Kpuyia 3: Duzu Ati A Nyamenle Maa Menwu Amaneɛ Ɛ?

ƐNEE Ian ɔ ze no nza kpalɛ. Ɛnee ɔ sa ka nwonane afoa nu ninyɛne mɔɔ ɔhyia nwo la ɛdeɛ, noko ɔ ze anla nganeɛdelɛ biala ali angile ye. Ian ka kɛ: “Ɛnee mengulo ye edwɛkɛ ɔlua nza ne mɔɔ ɔno nee kɛzi ɔyɛ me nli la ati.” Mekɛ mɔɔ Ian yɛle kpanyinli la yeanlie yeanli kɛ Nyamenle wɔ ɛkɛ. Ɛnee ye edwɛkɛ a le kɛ: “Saa Nyamenle wɔ ɛkɛ amgba a, ɛnee duzu ati a ɔmaa menli nwu amaneɛ ɛ?”

Duzu ati a kpuyia ɛhye anwo hyia ɛ?

Bie a ɛnlɛ ngyegyelɛ dɔɔnwo wɔ wɔ ɛbɛlabɔlɛ nu, noko saa ɛnwu kɛ menli mɔɔ bɛnze nwolɛ bie la ɛlɛnwu amaneɛ a, ɛbali nyane. Yɛɛ saa ɛle kɛ Ian mɔɔ ɛdawɔ mumua ne a ɛlɛnwu amaneɛ ne anzɛɛ wɔ dɔvolɛ bie anwo ɛdo ye anzɛɛ yewu a, kpuyia ɛhye mɔɔ fane amaneɛnwunlɛ nwo la anwo bahyia wɔ kpalɛ.

Mualɛ boni a bie mɔ fa maa a?

Bie mɔ die di kɛ Nyamenle maa yɛnwu amaneɛ amaa yɛabɛlɛ yɛ nwo aze na yeaze yɛ anwunvɔne. Yɛɛ bie mɔ noko die di kɛ menli nwu amaneɛ ɔlua ɛtane bie mɔɔ bɛyɛle la ati.

Duzu a mualɛ ɛhye mɔ maa yɛnwu ye a?

Alesama amaneɛnwunlɛ ɛnyɛ Nyamenle edwɛkɛ yemɔti ɔmaa ɔyɛ se kɛ yɛbahulo ye. Nyamenle ati yɛ se.

Duzu a Baebolo ne kilehile a?

Baebolo ne ka ye wienyi kɛ ɔnle kɛ yɛfa alesama amaneɛnwunlɛ nwo ɛzonle yɛsoa Nyamenle. “Saa awie kɔ ngyegyelɛ nu a ɔmmaka kɛ, ‘Nyamenle ɛlɛsɔ me anlea.’ Ɔluakɛ ɛtane ɛngola ɛnzɔ Nyamenle ɛnnea yɛɛ Nyamenle mumua ne ɛnzɔ awie biala ɛnnea.” (Gyemise 1:13) Nɔhalɛ nu, adwenle mɔɔ menli lɛ kɛ Nyamenle a maa bɛnwu amaneɛ la nee mɔɔ Baebolo ne ka ye wɔ Nyamenle anwo la ɛnnyia. Adenle boni azo?

Nyamenle subane titile ne mɔ ko a le ɛlɔlɛ. (1 Dwɔn 4:8) Baebolo ne fa nganeɛ mɔɔ Nyamenle te la to ɛrɛladane nwo fa si edwɛkɛ ɛhye azo. Nyamenle bizale kɛ: “Asoo ɛrɛladane arɛle bavi ɔ ra mɔɔ no nyɛfonlɛ, asoo ɔnrɛnwu ɔ ra nrenya mɔɔ yewo ye la anwunvɔne? Ɔyɛ a bɛ rɛle kɛvi bɔbɔ ɛdeɛ, noko mame, me rɛle ɛnrɛvi bɛ.” (Ayezaya 49:15) Asoo ɛrɛladane mɔɔ lɛ ɛlɔlɛ la anye fuu bahile ɔ ra nyane? Wovolɛ mɔɔ lɛ ɛlɔlɛ la babɔ mɔdenle aye ɔ ra avi amaneɛnwunlɛ nu. Zɔhane ala a Nyamenle ɛmmaa menli mɔɔ ɛnze nwolɛ bie la ɛnnwu amaneɛ a.—Mɔlebɛbo 18:25.

Saa bɔbɔ Nyamenle dwenle yɛ nwo a, menli mɔɔ ɛnze nwolɛ bie la nwu amaneɛ. Bie a ɛbaha kɛ, ‘Saa Nyamenle dwenle yɛ nwo na ɔlɛ tumi kpole a, ɛnee duzu ati a ɔnye mɔɔ fa amaneɛnwunlɛ ba la ɔnvi ɛkɛ ɛ?’

Ndelebɛbo kpalɛ bie ati a Nyamenle ɛmaa amaneɛnwunlɛ nwo adenle wɔ yɛ mekɛ ye azo a. Maa yɛzuzu ko anwo: Menli a ta maa awie mɔ nwu amaneɛ a. Nzisima yɛɛ atisesebɛma mɔɔ maa menli nwu amaneɛ la ɛngulo kɛ bɛkɛhakyi bɛ ndenle. Yemɔti amaa Nyamenle aye mɔɔ fa amaneɛnwunlɛ ba ɛkɛ la, ɔwɔ kɛ ɔsɛkye menli ɛhye mɔ.

