“Yɛlale Mɔdenlebɔlɛ Nee Ɛlɔlɛ Ali Yɛdɛlale Mekɛ Biala”

MEKƐ mɔɔ menli 8,000 yiale wɔ nyianu asalo ɛkɛ wɔ zɔhane Yalɛ nwonlomɔ ne wɔ September 1922 la, ɛkɛ ne yɛle wuluwulu. Ebianutɛnlavolɛ ne hanle kɛ, mekɛ titili ɛhye anu, awie biala bahola avinde, noko bɛnrɛmaa ye adenle bɛnrɛmaa ɔnrɛwolo nuhua bieko.

Bɛdole “Ayɛlɛyelɛ Edwɛne” bɛbɔle gyimalilɛ ne abo, ɛhye anzi Joseph F. Rutherford hɔgyinlanle tendɛvolɛ ɛkponle ne anzi. Ɛnee tievolɛma dɔɔnwo ɛnze mɔɔ bazi a. Wuluwulu ne ati, ɛnee bɛ nuhua ekyii bie ala a luolua nu a. Tendɛvolɛ ne zɛlɛle bɛ kɛ bɛdɛnla aze bɛdie edwɛkɛ ne. Mɔɔ ɛdendɛlɛ ne bɔle ɔ bo la, asoo bɛ nuhua bie nwunle ɛdanlɛ kpole ne mɔɔ bɛbubu bɛhenda bama ne anwuma la ɔ?

Adiema Rutherford ɛdendɛlɛ ne edwɛkɛtile ne se, “Anwuma belemgbunlililɛ ne ɛbikye.” Ɔhilehilele kɛzi ngapezoma ne vale akɛnrasesebɛ bɔle Belemgbunlililɛ ne mɔɔ ɛlɛba la anwo nolo la wɔ kɛyɛ dɔnehwele ko nee foa anu, na ɛnee ɔ ne dielie asalo ɛkɛ ne amuala. Mɔɔ ɔdwula ye ɛdendɛlɛ ne la, ɔbizale kɛ: “Bɛdie bɛdi kɛ anyunlunyia Belemgbunli ne ɛbɔ ye tumililɛ bo ɔ?” Tievolɛma ne vale ɛnelɛ kpole liele zo kɛ: “Ɛhɛe!”

Adiema Rutherford vale ɛnelɛ kpole hanle kɛ, “Ɛnee bɛzia bɛhɔ ɛya ne anu, bɛmɛ mɔɔ bɛle anwuma anwumanli Nyamenle ne amra la. Bɛnlea, Belemgbunli ne ɛlɛdi tumi! Bɛdabɛ a bɛbabɔ ye nolo a. Ɛhye ati, bɛbɔ, bɛbɔ, bɛbɔ.”

Ɛkɛ ne ala, ɛdanlɛ ne mɔɔ henda bama ne anwuma la anu bukele, na ɛnee bɛhɛlɛ nu kɛ: “Bɛbɔ Belemgbunli Ne Nee Belemgbunlililɛ Ne Nolo.”

Ray Bopp hanle kɛ, “Tievolɛma ne anye liele kpole kpalɛ.” Anna Gardner hanle kɛzi bɛ sa nu ɛbɔlɛ ne maanle “sua ne anu kpudwule la anwo edwɛkɛ.” Fred Twarosh hanle kɛ, “Tievolɛma ne amuala bɔle nu dwazole.” Evangelos Scouffas hanle kɛ: “Ɛbaha kɛ tumi kpole bie a maanle yɛ zo gyinlanle ɛkɛ a, na yɛgyi ɛkɛ ne la ɛnee yɛlɛsu.”

Ɛnee tievolɛma ne anu dɔɔnwo bɔ Belemgbunlililɛ edwɛkpa ne nolo. Noko kɛkala bɛnwu ye wienyi kɛ ɔwɔ kɛ bɛyele bɛ nwo. Ethel Bennecoff hanle kɛ, Baebolo Sukoavoma ne [hɔlale] “mɔdenlebɔlɛ nee ɛlɔlɛ ali dɛlale mekɛ biala.” Odessa Tuck mɔɔ ɛnee yeli ɛvolɛ 18 la kavi nyianu ne abo la, ɛnee yebɔ kpɔkɛ kɛ ɔbalie “Nwane a kɛhɔ kɛmaa yɛ a?” ɛsalɛdolɛ ne azo. Ɔhanle kɛ: “Ɛnee menze ɛleka ne, kɛzi yɛbaha ye nee mɔɔ yɛbaha la. Debie ko a le kɛ, ɛnee mekulo kɛ meyɛ kɛ Ayezaya “mɔɔ ɔhanle kɛ: ‘Mewɔ ɛke! Soa me’” la. (Aye. 6:8) Ralph Leffler hanle kɛ: “Kenle titili zɔhane a yɛbɔle ɔ bo kɛ yɛbɔ Belemgbunlililɛ edwɛkpa ne mɔɔ kɛkala yedwu ewiade amuala la nolo bo a.”

Ɔnyɛ azibɛnwo kɛ 1922 Cedar Point, Ohio, nyianu ɛhye anwo hyia wɔ yɛ tetedwɛkɛ nu la! George Gangas hanle kɛ: “Nyianu zɔhane maanle mendele nganeɛ kɛ ɔnle kɛ memaa nyianu biala kpa me ti.” Ɔti, yeammaa nyianu biala amkpa ɔ ti. Julia Wilcox hɛlɛle kɛ: “Mekɛ biala mɔɔ bɛkɛha Cedar Point 1922 nyianu ne anwo edwɛkɛ wɔ yɛ mbuluku ne mɔ anu la, me nye die kpalɛ. Dahuu meka kɛ, ‘Meda wɔ ase Gyihova, kɛ ɛmaanle mengɔle bie la.’”

Ɔbayɛ kɛ, yɛ nuhua dɔɔnwo kakye kɛzi nyianu bie maanle yɛ nye liele na ɔmaanle yɛlale mɔdenlebɔlɛ nee ɛlɔlɛ ali yɛhilele yɛ Nyamenle kpole ne nee ye Belemgbunli ne la. Saa yɛkakye ninyɛne ɛhye mɔ a, ɔka yɛdayɛ noko ɔmaa yɛka kɛ: “Meda wɔ ase Gyihova, kɛ ɛmaanle mengɔle bie la.”