EDWƐKƐ TITILE | ASOO NYAMENLE DWENLE Ɛ NWO?
Nyamenle Kola Kyekye Ɛ Rɛle
‘Nyamenle mɔɔ kyekye bɛdabɛ mɔɔ bɛ rɛle ɛbɔ arɛle la, kyekyele yɛ rɛle.’—2 KƆLENTEMA 7:6.
“Nyamenle Ara ne . . . hulole me na ɔdole ye ngoane aze ɔmanle me.”—GALEEHYEAMA 2:20
DEƐMƆTI BIE MƆ ƐNLIE ƐNLI: Saa bɛhyia arɛlekyekyelɛ nwo ɛsesebɛ bɔbɔ a, menli bie mɔ te nganeɛ kɛ ɔle angomedi kɛ bɛbazɛlɛ Nyamenle kɛ ɔboa bɛ ɔmaa bɛgyinla bɛ ngyegyelɛ nloa. Raalɛ bie mɔɔ bɛfɛlɛ ye Raquel la hanle kɛ, “Saa menea kɛzi menli dɔɔnwo mɔɔ wɔ ewiade la yia ngyegyelɛ kpole la a, me ɛdeɛ ne ɛnzɔho ɛhwee yemɔti ɔmmaa menzɛlɛ Nyamenle moalɛ.”
MƆƆ NYAMENLE EDWƐKƐ NE KILEHILE: Nyamenle ɛlumua ɛva ɔ nwo ɛlie alesama edwɛkɛ nu wɔ nwanwane adenle zo kɛ ɔboa bɛ na yeakyekye bɛ rɛle. Ɛnɛ, ɛtane wɔ awie biala mɔɔ wɔ azɛlɛ ye azo la anwo—sinlidɔlɛ mɔɔ ɔmmaa yɛngola yɛnyɛ debie mɔɔ di munli mɔɔ Nyamenle kpondɛ la. Noko akee, Nyamenle “[hulole] yɛ na ɔzoanle ɔ Ra ne [Gyisɛse Kelaese] kɛ ɔrayɛ yɛ ɛtane ne mɔ anwo mgbɔdalɛdeɛ.” (1 Dwɔn 4:10) Ɔlua Gyisɛse ewule afɔlebɔlɛ ne azo, Nyamenle ɛmaa yɛnyia ɛtanefakyɛ, adwenle mɔɔ anu te, yɛɛ dahuu ngoane nwo anyelazo wɔ anzondwolɛ ewiade fofolɛ nu.a Noko asoo ɔbɔle zɔhane afɔle ne ɔmanle alesama kɔsɔɔti ala, anzɛɛ ɔkile kɛ Nyamenle anye die ɛ nwo?
Suzu ɛzoanvolɛ Pɔɔlo anwo. Gyisɛse afɔlebɔlɛ ne hanle ye manle ɔhanle kɛ: ‘Mede ngoane nu kɛ medie Nyamenle Ara ne mɔɔ hulole me na ɔdole ye ngoane aze ɔmanle me la medi la ati ɔ.’ (Galeehyeama 2:20) Nɔhalɛ nu, Gyisɛse wule kolaa na Pɔɔlo arayɛ Keleseɛnenli. Noko, Pɔɔlo bule zɔhane afɔlebɔlɛ ne kɛ ɔ ti anwo ahyɛlɛdeɛ.
Gyisɛse ewule afɔlebɔlɛ ne le Nyamenle ahyɛlɛdeɛ maa ɛdawɔ noko. Ahyɛlɛdeɛ ɛhye kile kɛ ɛsonle bolɛ wɔ Nyamenle anye zo. Ɔkola ɔmaa wɔ “[arɛlekyekyelɛ] mɔɔ ɛnlɛ awieleɛ nee anyelazo kpalɛ,” na ‘ɔmaa ɛyɛ nla wɔ edwɛkɛ nee gyima kpalɛ muala anu.’—2 Tɛsalonaekama 2:16, 17.
Noko, Gyisɛse vale ye ngoane bɔle afɔle kɛyɛ ɛvolɛ 2,000 mɔɔ ɛze ɛhɔ la. Daselɛ boni a kile kɛ Nyamenle kulo kɛ ɛbikye ye ɛnɛ a?
a Amaa wɔazukoa Gyisɛse afɔlebɔlɛ ne anwo edwɛkɛ dɔɔnwo la, nea Duzu A Baebolo ne Kilehile Amgba A? buluku ne mɔɔ Gyihova Alasevolɛ ɛyɛ la tile 5.