“Debie Mɔɔ Bɛ Rɛle Ɛnvi Ye Ɛlɛ La” Rale Wɔ Ye Mekɛ Nu

“DEBIE MƆƆ BƐ RƐLE ƐNVI YE ƐLƐ LA!” Duma ɛhye a menli dɔɔnwo vale vɛlɛle “Creation Drama” ne a. Ɔrale wɔ ye mekɛ nu na menli mɔɔ nleanle bie la arɛle ɛnrɛvi ye ɛlɛ. Ɔhale mekɛ ekyi na Hitler tumililɛ ne ava ɛkpɔlɛ kpole ne ara Gyihova menli mɔɔ bɛwɔ Europe anwo zo la, Gyihova menli luale “Creation Drama” ne azo lile daselɛ kpole yele ye ayɛlɛ. Duzu a le “Creation Drama” ne?

Gyihova menli mɔɔ bɛwɔ asafo ne ati wɔ Brooklyn, New York, U.S.A. la, yɛle “Photo-Drama of Creation” wɔ ɛvolɛ 1914 ne anu. Ɔle sini mɔɔ bɛva nvoninli nee ɛdendɛlɛ bɛyɛ mɔɔ bɛnea ye dɔnehwele mɔtwɛ. Menli dɔɔnwo nleanle “Photo-Drama” ne wɔ ewiade amuala. Bɛyɛle ye ezinra ne mɔɔ bɛfɛlɛ ye “Eureka Drama” la noko wɔ ɛvolɛ 1914 ne anu. Noko ɔkadwu ɛvolɛ 1920 ne anu la, ɛnee nvoninli ne mɔ, sini ne, nee ninyɛne mɔɔ bɛfa bɛye la ɛzɛkye bɔkɔɔ. Noko, ɛnee menli kpondɛ kɛ bɛnea “Photo-Drama” ne bie. Kɛ neazo la, menli mɔɔ ɛnee wɔ Ludwigsburg, Germany la bizale kɛ, “Kenlenzu a bɛbaye ‘Photo-Drama’ ne bieko a?” Duzu a bɛbayɛ a?

Amaa bɛahola bɛaye Drama ne bɛahile bieko la, Bɛtɛle abusua ne mɔɔ wɔ Magdeburg, Germany la dɔle sini ngakyile vile adwelielilɛ gyimayɛvoma mɔɔ bɛwɔ Paris, France, yɛɛ nvoninli ngakyile noko vile nvoninliyɛlɛ kɔmpɛlɛ mɔɔ bɛwɔ Leipzig nee Dresden la ɛkɛ wɔ ɛvolɛ 1920 ne anu. Bɛvale bɛbokale alumua “Photo-Drama” nvoninli ne mɔ mɔɔ ɛnee ɛtɛsɛkyele la anwo.

Adiema Erich Frost, mɔɔ ze edwɛne nye zo kpalɛ la hyehyɛle edwɛne bokale nvoninli ne mɔ anwo. Bɛvale edwɛkɛ mɔɔ bɛvale bɛyɛle la bie bɛvile yɛ Creation buluku ne anu. Ɛhye ati a bɛvɛlɛle “Photo-Drama” fofolɛ ne mɔɔ bɛyɛle la “Creation Drama” la.

Ɛnee bɛfa dɔnehwele mɔtwɛ a bɛye Drama fofolɛ ɛhye a. Ɔle kɛ “Photo-Drama” ne la, na ɛnee bɛye ye ngyikyi ngyikyi nɔsolɛ nu. Ɛnee kenle mɔɔ bɛvale bɛbɔle ninyɛne, Baebolo ne nee ewiade tetedwɛkɛ, yɛɛ kɛzi adalɛ ɛzonlenlɛ ɛbɛlɛbɛla alesama la anwo edwɛkɛ wɔ nu. Bɛyele “Creation Drama” ne bɛhilele menli mɔɔ ɛnee bɛwɔ Austria, Germany, Luxemburg, nee Switzerland, yɛɛ bɛdabɛ mɔɔ bɛte German aneɛ ne na bɛwɔ ɛleka gyɛne la.

