Kpuya Mɔɔ Kye Adwenle

ADWENLE mɔɔ menli lɛ ye wɔ ngoane nee ewule nwo la gua ye ngakyile. Bie mɔ te nganeɛ kɛ saa sonla wu a, ɔtɛnla aze bieko wɔ ɛleka fofolɛ. Bie mɔ noko te nganeɛ kɛ bɛbazia bɛawo bɛ fofolɛ na bɛadɛnla aze bieko. Eza bie mɔ dwenle kɛ saa yɛwu a ɛnee yewie.

Bie a ɔlua kɛzi bɛtetele wɔ anzɛɛ wɔ amaamuo ti, ɛdawɔ noko ɛlɛ mɔɔ ɛdie ɛdi a. Kɛ mɔɔ adwenle mɔɔ menli lɛ ye wɔ ewule nzi la gua ye ngakyile la ati, bie a ɛbabiza kɛ, nienwu a yɛbanyia kpuya ɛhye mɔɔ kye adwenle la anwo mualɛ a?

Ɛzonlenlɛ nu mgbanyima ɛva ɛvolɛ dɔɔnwo ɛhilehile kɛ sonla ɛkɛlɛ ɛnwu ɛlɛ. Menli kɔsɔɔti mɔɔ wɔ ɛzonlenlɛ ngakyile le kɛ Kilisiene, Hindu, Dwuu, Ngɛnlamo nee mɔɔ bokɛboka nwo la die di kɛ ɛkɛla bie wɔ sonla nu mɔɔ kɔ zo tɛnla aze wɔ sonla ne ewule nzi na ɔkɔ sunsum nu ɛleka bie. Buddhama ɛdeɛ, bɛdie bɛdi kɛ bɛsia bɛwo menli dɔɔnwo mɔɔ wu la fofolɛ. Tumi anzɛɛ anwosesebɛ bie mɔɔ wɔ bɛ nu la boa maa bɛkɔ tɛnlabelɛ kɛnlɛma bie mɔɔ bɛfɛlɛ ye Nirvana la anu.

Ɔlua ngilehilelɛ ɛhye mɔ ati, menli dɔɔnwo die di kɛ ewule buke adenle maa bɛkɔ ewiade fofolɛ bie anu. Wɔ bie mɔ afoa nu, ewule le nvasoɛ wɔ sonla ɛbɛlabɔlɛ nu, yemɔti saa sonla wu a, bɛte nganeɛ kɛ ɔle Nyamenle ɛhulolɛdeɛ. Noko duzu a Baebolo ne ka ye wɔ ɛhye anwo a? Yɛsɛlɛ wɔ toa zo kenga edwɛkɛ ɛhye. Mualɛ ne bazi ɛ nwo.