Mekɛ Mɔɔ Kulovolɛ Bie Kɛwu La

Ɛnee Bebe bikye ye papa kpalɛ. Bɛ gɔnwo kpalɛ bie a hanle edwɛkɛ ɛhye a, noko Bebe ranwunle kɛ yeankyekye ɔ rɛle emomu ɔmaanle ɔlile nyane kpalɛ. Ɔhanle ye fane dɔɔnwo kɛ, “Tɛ ye kpalɛ nu a me papa wule a.” Ɛvolɛ dɔɔnwo pɛle nu mɔɔ ɛnee Bebe ɛlɛkɛlɛ esiane ne anwo edwɛkɛ wɔ buluku bie anu la, ɛnee ɔtɛdi nyane.

Kɛ mɔɔ Bebe ranwunle ye la, ɔkyɛ na awie agyakyi nyanelilɛ, titili saa ahenle ne bikye mɔɔ ɛwu la kpalɛ a. Baebolo ne ka ewule nwo edwɛkɛ kɛ ɔle “kpɔvolɛ mɔɔ li amozi.” (1 Kɔlentema 15:26) Ewule ba yɛ nwo zo na ɔbɔ yɛ awuke mɔɔ yɛngola yɛnyɛ nwolɛ ɛhwee. Fane dɔɔnwo ne ala yɛ nye ɛnla, na ɔdie yɛ kulovolɛma ɔfi yɛ sa nu. Ngyegyelɛ mɔɔ ɔfa ɔba la ka yɛ kɔsɔɔti. Yemɔti ɔnyɛ nwanwane kɛ yɛngola yɛngyinla ewule nee nwolɛ ngyegyelɛ ne anloa la.

Bie a wɔbiza kɛ: ‘Mekɛ tendenle nyɛ a ɔdi na awie agyakyi nyanelilɛ a? Kɛ ɔkɛyɛ na awie agyinla nyanelilɛ nloa ɛ? Kɛ ɔkɛyɛ na meakyekye awie mɔ mɔɔ bɛ nwo sonla ɛwu la arɛle ɛ? Asoo anyelazo bie wɔ ɛkɛ maa yɛ kulovolɛma mɔɔ bɛwu la ɔ?’