BAEBOLO KPUYIA MƆƆ BƐBUA

Asoo Nyamenle tie asɔneyɛlɛ kɔsɔɔti?

Nyamenle tie maanle kɔsɔɔti anu menli. (Edwɛndolɛ 145:18, 19) Ye Edwɛkɛ, Baebolo ne maa yɛ anwosesebɛ kɛ yɛha debie biala mɔɔ hyia yɛ la anwo edwɛkɛ yɛhile ye. (Felepaema 4:6, 7) Noko, Nyamenle anye ɛnlie asɔneyɛlɛ bie mɔ anwo. Kɛ neazo la, saa yɛka asɔneyɛlɛ mɔɔ yɛhye yɛgua yɛ ti anu la fane dɔɔnwo a ɔnzɔ ɔ nye.—Kenga Mateyu 6:7.

Bieko, Gyihova anye ɛnlie menli mɔɔ anye fuu bu bɛ nye gua ye mɛla zo la anwo. (Mrɛlɛbulɛ 28:9) Kɛ neazo la, wɔ Baebolo mekɛ zo, Nyamenle andie Yizilayɛma mɔɔ hanle mogya guale la. Ɔda ali wienyi kɛ, ɔwɔ kɛ yɛyɛ ninyɛne bie mɔ amaa Nyamenle adie yɛ asɔneyɛlɛ.—Kenga Ayezaya 1:15.

Duzu a ɔwɔ kɛ yɛyɛ na Nyamenle adie yɛ a?

Yɛnrɛhola yɛnrɛhɔ Nyamenle anyunlu wɔ asɔneyɛlɛ nu mɔɔ yɛnlɛ diedi a. (Gyemise 1:5, 6) Ɔwɔ kɛ yɛdie yɛdi kɛ ɔwɔ ɛkɛ yɛɛ ɔdwenle yɛ nwo. Yɛbahola yɛazukoa Baebolo ne yeamaa yɛ diedi ne ayɛ kpole, ɔluakɛ nɔhalɛ diedi gyi daselɛ nee ɛwɔkɛ mɔɔ wɔ Nyamenle Edwɛkɛ ne anu la azo.—Kenga Hibuluma 11:1, 6.

Ɔwɔ kɛ yɛbɛlɛ yɛ nwo aze na yɛyɛ asɔne nɔhalɛ nu. Gyisɛse bɔbɔ mɔɔ le Nyamenle Ara la bɛlɛle ɔ nwo aze wɔ mekɛ mɔɔ ɔlɛyɛ asɔne la. (Luku 22:41, 42) Yemɔti, kɛ anrɛɛ yɛbaha mɔɔ ɔwɔ kɛ Nyamenle yɛ yɛahile ye la, ɔwɔ kɛ yɛbɔ mɔdenle kɛ yɛbagenga Baebolo ne na yɛade mɔɔ ɔkpondɛ kɛ yɛyɛ la abo. Ɛhye bamaa yɛahola yɛayɛ asɔne mɔɔ nee Nyamenle ɛhulolɛdeɛ le ko la.—Kenga 1 Dwɔn 5:14.