Kɛzi Nyamenle Bu Konle Ɛ?

Kɛzi ɛdwenle nwolɛ ɛ? Nyamenle die konle to nu ɔ? Saa ɔle zɔ a, ɛnee afoa boni a ɔgyi wɔ konle nu ɛnɛ a? Saa ɛnyia kpuya ɛhye mɔ anwo mualɛ a ɔbahola yeaboa wɔ yeamaa wɔazuzu adwenle nee nganeɛ mɔɔ ɛte ye wɔ konle nwo la anwo. Kɛ neazo la, saa ɛze kɛ Nyamenle anye die konle nwo na eza ɔwɔ afoa ne mɔɔ ɛgyi bɛ nzi la a, bie a ɛ nye balie na wɔanyia anwodozo kɛ bɛbali konim. Noko akee, saa ɛnwu kɛ Nyamenle wɔ afoa ne mɔɔ ɛngyi bɛ nzi wɔ konle nu la a, kɛzi ɛbade nganeɛ ɛ? Bie a ɔbamaa wɔadwenle edwɛkɛ ne anwo bieko.

Debie mɔɔ anwo hyia kpalɛ la wɔ ɛkɛ. Saa ɛnwu kɛzi Nyamenle bu konle la a ɔbamaa wɔanwu kɛzi Nyamenle de la. Saa ɛboka menli mgbe dɔɔnwo ne mɔɔ konle ɛmaa bɛnwu amaneɛ la anwo a, ɔda ali kɛ ɔwɔ kɛ ɛnyia kpuya ɛhye anwo mualɛ, Kɛ mɔɔ bie mɔ die di la, asoo Nyamenle a maa menli ko anzɛɛ ɔmaa bɛnwu amaneɛ mɔɔ konle fa ba la ɔ? Asoo ɔndwenle menli mɔɔ bɛlɛnwu amaneɛ la anwo ɔ?

Bie a ɔbazi ɛ nwo kɛ mualɛ mɔɔ Baebolo ne fa maa la le ngakyile fi nzuzulɛ zɔhane mɔ anwo. Bieko, ɔvi tete badwu ɛnɛ, kɛzi Nyamenle bu konle la ɛtɛkakyile. Maa yɛzuzu mɔɔ Baebolo ne ka fale kɛzi Nyamenle bule konle wɔ tete ne nee ɛvoya mɔɔ limoa, wɔ mekɛ mɔɔ Gyisɛse rale azɛlɛ ye azo la anwo. Ɛhye baboa yɛ yeamaa yɛanwu kɛzi Nyamenle bu konle ɛnɛ yɛɛ saa alesama bahɔ zo aho kenle bie a.