Asoo Ɛze?

Asoo ɛnee bɛkola bɛfa ngyinlazo mɔɔ wɔ Mosisi Mɛla ne anu la bɛsiezie akɛsakɛsa biala wɔ tete Yizilayɛ ɔ?

ƆYƐ A. Suzu neazo ko anwo. Mɛla ne 24:14, 15 ka kɛ: “Saa bɛbɔ awie ɛkpa na ahenle le ehyianli a anrɛɛ bɛmmasisi ye. Saa ɔle bɛ mediema ne mɔ anu ko o, saa ɔle ɛyɛvolɛ mɔɔ wɔ bɛ azɛlɛ ne azo . . . o, bɛmmasisi ye. Saa bɛanyɛ ye zɔhane a, ɔbazu yeavɛlɛ [Gyihova] yeatia bɛ wɔ nwolɛ, na ɛhye le ɛtane mɔɔ batia bɛ a.”

Bɛhɛlɛle modolɛ edwɛkɛ bie mɔɔ le kɛ ɛhye la wɔ ɛvoya nsuu K.Y.M. Bɛnwunle ye wɔ ɛleka bie mɔɔ bikye Ahyedɔdo la. Ɔbayɛ kɛ bɛhɛlɛle bɛmaanle ɛya nu gyimayɛvo bie mɔɔ bɛhanle kɛ yeangola yeanva ma dodo bie mɔɔ bɛkpondɛ bɛavi ye ɛkɛ yeammaa la, edwɛkɛ ɛhye mɔɔ bɛhɛlɛle ye wɔ buakɛ sinli bie anwo la ka kɛ: “Mɔɔ wɔ sonvolɛ [modolɛnli ne] dele bɛyɔba ne vale ziele kenle ekyi bie mɔɔ ɛpɛ nu la, Shobay ara nrenyia Hoshayahu ravale wɔ sonvolɛ ne tɛladeɛ. . . . Me gɔnwo mɔ mɔɔ ɛnee bɛ nee me ɛlɛbu bɛyɔba ne wɔ ewia ne anu la amuala di me daselɛ . . . kɛ mɔɔ meha la le nɔhalɛ. Menli ɛtane biala anwo fɔlɛ. . . . Saa amɛnlado ne ɛnnwu ye kɛ ɔle ye gyima kɛ ɔbalie ye sonvolɛ tɛladeɛ ne yeamaa ye a, nwu ye anwunvɔne na fa maa ye! Ɔnle kɛ ɛyɛ koonwu wɔ mekɛ mɔɔ wɔ sonvolɛ asa ɛtɛkanle ye tɛladeɛ ne la.”

Tetedwɛkɛ kɛlɛvo Simon Schama ka kɛ: “Modolɛ edwɛkɛ ɛhye ɛngile kɛ gyimayɛvo ne anye zo ɛda ye la ati a ɔkulo kɛ ɔ sa ka ye tɛladeɛ ne a. Eza ɔbayɛ kɛ ɛnee gyimayɛvo ne ze Baebolo nu mɛla bie titili edwɛkɛ mɔɔ wɔ Sɛlɛvolɛma nee Mɛla ne anu mɔɔ tendɛ tia ehyianvolɛma mɔɔ bɛsisi bɛ la.”