɔ maanle ne anu la anwo. Ɛsɔfo Kpanyinli Kayafase mɔɔ dɛnlanle ebia nu wɔ kɔɔto ɛkɛ ne wɔ siane ekyi mɔɔ ɛpɛ nu, wɔ mekɛ mɔɔ bɛbuale Gyisɛse ewule fɔlɛ la a vɛlɛle bɛ a. (Mat. 26:57, 59; Gyi. 6:8-12) Mɔɔ ɛnee bɛlɛmaa menli arali ɔ nwo daselɛ adalɛ la, bɛnwunle azibɛnwo debie bie wɔ Sitivin anwo​—ɛnee ɔ nyunlu “ɛyɛ kɛ anwumabɔvolɛ nyunlu.”​—Gyi. 6:13-15.

Kɛ ɔyɛle mɔɔ Sitivin holale ziele ɔ nwo dii wɔ tɛnlabelɛ ɛzulolɛ ɛhye anu ɛ? Kɛ mɔɔ Nyamenle sunsum ne wɔ ɔ nwo zo la ati, kolaa na bɛ nee ye ahɔ Sanhedelin ne anyunlu la, ɛnee ɔ nye ɛbolo ye ɛzonlenlɛ gyima ne anwo. (Gyi. 6:3-7) Mɔɔ bɛlɛdi ye edwɛkɛ la, sunsum ko ne ala yɛle gyima wɔ ɔ nwo zo. Ɔkyekyele ɔ rɛle na ɔhakyehakyele ye ninyɛne bie mɔ. (Dwɔn 14:16, ɔbdw.) Mɔɔ Sitivin ɛlɛfa akɛnrasesebɛ aha edwɛkɛ mɔɔ bɛyɛ nwolɛ kɛlɛtokɛ wɔ Gyima ne tile 7 la, sunsum nwuanzanwuanza ne hakyele ye edwɛkɛ mɔɔ bo 20 wɔ Hibulu Ngɛlɛlera ne anu. (Dwɔn 14:26) Noko Sitivin diedi yɛle kpole wɔ mekɛ mɔɔ ɔnwunle Gyisɛse wɔ yekile nu kɛ ɔgyi Nyamenle asa fema zo la.​—Gyi. 7:54-56, 59, 60.

Bie a kenle ko dedee yɛbayia ɛkpɔlɛ anzɛɛ tɛnlabelɛ mɔɔ ka ɛzulolɛ la. (Dwɔn 15:20) Saa yɛsukoa Nyamenle Edwɛkɛ ne dahuu na yɛyɛ dɔɔnwo wɔ ɛzonlenlɛ gyima ne anu a, yɛmaa Gyihova sunsum ne nyia adenle yɛ gyima wɔ yɛ nwo zo. Eza yɛbanyia anwosesebɛ yɛagyinla ɛkpɔlɛ nloa na yɛazie yɛ nwo dii.​—1 Pita 4:12-14.