Mɔlebɛbo, Baebolo buluku ne mɔɔ lumua la kilehile kɛzi ewiade ne bɔle ɔ bo la anu sikalɛ kɛ: “Mɔlebɛbo ne Nyamenle bɔle anwuma nee aze.” (Mɔlebɛbo 1:1) Mekɛ mɔɔ Nyamenle bɔle mbaka nee nane wiele la, ɔbɔle Adam nee Yive, alesama mɔɔ lumua la. Ɛnee bɛle ngakyile wɔ nane ne mɔ anwo ɔluakɛ alesama lɛ Nyamenle mumua ne subane, mɔɔ maa bɛkola bɛfi bɛ ɛhulolɛ nu bɛyɛ debie la bie. Yemɔti ɛnee bɛdi bɛ nyɛleɛ nwo ɛzonle. Saa bɛdiele Nyamenle adehilelɛ a, anrɛɛ bɛbanyia Nyamenle bodane ne anu kyɛfoa kɛ ewiade amuala alesama abusua mɔɔ babɔ ɛbɛla mɔɔ anzondwolɛ wɔ nu, na bɛanyia ngoane mɔɔ di munli wɔ azɛlɛ ye azo dahuu la awovolɛ mɔɔ lumua la.
Noko akee, anwumabɔvolɛ anzɛɛ sunsum nu abɔdeɛ bie luale adenle mɔɔ ɔnyianle la azo na ɔvale alesama ɔlile gyima wɔ adenle ɛtane zo. Ɔlua ɛhye azo ɔrayɛle Seetan, mɔɔ kile “Dwazotiavolɛ” la. Seetan luale ɛwɔlɛ nwo zo dendɛle na ɔbɛlɛbɛlale Yive na ɔzele ye kɛ ɔkpo Nyamenle adehilelɛ a ɔ nwo badɔ ye. Adam nee Yive lile Seetan anzi na bɛhwenle bɛ nwo bɛvile bɛ Yɛvolɛ ne anwo. Ɔlua kpɔkɛ ɛtane mɔɔ bɛzile la ati, yɛ awovolɛ ne mɔɔ lumua la annyia dahuu ngoane na bɛvale ɛtane, sinlidɔlɛ nee ewule mɔɔ yɛkoati a ɔnyɛ boɛ la bɛwole yɛ muala.
Ndɛndɛ ne ala, Nyamenle hilele kpɔkɛ mɔɔ yebɔ kɛ ɔyɛ tɛnlabelɛ ne mɔɔ yɛ alɔbɔlɛ la anwo debie na yeamaa Adam abozoamra anyia adenle mɔɔ bɛbalua zo bɛanyia dahuu ngoane la. Nyamenle hanle dole ɛkɛ ne kɛ ‘abozonli’ bie—sonla titile bie—bazɛkye Seetan bɔkɔɔ na yeaye amaneɛnwunlɛ kɔsɔɔti mɔɔ Seetan, Adam, nee Yive ɛva ɛra la yeavi ɛkɛ. (Mɔlebɛbo 3:15) Nwane a bayɛ ‘abozonli’ ɛhye a? Mekɛ a bahile a.
Zɔhane mekɛ ne ɛtɛdwule la, Seetan hɔle zo bɔle mɔdenle kɛ ɔsi Nyamenle bodane kpalɛ ne adenle. Ɛtane nee amumuyɛ hɔle ɔ nyunlu ndɛndɛ. Nyamenle bɔle kpɔkɛ kɛ ɔfa azuyilɛ yeazɛkye amumuyɛma ne. Ɔmanle tenlenenli Nowa adehilelɛ kɛ ɔbobɔ ɛlɛne—ɛlɛka kpole bie mɔɔ tulu azule nye—amaa yealie ɔ nwo nee ye abusua ne, yɛɛ nane ne mɔ mɔɔ bɛhanle kɛ ɔva ɔhɔ ɛlɛne ne anu la ngoane.
Azuyilɛ ne bɔle ɔ bo la, ɔ nzi ɛvolɛ ko anu, Nowa nee ye abusua ne vi ɛlɛne ne anu dwule hɔle azɛlɛ mɔɔ zolɛ te la azo. Noko ɛnee ‘abozonli’ ne ɛtɛbale.
