EDWƐKƐ TITILI
Gyihova Alasevolɛ A Le Nwane Mɔ?
“Meze Mike kpalɛ. Ɔle Gyihova Dasevolɛ. Noko ye asɔne ne si me nwo. Gyihova a le nwane? Duzu ati a Alasevolɛ ne mɔ ɛnli ɛvolɛ a? Asoo Mike ɛva ɔ nwo ɛwula asɔne ngakyile bie anu ɔ?”—Becky, California, U.S.A.
“Mekɛ mɔɔ me kpalɛzo amra bɔle ɔ bo kɛ bɛ nee Gyihova Alasevolɛ ne mɔ sukoa Baebolo ne la, membizale me nwo kɛ: ‘Duma Gyihova Alasevolɛ ne kile nzɔne? Asɔne ɔdaye ɔlɛ duma zɛhae!’”—Zenon, Ontario, Canada.
“Ɛnee me nee me ye suzu kɛ yɛgyakyi asɔne ɛhɔlɛ la ati a Gyihova Alasevolɛ ne mɔ ba yɛ nwo ɛkɛ a. Yemɔti yɛhanle kɛ saa asɔne titili ne mɔ angola amboa yɛ a, ɛnee Gyihova Alasevolɛ mɔɔ bɛde bɛ nwo la ɛnrɛhola ɛnrɛboa yɛ.”—Kent, Washington, U.S.A.
“Nɔhalɛ nu, ɛnee menze bɛ menli holɛ nee mɔɔ bɛdie bɛdi la.”—Cecilie, Esbjerg, Denmark.
Bie a ɛnwu bɛ kɛ bɛlɛka edwɛkɛ ne wɔ azua nu anzɛɛ bagua nu, bɛlɛfa mbuluku bɛamaa na bɛlɛyɛ Baebolo ɛzukoalɛ mɔɔ bɛndua ɛhwee a. Bie a ɛliele magazine ɛhye bie ɛvile bɛ nuhua ko ɛkɛ. Noko, bie a ɛbabiza ɛ nwo kɛ duzu menli a le Gyihova Alasevolɛ? Bie a ɛ nee menli mɔɔ yɛha bɛ nwo edwɛkɛ la yɛ adwenle.
Saa edwɛkɛ ɛhye mɔ bie gyegye wɔ a, nienwu a ɛkɔ a ɛbanyia mualɛ a? Kɛ ɔkɛyɛ na wɔazukoa Gyihova Alasevolɛ diedi, kɛzi bɛbɔ bɛ gyima ne nee ɛleka mɔɔ bɛsonle la anwo kakɛ, yɛɛ deɛmɔti bɛba wɔ sua nu na bɛ nee wɔ tendɛ wɔ gua zo la ɛ?
Cecilie mɔɔ yɛha ɔ nwo edwɛkɛ la se, “Ɛnee mekenga Gyihova Alasevolɛ ne mɔ anwo edwɛkɛ dɔɔnwo wɔ Yintanɛte zo. Mendele bɛ nwo edwɛkɛ mɔɔ ɛnle nɔhalɛ, eza mendele kɛ bɛyɛ nyeyenu. Ɛhye ati, menyianle bɛ nwo adwenle mɔɔ ɛndenrɛ.” Nzinlii, ɔ nee Gyihova Alasevolɛ ne mɔ dendɛle na ɔnyianle ye kpuya ne mɔ anwo mualɛ mɔɔ maa ahunlundwolɛ la.
Ɛkulo kɛ ɛnyia kpuya mɔɔ ɛlɛ ye wɔ Gyihova Alasevolɛ ne mɔ anwo la anwo mualɛ kpalɛ ɔ? Yɛlɛsi wɔ adua kɛ kɔ Gyihova Alasevolɛ ne mɔ mɔɔ yɛle magazine ɛhye la ɛkɛ na ɛbanyia nwolɛ mualɛ kpalɛ. (Mrɛlɛbulɛ 14:15) Yɛdie yɛdi kɛ edwɛkɛ ne mɔɔ doa zo la baboa wɔ yeamaa wɔanwu yɛ menli holɛ, yɛ diedi na wɔade yɛ gyima ne abo kpalɛ.