BAEBOLO KPUYA MƆƆ BƐBUA
Mowuamra badɛnla aze bieko ɔ?
Nɔhalɛ nu Bɔvolɛ ne mɔɔ maa ngoane la kola maa bɛtɛnla aze
Gyihova Nyamenle a le ngoane Maavolɛ ne a. (Edwɛndolɛ 36:9) Asoo ndelebɛbo ɛnle nu kɛ, Nyamenle ala a bahola adwazo bɛdabɛ mɔɔ bɛwu la ɔ? Baebolo ne kyekye yɛ rɛle kɛ kenle bie ɔbayɛ ye zɔ. (Kenga Gyima ne 24:15) Noko nzɔne ati a ɔbayɛ ye zɔ a?
Mɔlebɛbo ne, ɛnee yɛ Bɔvolɛ ne bodane a le kɛ sonla badɛnla azɛlɛ ye azo dahuu. (Mɔlebɛbo 1:31; 2:15-17) Ɛhye tɛde ye bodane maa alesama. Ɔdi mɔɔ yɛlɛkɔ nu ɛnɛ la anwo nyane—ɛbɛlabɔlɛ mɔɔ nuhua le ngyegyelɛ ngome na ɔpɛ nu ndɛndɛ la.—Kenga Dwobu 14:1, 14, 15.
Nienwu a bɛdabɛ mɔɔ bɛbadwazo bɛ la badɛnla a?
Asoo Nyamenle bɔle sonla kɛ ɔdɛnla anwuma ɔ? Kyɛkyɛ. Nyamenle bɔle anwumabɔvolɛma kɛ bɛdɛnla anwuma. Ɔbɔle alesama kɛ bɛdɛnla azɛlɛ ye azo. (Mɔlebɛbo 1:28; Dwobu 38:4, 7) Mekɛ mɔɔ ɛhye wɔ yɛ adwenle nu la, suzu menli mɔɔ Gyisɛse dwazole bɛ la anwo nea. Ɔdwazole bɛ ɔmaanle bɛdɛnlanle azɛlɛ ye azo. Zɔhane ala a menli dɔɔnwo mɔɔ bɛbadwazo bɛ kenle bie la bazia adɛnla azɛlɛ ye azo a.—Kenga Dwɔn 5:28, 29; 11:44.
Noko, Nyamenle ɛkpa menli ekyi mɔɔ bɛbadwazo bɛ bɛahɔ anwuma, na bɛanyia sunsum nu sonlabaka. (Luku 12:32; 1 Kɔlentema 15:49, 50) Bɛdabɛ mɔɔ bɛbadwazo bɛ bɛahɔ anwuma la nee Kelaese bali belemgbunli wɔ azɛlɛ ye azo.—Kenga Yekile 5:9, 10.