ASOO ƐZE?

Kɛmɔ Baebolo ne ka la, duzu a edwɛkɛkpɔkɛ sonvolɛ nrenya abo kile a?

Ɔyɛ a, bɛfa edwɛkɛkpɔkɛ ne bɛgyinla ɛkɛ bɛmaa nrenya mɔɔ bɛza ye la. Wɔ Baebolo mekɛ zo, ɛnee bɛsa mrenya bie mɔ bɛfa bɛtwe bɛ nzo anzɛɛ mɔɔ bɛhye bɛ nuokɛ anzɛɛ mɔɔ bɛle ngɛkɛlɛ la. Ɛnee mrenya mɔɔ di nɔhalɛ mɔɔ bɛza bɛ la nea mraalɛ nwo zo wɔ alehelɛ azua nu. Kɛ neazo la, sonvolɛ mrenya Higae nee Hyeeyahyegaze mɔɔ nleanle Pɛhyea Belemgbunli Ahazelɔse, mɔɔ bɛkile kɛ ɔle Zɛzɛse 1 la aye mɔ nee ye nwewe ne mɔ anwo zo.​—Ɛseta 2:3, 14.

Noko akee, tɛ bɛdabɛ mɔɔ Baebolo ne fɛlɛ bɛ sonvolɛ mrenya la amuala a ɛnee bɛsa bɛ a. Nwomama bie mɔ ka kɛ ɛnee bɛfa edwɛkɛkpɔkɛ ɛhye noko bɛgyinla ɛkɛ bɛmaa kpanyinli mɔɔ yɛ gyima wɔ belemgbunli sua nu la. Ɛhye ati a edwɛkɛkpɔkɛ ne fane Yibɛdemɛlɛke mɔɔ le Gyɛlɛmaya agɔnwo, nee Yiteyopeanli ne mɔɔ edwɛkpakavolɛ Felepe lile ye daselɛ mɔɔ bɛambɔ ye duma la anwo la. Ɔda ali kɛ, ɛnee Yibɛdemɛlɛke le sonvolɛ kpanyinli, mɔɔ ɛnee ɔlɛ adenle ɔkɔ Belemgbunli Zɛdikaya ɛkɛ. (Gyɛlɛmaya 38:7, 8) Bɛha Yiteyopeanli ne anwo edwɛkɛ kɛ ɔnea alehelɛ gya zo na ‘ɔhɔle Nyamenle ɛzonlenlɛ wɔ Gyɛlusalɛm’ la.​—Gyima ne 8:27.

Kɛmɔti a Baebolo mekɛ zo mboaneneavolɛma ye mboane fi mbɔnkye avinli ɛ?

Gyisɛse ka kenlebie ndɛnebualɛ ne anwo edwɛkɛ la, ɔzele kɛ: ‘Mekɛ mɔɔ medame Sonla Ra, menwɔra me anyunlunyia ne anu la, mebahyɛ bɛ nuhua nwiɔ, kɛmɔ mboaneneavolɛ ye mboane fi mbɔnkye avinli la.’ (Mateyu 25:​31, 32) Kɛmɔti a mboaneneavolɛ bahyɛ nyɛmoa ɛhye mɔ anu ɛ?

Fane dɔɔnwo ne ala, bɛfa mboane nee mbɔnkye bɛbɔ nu bɛkɔ adidi wɔ alehyenlɛ ne anu. Ɔdwu nɔsolɛ nu a, bɛgua bɛ tunli nu amaa bɛabɔ bɛ nwo bane bɛavi nane anwo ɛzulolɛ, nwule nee ɛyɛyɛlɛ nwo. (Mɔlebɛbo 30:​32, 33; 31:​38-40) Bɛgua nyɛmoa ekpunli nwiɔ ɛhye wɔ tunli ngakyile nu amaa bɛabɔ mboane mɔɔ bɛle bɛtɛɛ la anwo bane, titile mboane mbelɛ nee mboane mralɛ bɛavi mbɔnkye mɔɔ anye yɛ se la anwo na bɛamboda bɛ. Buluku bie ka kɛ mboaneneavolɛ ne eza ye mboane fi mbɔnkye avinli wɔ mekɛ mɔɔ “mboane ne mɔ ɛlɛnrenzɛ, bɛlɛtwihwi bɛ nyɛfonzule, na bɛlɛpepɛ bɛ nwo enrinli” la. (All Things in the Bible) Yemɔti Gyisɛse ɛrɛlɛ ne twe adwenle kɔ ninyɛne mɔɔ ɛnee ye tievolɛma mɔɔ bɛsie mboane wɔ tete Yizilayɛ la ze ye kpalɛ la azo.