Erich Frost hanle kɛ: “Saa yɛlɛye Drama ne a, meka mekile menli mɔɔ me nee bɛ yɛ gyima la, titile edwɛndovoma ne kɛ, ɔdwu ɛnwomenlelielɛ mekɛ ne a bɛva yɛ mbuluku ne bie bɛmaa bɛ. Yɛdua adenle ɛhye azo yɛmaa mbuluku dɔɔnwo yɛtɛla mekɛ mɔɔ yɛlɛkɔ azua nu la.” Johannes Rauthe mɔɔ nleanle siniyelɛ ne azo wɔ Poland nee ɛnɛ Czech Republic la ka kɛ, menli mɔɔ rale la anu dɔɔnwo vale bɛ address manle amaa yɛahɔkpɔla bɛ. Yɛluale address ɛhye mɔ azo yɛyɛle sia kɔkpɔla mɔɔ so ma.

Ɔkadwu ɛvolɛ 1930 ne anu la, ɛnee menli dɔɔnwo ɛnlea “Creation Drama” ne, na ɛnee bɛka Gyihova Alasevolɛ anwo edwɛkɛ wɔ azua dɔɔnwo azo. Ɔkadwu ɛvolɛ 1933 ne la, ɛnee asɛɛ menli mgbe ko ɛnlea sini ɛhye mɔɔ yɛ ɔfese ne mɔɔ wɔ Germany manle bɛyele la. Käthe Krauss ka kɛ, “yɛdiale mayɛle nsia (anzɛɛ, km 10) wɔ kpɔkɛ nu, yɛvole awoka nee mbɔnza yɛdwule alehyenlɛ biala wɔ kenle nnu anu, yɛhɔnleanle Drama ne.” Else Billharz noko ka kɛ, “‘Creation Drama’ ne le ɛlɔlɛ mɔɔ melɛ memaa nɔhalɛ ne la adiabo.”

Alfred Almendinger ka kɛ, mekɛ mɔɔ ɔ nli hɔnleanle Drama ne la, “ɔ nye liele kpalɛ yemɔti ɔdɔle Baebolo kɛ ɔkpondɛ edwɛkɛkpɔkɛ ‘avinlileka.’” Na kɛmɔ yeanwu ye wɔ Baebolo ne anu la ati, ɔgyakyile asɔne ɛhɔlɛ na ɔmanle bɛzɔnenle ye. Erich Frost hanle kɛ: “Menli dɔɔnwo luale ‘Creation Drama’ ne azo rale nɔhalɛ ne anu.”—3 Dwɔn 1-3.

Mekɛ mɔɔ “Creation Drama” ne ɛnleanlɛ dwule zo kpalɛ wɔ Europe la yeangyɛ yɛɛ Nazi arane ne bɔle ye tumililɛ bo a. Bɛvale bɛ sa bɛdole Alasevolɛ ne mɔ gyima ne azo wɔ Germany wɔ ɛvolɛ 1933 ne mɔlebɛbo. Ɔvi zɔhane mekɛ ne mɔɔ ɔkɔdwu ewiade konle mɔɔ ɔtɔ zo nwiɔ awieleɛ wɔ ɛvolɛ 1945 ne anu la, bɛhilele Gyihova azonvolɛ mɔɔ ɛnee bɛwɔ Europe la nyane kpalɛ. Bɛvale Erich Frost bɛhɔle nlɔnu asɛɛ ɛvolɛ mɔtwɛ. Noko ɔnyianle ɔ ti, nzinlii ɔrazonlenle Bɛtɛle wɔ Wiesbaden wɔ Germany. Nea kɛzi ɔle kpalɛ kɛ “Creation Drama” ne mɔɔ bɛ rɛle ɛnrɛvi ye ɛlɛ la rale wɔ ye mekɛ nu, ramanle Keleseɛnema dɔɔnwo mɔɔ ɛnee ɛlɛba arayia bɛ diedi nwo sɔnea la anwosesebɛ bɛgyinlanle kpundii wɔ Ewiade Konle II la anu a!—Ɔvi yɛ tetedwɛkɛ mɔɔ wɔ Germany la anu.