‘Yɛyɛ Gyihova Mo Kɛ Yemaa Wɔ Nrɛlɛbɛ Kpalɛ!’

DEVIDI mɔɔ dɛnlanle aze wɔ tete Yizilayɛ la a hanle edwɛkɛ ɛhye hanvole raalɛ bie mɔɔ rayiale ye la a. Ɛnee bɛfɛlɛ ye Abegeli. Duzu a maanle Devidi hanvole ye a, na boni a yɛsukoa yɛfi ye neazo ne anu a?

Devidi yiale agyalɛ raalɛ ɛhye wɔ mekɛ mɔɔ ɛnee ɔlɛnriandi Belemgbunli Sɔɔlo la. Abegeli ahu a le Neebale, nrenyia sukoavolɛ bie mɔɔ fa ye mboane dɔɔnwo ne kɔ adidi wɔ Dwuda nyiakɛ awoka ne mɔ azo la. Devidi nee ye menli ne bɔle Neebale mboaneneavolɛma ne nee bɛ mboane ne mɔ anwo “bane.” Nzinlii Devidi zoanle ye soanvolɛma ne wɔ Neebale ɛkɛ na bɛzɛlɛle ye kɛ ɔva ‘debie biala mɔɔ ɔfa ɔmaa’ wɔ aleɛ afoa nu a ɔyɛ boɛ la ɔmaa bɛ. (1 Sa. 25:8, 15, 16) Ɛnea kɛzi Devidi nee ye menli ne bɔle Neebale menli nee ye nyɛmoa nwo bane la a, mɔɔ ɔzɛlɛle ye la ɛngyele zo.

Noko, Neebale bɔle ye duma ne mɔɔ abo kile “Koasea” la anwo ɛbɛla. Ɔbɔle Devidi atisesebɛ, yɛɛ yeandendɛ kɛnlɛma yeangile ye. Ɔti, Devidi zieziele ɔ nwo kɛ ɔkali Neebale nzenralɛ wɔ ye nyɛleɛ ɛtane ne anwo. Neebale nee ye sua nu amra bɛadua ye koasea ne anwo kakɛ.​—1 Sa. 25:2-13, 21, 22.

Kɛmɔ Abegeli nwunle esiane mɔɔ bavi ɔ hu nyɛleɛ ne anu ara la ati, ɔlale akɛnrasesebɛ ali ɔyɛle nwolɛ debie ndɛndɛ. Ɔvile ɛbulɛ nu ɔkpale Devidi kyɛlɛ ɔlua agɔnwolɛvalɛ mɔɔ ɔ nee Gyihova lɛ la ati. Ɔyɛle ngyehyɛleɛ ɔhɔmaanle Devidi mɔɔ ɔbayɛ belemgbunli la nee ye menli ne aleɛ dɔɔnwo. Devidi noko nwunle kɛ Gyihova ɛlɛdua ɔ nwo zo azi ye adenle amaa yeanli mogya nwo ɛzonle wɔ Nyamenle anyunlu. Devidi zele Abegeli kɛ: “Yɛyɛ [Gyihova] mo kɛ yemaa wɔ nrɛlɛbɛ kpalɛ ɛhye, yɛɛ nyilalɛ ɛha ɛdawɔ mumua ne kɛ wɔammaa . . . meanga mogya meangua a.”​—1 Sa. 25:18, 19, 23-35.

Ɔda ali wienyi kɛ yɛngulo kɛ yɛyɛ kɛ Neebale mɔɔ ɔngile debie kpalɛ mɔɔ awie mɔ yɛ maa ye anwo anyezɔlɛ la. Bieko, saa yɛnwu kɛ edwɛkɛ ɛtane ɛlɛba arazi a, ɔwɔ kɛ yɛbɔ mɔdenle yɛyɛ nwolɛ debie ndɛndɛ. Ɛhɛe, yɛbahola yɛaha mɔɔ edwɛndolɛnli ne hanle hilele Nyamenle la bie: “Maa me nrɛlɛbɛ nee adwenlenubukelɛ.”​—Edw. 119:66.

Awie mɔ banwu kɛ yɛze nrɛlɛbɛ. Saa bɛka ye bɛ nloa anzɛɛ bɛanga bɔbɔ a, bie a bɛbade nganeɛ kɛ Devidi mɔɔ ɔhanle kɛ: “Yɛyɛ [Gyihova] mo kɛ yemaa wɔ nrɛlɛbɛ kpalɛ” la.