Mɔɔ ɛzoanvolɛ Pita kilehile deɛmɔti Nyamenle ɛtɛsɛkyele ɛtanevolɛma anu la, ɔhanle kɛ: “Tɛ kɛ Awulae ɛngola ye ɛwɔkɛ mɔɔ yebɔ la azo di, kɛmɔ bɛ bie mɔ dwenle kɛ ɔde la, na yemɔ a le kɛ Awulae lɛ bɛ nwo abotane, ɔluakɛ ɔngulo kɛ bɛsɛkye awie biala. Ɔkpondɛ kɛ awie biala nu ɔ nwo na ɔtwe ɔ nwo ɔfi ye ɛtane ne mɔ anwo.” (2 Pita 3:9) Gyihova Nyamenle abotane ne maa yɛnwu ye ɛlɔlɛ nee ye anwunvɔnezelɛ.

Ɔnrɛhyɛ, Gyihova Nyamenle bayɛ nwolɛ debie. Ɔbadua menli mɔɔ bɛlɛmaa menli mɔɔ ɛnze nwolɛ bie ‘anwu nyane’ la kakɛ. ‘Bɛbadea menli mɔɔ maa awie mɔ nwu amaneɛ la na bɛazɛkye bɛ ɛzɛkyelɛ mɔɔ ɛnlɛ awieleɛ.’—2 Tɛsalonaekama 1:6-9.

Saa ɛkulo kɛ ɛnwu deɛmɔti Nyamenle maa amaneɛnwunlɛ nwo adenle nee mɔɔ ɔbayɛ ye wɔ nwo la anwo edwɛkɛ dɔɔnwo a, nea Duzu A Baebolo ne Kilehile Amgba A? buluku ne tile 11. Ɛbahola wɔahwe bie wɔ www.jw.org

Duzu A Gyisɛse Hanle Ye Wɔ Amaneɛnwunlɛ Nwo A?

Gyisɛse anva amaneɛnwunlɛ mɔɔ hɔle zo wɔ ye mekɛ zo la anwo ɛzonle anzoa Nyamenle. Emomu, ɔyɛle ninyɛne ɛhye mɔ.

Gyisɛse hilehilele kɛ Nyamenle ɛnva amaneɛnwunlɛ ɛndwe menli nzo. Gyisɛse yɛle wuleravolɛma, abuburama, nee anyenzinliravolɛma ayile. (Mateyu 15:30) Nwanwane ninyɛne mɔɔ ɔyɛle la kile yɛ ninyɛne titile nwiɔ: Mɔɔ lumua, Gyisɛse luale Nyamenle tumi zo manle menli mɔɔ ɛlɛnwu amaneɛ la anwo dɔle bɛ, yeanva amaneɛnwunlɛ yeammaa. Mɔɔ tɔ zo nwiɔ, Gyisɛse anyɛ menli ayile ala mɔɔ yeande nganeɛ yeammaa bɛ a. Gyisɛse zele menli mɔɔ bɛlɛnwu amaneɛ la “anwunvɔne.” (Mateyu 20:29-34) Gyisɛse lale kɛzi ɔ Ze te nganeɛ wɔ menli mɔɔ bɛlɛnwu amaneɛ anwo la ali. Yemɔti, yɛdua Gyisɛse ɛdendɛlɛ nee ye nyɛleɛ zo yɛnwu kɛ Nyamenle di nyane wɔ mekɛ mɔɔ Ɔkɛnwu alɔbɔlɛ mɔɔ menli ɛlɛdi la na Ɔkulo kɛ ɔboa bɛ.—Dwɔn 14:7, 9.

Gyisɛse lale alesama amaneɛnwunlɛ ɛvileka ne ali—Seetan Abɔnsam. Gyisɛse hanle sonla zɔhane anwo edwɛkɛ kɛ: “Ɔbɔ ɔ bo amuala la ɛnee ɔle kɔdiawu.” (Dwɔn 8:44) Eza Gyisɛse hanle kɛ Seetan Abɔnsam a le awie “mɔɔ sie ɛtane ewiade ɛhye” a, na ‘ɔlɛbɛlɛbɛla ewiade amra amuala.’—Dwɔn 12:31; Yekile 12:9.

Gyisɛse maa yɛnyia anyelazo kɛ mekɛ bie bara mɔɔ amaneɛnwunlɛ kɔsɔɔti abo bapɛ. Ɔhilele ye ɛdoavolɛ ne mɔ kɛ bɛyɛ nzɛlɛlɛ kɛ: “Yɛ Ze mɔɔ wɔ anwuma; . . . Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo, Kɛmɔ bɛyɛ ye wɔ anwuma lɔ la.” (Mateyu 6:9, 10) Saa Nyamenle Belemgbunlililɛ ne ba a, amaneɛnwunlɛ bo bapɛ wɔ azɛlɛ ye azo kɛmɔ ɔde ye wɔ anwuma la.

Wɔ ɛnyelɛzodeɛnwunlɛ ne mɔɔ Gyisɛse yele hilele ɛzoanvolɛ Dwɔn la anu, ɔhilele kɛzi ɛbɛlabɔlɛ ne bayɛ wɔ Nyamenle Belemgbunlililɛ ne abo la. Zɔhane mekɛ ne, Nyamenle “[bakyikyi] bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.” —Yekile 1:1; 21:3, 4.